HOME LANGKAN TINGKOK


  • Kamis, 13 Juni 2019
Tigo Koto
TINGKOK

Tigo Koto

di Luhak Tanah Data

 

Oleh   Bahren*

 

Jo bismillah curito dibukak, curito tantang asa jo usua. Asa usua nagari kito, baa mangko banamo nan bak kian. Adopun curito asa jo usua nan ka dikambang kini ko, iyolah nagari Tigo Koto dalam luak Tanah Data. Curito nan ka ambo kabakan datang nan dari H. A.M Datuak Talanai Sati, Ketua KAN liau wakatu itu kutiko batamu jo Ivan adilla. Lapan puluah satu umua liau wakatu bacurito tantang sajarah asa jo usua Tigo Koto, tapek nyo di Galogandang liua bakaba wakatu itu.

Baa bana nagarai ko mako banamo Tigo koto. Bakaba lah liau maso itu. Biko kaba dari baliau. Mako nagari banamo tigo koto, iyo dek basabab jo karano nagari ko gabuangan dari tigo buah koto nan alah ado sabalun nyo. A bana koto nan tigo tu nan partamo Galo Gandang nan kaduo Turawan nan katigo Padang Lua.

Salah sabuah dari daerah nantun, panduduaknyo banyak nan mambuek alaik pakakeh untuak ka mamasak. Kasadonyo paralatan tu tabuek dari tanang liek, di situ lah sagalo nyo dibuek mulai dari pariuak jo balango, langkok jo kuali tampek manggoreang. Satiok mambuek paralatan itu, tadangalah samacam bunyi bunyian sarupo bunyi gandang kutiko maampok-ampok jo manokok untuak mambantuak tanah liek cako. Mako tampek niniak moyang kami mambuek paralatan nan sagalo bagandang tadi disabuiklah tampek nantun jo namo Galo Gandang aratinyo sagalo bagandang.

Di bagian lain nagari tigo koto ko, adolah sabuah tampek, di situ urang-urang biaso bamain catua “catur” bahaso rang kini. Di tampaik ko lah niniak kami ko bamain sambia mangatua sia nan ka malawan sia. Lamo bakalamoan mako banamo lah daerah nantun Turawan nan barasa dari mangatua lawan.

Sabuah lai dari nagari kami ko iyolah sabuah padang nan lataknyo di bagian lua dari nagari tigo koto ko. Mako dibarilah namo daerah nantun jo Padang Lua. Adopun dalam perkembangannyo nagari tigo koto ko punyo pamukiman-pamukiman nan lain. Pamukiman nan ado sabuah masajik tuo dibari namo lah tampaik nantun jo sabutan Masajik Tuo. Ado juo pamukiman nan lataknyo di bagian ujuang dari sabuah tanjuang dakek nagari tigo koto dibarilah namo jo Ujuang Tanjuang. Ado pulo pamukiman nan latak nyo didakek katinggian, urang tigo koto biaso manyabuik tampek nan agak tinggi ko jo sabutan guguak mako dibarilah namo daerah tu Guguak.

Ado sabuah lai daerah nan agak gadang dan biaso manjadi benteng jo tampek pertahanan mako banamo lah daerah tu jo Kubu Gadang. Daerah nan ado siso-siso tampek suci urang Hindu samaso zaman Hindu daulu dibari namo Biaro atau biara caro rang kini. Nan tarakir kali dearah nan basawah dari tanah liek dibari namo jo sawah liek. Indak doh susah-susah bana niniak kito mambari namo, bitu bana Datuak Talanai bakisah maso itu, sarupo bana jo palsapah iduik urang minang, alam takambang manjadi guru. Apo-apo nan tajadi di alam, kabanyakan itu nan manjadi sabab jo asa usua pambarian namo tampek-tampek nantun. Curito ko alah di tarimo dek Datuak Talanai Sati sajak dari urang tuo-tuo daulu di kampuang ko. Tangguang jawek dek kami kini manyampaikan apo nan ado, sarato manyampaikan apo nan pernah kami danga. Adopun limbak dari pado itu, Datuak Talanai Sati juo manyampainakn wakatu itu, urang Nagari Tigo Koto ko basuku Piliang Jo Kuti Anyia, Panyalaian jo Suku Koto. Suku Patapang, suku Bingkuang, Suku Malayu jo Suku Parik Cancang.

Itulah kaba nan dikabakan dek Angku Datuak Talanai Sati, jiko nyo ado nan bana tantang itu, kabanaran iyolah datang dari Tuhan. Allah taala kayo sungguah tampek sagali ilimu bahimpunnyo. Jiko ado salah jo gawa. Salah nan datang dari ambo. Ambo nan hanyo manusia, tampek salah jo gawa bakumpua. Kapado tuhan Ambo minta ampun, ka pambaco maaf di pintak.    

 

*Dosen Sastra Minang FIB Unand


Wartawan : Bahren
Editor : Bahren

Tag :#langkan #Tingkok #asa #usua #Nagari # Minangkabau