HOME LANGKAN TINGKOK

  • Senin, 22 April 2019

Nagari Batu Taba

TINGKOK
TINGKOK

Nagari Batu Taba

di Luhak Tanah Data

Oleh   Bahren*

 

Jo bismillah curito ko dibukak. Di buak dek angku Datuak Rangkayo Bungsu. Carito dikisahkan ka Ivan Adilla, Nan datang ka liau Datuak Rangkayo Bunsu, di hari sahari nantun tanggal duo puluah limo di kalender. Bulan Mei kutiko itu di dalam tahun duo ribu tujuah. Datuak Rangkayo Bungsu, ko surang patani jo paladang, tujuah puluah ampek umua liau kutiko itu, kutiko basuo di rumahnyo di Batu Taba molah tapeknyo.

Apo koh bana curito nan ka disampaikan dek baliau Datuak Rangkayo Bungsu, Iyo lah curito tantang nagari ko, baa dek banamo Batu Taba. Tantang curito Batu Taba nan ditanyokan dek Ivan Adilla, mako bakisah molah baliau, tantang sabab jo musababnyo mako nagari banamo Batu Taba.

Mako Nagari Banamo Batu taba, biko malah curitonyo. Adolah pado suatu maso, sakalompok niniak moyang kito bajalan dari Pariangan Padang Panjang mancari lahan jo paladangan, sarato jo tampek Tingga. Mako niniak ko bajalan, dek nagari asa alah talampau rami. Dek lamo lambek bajalan, sampai lah niniak di tampek ko kini. Di siko mulai di bukak ladang sarato jo parumahan tampek bataduah kutiko hujan, tampek lalok kutiko malam. Dek daerah nan ditampet-i kiniko banyak Batu nan taba-taba atau balapih kato rang kini. Mako dibari malah namo dek niniak moyang kami tampek tu jo Batu Taba. Sarupo bana jo palsapahnyo alam talambang jadi guru.

Sabagai nagari, Batu taba juo punyo tapian tampek mandi. Tapian tampek mandi nan ado di Batu Taba iyolah daerah aliran batang aia, sungai kato rang kini. Di sungai nantun banyak lah tumbuah batang Rotan hinggo dibari malah namo tapian tampek mandi tu jo namo Sungai Rotan, aratie Sungai nan banyak batang rotan.

Ado pulo ciek daerah nan banyak tumbuah batang cangkiang di daerah nantun. Mako dibari lah namo jo Cangkiang. Indak doh bara jauahnyo dari cangkiang adolah sabuah daerah lai nan ado surau gadang nyo, makonyo sampai kini ko daerah tu dibari namo jo Surau Gadang.

Samantaro itu kini, ado pulo tigo tampek nan dijadikan pamukiman. Antah ko dek urag nan indak rami bana, atau kok daerah nyo nan talalu ketek, mako digabuang sajo tigo pamukiman tu manjadi ciek. Dek karano tigo nan digabuang, bai tak ado silang jo sangketo mako dibari namo daerah tu kini jo Tigo Jorong.

Di batu taba tu pulo ado ado daerah nan tanahnyo sangaiklah kariang inggo nyariang bunyinyo kutiko diinjak mako dibari namo lah daerah tu jo tanah nyariang. Indak doh jauah dari tanah nyariang ado pulo mato aia nan mancucua sangaik lah kancang, mancucua dek urang Batu Taba disabuik jo mamanca, mako tampek mato aia mancucua tu dibarilah namo jo panca yang aratinyo mamanca.

Ka Datuak Rangkayo Bungsu, Ivan Adillah juo batanyo. Apokoh curito ko lah di danga sajak dulunyo atau baa pandapek Mak datuak. Manjawek Mak Datuak kutiko tu, carito ko lah liau tarimo sajak dulu, dari niniak jo moyang liau sarato jo urang nan tuo-tuo. Labiah lanjuik liau bakisah urang Batu Taba ko barasa dari Pariangan, Asa nyo niniak kami ko ado nan Basuku Tanjuang, Ado Suku Koto jo Suku Guci, Suku Pili Jo suku Jambak cukuik jo Suku Sikumbang ado pulo. Baitulah kisah dari Mak Datuak Rangkayo  Bungsu, tantang sijarah jo asa usua mako banamo Batu Taba. Jiko ado nan bana tantang curito ko, bana nan datang dari Allah. Kok ado nan salah dalam curito ko, Salah nan sipaik manusia. Ka Allah ta’ala kito mohonkan ampun. Ka urang banyak nan mambaco kito mamintak Maaf.

*Dosen Jurusan Sastra Minangkabau FIB Unand


Wartawan : Bahren
Editor : Bahren

Tag :# Langkan # Tingkok # Asa #Usua # Nagari # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com