HOME LANGKAN KATO

  • Sabtu, 14 November 2020
Gala Pahlawan, Gadang Tasurek
Pahlawan (ilustrasi.net)

Gala Pahlawan, Gadang Tasurek

Oleh TE Radjo Boedjang

Sapuluah Nopember, dikukuahkan jadi Hari Pahlawan jo Kepres Nomor 316 tahun 1959. Dasarnyo, lah jaleh dari aksi heroik Bung Tomo, 75 taun nan lalu, manuka bandera Balando di atok Hotel Yamato--kini banamo Hotel Majapahit, di Jl. Tunjungan No. 65 Surabaya.

Sasuai catatan sajarah, sasudah Proklamasi--17/8/45--pado tanggal 31 Agustus 1945, pamarentah mangaluakan saruan untuak mangibarkan bandera merah putiah, mulai 1 September 1945 di tiok wilayah Indonesia.

Baranjak dari seruan itu, pado 19 September 1945, babarapo pemuda dan pejuang Surabaya menurunkan dan merobek warna biru dalam triwarna bandera Balando di Hotel Yamato. Dwiwarna merah-putieh pun bakibar di puncak hotel tu.

Dalam pado itu, sarupo ditulih dalam buku-buku sajarah, Japang nan kalah dek sekutu (Parang Dunia 2) tapaso angkek kaki dari Tanah Pertiwi. Balando jo Inggris nan masuak barisan sekutu tu, tibo di Jakarta  15 September 1945. Apo pulo nan nyo cari, salain ingin kumbali manguasai nusantara.

Dan, Balando jo Inggris tu mulai masuak Kota Surabaya tanggal 25 Oktober 1945. Tirto.id mancatat, bala tantara Balando jo Inggris bagabuang dalam pasukan nan banamo Rehabilitation of Allied Prisoners of War and Internees (RAPWI) atau Bantuan Rehabilitasi untuk Tawanan Perang dan Interniran untuak malucuti sanjato tantara Jepang!

Apopun alasannyo, tantu pajuang dan para pamuda Surabaya dak manarimo kahadiran Balando jo Inggris tu. Salamo tigo ari--27-30 Oktober 1945--tajadi parang antaro "arek-arek Suroboyo" jo pasukan RAPWI.

Kumandan pasukan Inggris di Jawa Timur, Brigadir Jenderal Aubertin Mallaby, tewas dalam suatu insiden, pada 30 Oktober 1945. Lalu, kumandan digantiaan dek Mayor Jenderal Robert Mansergh--inyo saat itu Kumandan Divisi 5 Inggris.

Pado tanggal 9 November 1945, Mansergh mangaluakan ultimatum kapado rakyat Surabaya. Isinya antaro lain mamarentahkan supayo para pamimpin Indonesia di Surabaya wajib malapor. Sanjato-sanjato disarahan ka pasukan Mansergh. Dan para pamimpin jo pajuang--arek-arek Suroboyo--harus manandotangani surek manyarah. Tanpa syarat!

Tantu sajo arek-arek Suroboyo tak amuah mangalah dan mangaku kalah. Mako tajadilah parang basosoh pado tanggal 10 Nopember 1945. Surabaya luluah lantak. Ribuan urang mati. Tapi, Bung Tomo dan para pajuang dak suruik walau salangkah. Kajadian heroik itulah nan kito paringati tiok taun jadi Hari Pahlawan.

Sajalan jo paringatan Hari Pahlawan tu, kini tiok taun pamarentah maagieh gala Pahlawan Nasional ka urang-urang nan dinilai bajaso ka negara.

Taun kini, ado anam urang diagiah gala Pahlawan Nasionak dek Presiden Jokowi. Baliau-baliau tu adolah Arnold Mononutu, Baabullah, Machmud Singgirei Rumagesan, Raden Mattaher, Soekanto Tjokrodiatmodjo, dan Sutan Mohammad Amin Nasution.

Kini, total Pahlawan Nasional kito sabanyak 191 urang, 15 di antaronyo kaum parampuan. Banyak nan bagala Pahlawan Nasional. Kabae, Indonesia lah nan punyo Pahlawan Nasional paliang banyak di dunia ko!!!

Dan bagi daerah, iko adolah kabanggaan, kecek Katua DPD RI AA LaNyalla Mahmud Mattalitti--dilansir Minangsatu, Selasa (10/11).

Sacaro badaerah, tantu iyo ado kabanggaan di situ. Misalnyo, dari Sumbar ado 17 urang Pahlawan Nasional, tantu bangga kito.

Bahkan, baru-baru ko, babarapo kalangan di Sumbar mausulkan pulo Syeikh Sulaiman Ar-Rasuli (Inyiek Canduang)--ulama dan pandiri Madrasah Tarbiyah Islamiyah (MTI) Canduang--untuak manjadi Pahlawan Nasional.

Itu bukti, iyo paralu dek kito kabanggaan bapahlawan. Tapi, makin banyak pahlawan nan kito punyo, makin gadang kabanggaan, makin kuek kah marwah kito?

Nah, iko lain pakaro. Nan jaleh tiok taun ahli warih Pahlawan Nasional dapek pitih Rp50 juta dari pamarentah. Para ahli warih itu pun masuak anggota Ikatan Keluarga Pahlawan.

Di lua gala jo materi nan babilang tu, sasungguahnyo untuak apo kito dak bulieh malupoan sajarah? Untuak apo kito mahormati para pahlawan?

Andaknyo, gala Pahlawan Nasional jan hanyo gadang tasurek. Tapi ado substansi--bungka nan piawai--sahinggo sarupo gala di Minangkabau nan dak pernah mati! 

Kito arok, substansi kepahlawanan nan lakek di gala Pahlawan Nasional tu dak lapuak dek ujan, dak lakang dek paneh. Tema "Pahlawanku Sepanjang Masa" jan hanyo gadang tasurek, tapi gadang diamba!


Wartawan : TE Radjo Boedjang
Editor : sc.astra

Tag :#Pahlawan #GelarPahlawanNasional