CARO MAMBUEK SALUANG

CARO MAMBUEK SALUANG

Oleh: Satya Gayatri*

Minangkabau nagari nan tanamo dek kaindahan alamnyo, lamak makanannyo, sahinggo baragam seni dan budayonyo. Salah satu seni di Minangkabau nan alah dikatahui urang banyak iyolah seni musik. Alaik musik nan digunoan untuak bamain musik di Minangkabau banyak pulo macamnyo, diantaronyo ado alaik musik saluang. Saluang marupokan alaik musik tradisional khas Minangkabau nan tabuek dari buluah, dalam bahaso Indonesia biaso disabuik bambu. Alaik musik saluang dimainkan jo caro diambuih, nan mamainan saluang ko pado umumnyo urang laki-laki. Alunan suaro saluang biasonyo digunokan untuak mairingan dendang. Irama nan kalua dari saluangpun babeda-beda, sasuai jo dendang nan diirianganyo.

Uniknyo satiok daerah nan ado di Minangkabau punyo ciri khas dalam mamainkan basaluang. Mulai dari alaik jo bahan nan digunoan untuak mambuek saluang hinggo caro maambuih jo irama nan kalua dari saluang. Rancak indaknyo bunyi saluang salain dipangaruhi dek kapandaian urang nan maambuihnyo, ado juo ditantuan dek caro mambuek sarato mamiliah buluahnyo. Kualitas buluah nan dijadian saluang sangaik bapangaruah kapado bunyi nan didangaan.

Saluang nan rancak tabuek dari buluah nan seratnyo rapek, buluah nan alah tuo sacaro alami. Kalau manggunaoan buluah nan mudo nan ditabang nan di jamua sasudah itu. Serat buluah nan dijadian untuak itu indak rapek, sahinggo indak tahan saroato indak rancak bunyinyo wakatu diambuih. Jikok caro mamiliah buluah sarato mambuek saluang iko rancak kualitas buluahnya mako saluang bisa digunoan sampai batahun-tahun. Untuak mandapekan saluang nan rancak ado pulo caronyo.

Partamo, piliah buluah nan masak atau nan tuo. Kaduo, katiko buluak alah ditabang mako dibasuah, dibarasiahan untuak mambuang miangnyo. Katigo, buluah dirandam samalam suntuak, buliah dirandam jo aia sabun supayo labiah barasiah. Kaampek, isuak harinyo, buluah disangai, tapi indak buliah kanai matohari langsuang. Manyangai buluah buliah di bawah atok atau loteang sampai buluah sabana kariang. Sabagian urang ado pulo nan manggoreang buluah jo minyak, supayo marapekan serat buluah ko. Kalimo, kalau buluah alah kariang, buluah bisa di karek sasuai ukuran saluang nan alah ado. Saluang nan kualitasnyo rancak bisa tahan batahun-tahun.

Ado pulo sabagian urang nan bapandapek talang rancak juo dijadian saluang. Talang tumbuhan nan hampia samo jo buluah, tapi batangnyo labiah tipih. Konon katonyo talang anyuik labiah rancak untuk dijadian saluang tapi, indak sadonyo talang dapek dijadian saluang. Talang nan bisa dijadian saluang adolah talang nan bulek, seratnyo luruih indak maliyuak. Biasonyo dari sarumpun talang hanyo duo paliang banyak nan dapek dijadian saluang. Sabab rueh talang banyak seratnyo. Jikok dipasoan mambuek saluang jo talang nan sarupo itu, saluang indak dapek dipakai lamo. Katiko saluang diambuih bisa rueh saluang angek. Jikok taruih maambuihnyo rueh saluang samakin angek sahinggo bisa pacah.

Minangkabau disatiok daerahnyo punyo caro surang-surang untuak mambuek hinggo manjago saluang nan digunoannyo. Caro nan digunoan sasuai jo nan alah dipalajari sacaro turun-tamurun dari nan tuo-tuo. Jikok mambuek saluang mangguoan alaik jo bahan nan bakualitas, saluang di Minangkabau bisa digunoan lamo. Samakin acok saluang diambuih samakin dapek caro mamainannyo, samakin rancak pulo lenggok bunyinyo.

*Dosen Sastra Minangkabau FIB Unand