Dari Diskusi Politik Minangsatu; Maukue Tukang Ukue

Dari Diskusi Politik Minangsatu; Maukue Tukang Ukue

Namonyo sajo parang--kontestasi--tantu sajo saribusatu macam strategi dipakai. Mulai dari strategi jaman dulu, sampai strategi paliang canggih lah dilakuan. Tujuannyo, apo lai kok idak mangumpuaan suaro sabanyak-banyaknyo. 

Tamasuak pakaro ukue maukue. Apopun itu, mamakai tukang ukue adolah bagian dari strategi, kecek pakar politik Unand, Dr Asrinaldi, kutiko mangecek di Diskusi Politik Minangsatu, Akek (31/10) nan lapeh.

Kecek Asrinaldi kutiko diskusi batajuak "Mengukur Tukang Ukur; Fenomena Lembaga Survey dan Polling Pilkada", tukang ukue tu--lembaga survey--adolah alat parang. Tugehnyo ibaraik intel. Baa mametakan situasi? Dimaa daerah kantong, dimaa nan masih lamah? Baa caro manaiak an elektabilitas?

Dari karajo tukang ukue itulah, timses manyusun strategi; dimaa nan paralu basosoh karano dukungan alum banyak. Dimaa paralu marundoi dukungan nan lah boneh. Atau dimaa nan paralu dikaja lai, supayo dak lapeh kijang ka rimbo!

Masih kecek Asrinaldi, karano alat, mako hasil survey yang dipublish tu tantu sajo adolah bagian dari strategi. Baa du?

Mukasuiknyo, apopun yang dipublish dek tim sukses, tantu lah diparetongan dampak positif jo negatifnyo. Kok lai ka manggadangan ayie, maluncue lah publikasi tu. Kok sabalieknyo, babaliek awa panabangan, jaleh diilak an nah.

Demokrasi lansuang sarupo kini ko, memang dakek jo politik pencitraan. Kok pandai bamanih muluik, nan itam bisa jadi abu-abu, sudah tu jadi putieh. 

Intinyo, demokrasi lansuang ibaraik urang manggaleh ubek. Sungguahpun ula gadang nan dijanjian manari dari dalam peti, tapi urang bagaduru tibo dan mambali ubek nan diadang!

Mako, karajo tukang ukue mirip-mirip jo itu. Baa caroe mambungkuih citra, maatur opini, sahinggo paslon disukoi urang banyak. 

Tapi, tunggu dulu. Kecek Asrinaldi, ado kriteria tukang ukue ko nan paralu kito tau. Supayo diindang ditampi tareh, dipilieh atah ciek-ciek. Nak abeh maa nan boneh, maa nan ampo barek, maa nan atah?

Ado ampek kriteria tukang ukue tu. Partamo, netralitas. Kalau tukang ukue tu adolah "urang dalam" paslon, mangaa pulo wak kapicayo? Kok nan maukue urang netral, sarupo wasit sepakbola di Piala Dunia nan dipilieh dari urang-urang nan dak bakaik (sacaro asa nagari, kakarabatan, dll) lalu dititahkan turun babarapo saat sabalum batandiang, mako netralitas bisa diarok. 

Kaduo, metodologi nan dipakai. Ado banyak teori dalam marumuskan metodologi survey. Intinyo, baa supayo sampel nan diambiek mawakili sacaro tapek dari kasadoalahe populasi. 

Kecek Asrinaldi, sakurang-kurangnyo 440 sampel dipakai. Tapi mawakili total populasi nan baragam-ragam tu (heterogen). Harus tawakili unsur padusi laki-laki, unsur suku, unsur kelompok, dll. Dan mawakili saantero wilayah nan disurvey. 

Kok sampel banyak diambiek di daerah asa paslon, lah jaleh objektivitasnyo kurang dipacayo! Jadi, sampel nan diambiek harus proporsional dan representatif. 

Nan katigo, akreditasi dan legalitas tukang ukue nan tun. Ado survey nan dilakukan perorangan, tantu sacaro legalitas dak bisa dipacayo. Karano para tukang ukue tu kini ado organisasinyo. Ado akreditasinyo. Sahinggo legalitas tukang ukue tak diragui lai. 

Takaik jo itu, mako kutiko timses mampublish hasil survey, tapi dak manyabuik an apo namo lembaga survey nyo, mako kito bulieh dak picayo. Tapi, sabalieknyo, kutiko lembaga survey tu disabuik an, bulieh lah kito tiliek kabaradaan lembaga tu. 

Nan ka ampek, sia nan mambiayai? Di Amerika Serikat (AS) lembaga-lembaga survey tu independen sangaik. Sahari sabalum mulai mamilieh Presiden AS--antaro Trump jo Biden--tanggal 2 Nopember 2020 kapatang, BBC marilis polling 52 persen untuak Biden. Karano BBC ko independen, nan punyo urang Inggris, dak takaik jo Trump atau Biden, buliehlah kito picayo. Hasilnyo, untuak kondisi samantaro (4/11), Biden lah dapek 131 elektoral. Lah ado tando-tando ka manang. Sasuai jo prediksi BBC. Trump baru 108. Untuak manang paralu 270 elektoral.

Tapi kok survey tu Trump atau Biden yang mambiayai, dak usahlah picayo. 

Baitu pulo dalam Pilkada Serentak kini ko. Labieh 250 an provinsi dan kabupaten/kota sadang "baralek demokrasi", mamilieh nangkodo. Tamasuak di Sumbar. Ado 13 kabupaten/kota nan sadang baralek. Tambah Provinsi Sumbar ciek. Tukang ukue lah malang malintang mangiro-ngiro. Paslon-paslon lah diagieh presentase manang. 

Mau picayo? Bulieh. Tapi tiliek dulu. Ukue tukang ukue tu jo ampek kriteria nan tun.