HOME OPINI CELOTEH

  • Sabtu, 16 Mei 2020
Tagak Rumah, Paga Diri
Celoteh

Tagak Rumah, Paga Diri

Oleh Taufik Effendi

Tagak nagari, paga nagari. Tagak kampuang, paga kampuang. Tagak suku, paga suku. Tagak rumah, paga diri! 

Tapi kapatang, Kamih (14/5), lah 371 urang se nan kanai Covid-19 di Sumbar. Batambah taruih, nan kapatang tu paliang banyak, 32 urang sakali kanai! Baa lai ko?

Sacaro banegara--lah bagalanggang mato rang banyak, basuluah matoari--banyak nan lah dikarajoan dek pamerintah untuak mahalau tubo nan banamo Covid-19 ko. Aturan-aturan, agak-agieh, sampai ka pitih-pitih lai diasiang an. Lai dak sarupo main bola bapusu-pusu doh. Lai mamakai pituah "diagak mangko diagiah, dibaliak mangko dibalah". 

Maurus wabah lah ka namoe! Sagalo hal lai dilakukan dek pamerintah. Dari A sampai Z lai dipikie an. Dan tiok ari, jubir Yuri mangabaan tambah kurang Covid-19. Presiden Jokowi pun manyuruah lakeh-lakeh bagi bareh. Sugiro bagi BLT (bantuan langsung tunai). Tapi awas, jaan main-main, jaan manangguak di aie karuah! (Mako tabik lah hoaks; Kepala Daerah yang mainkan bantuan Covid-19 bakal dihukum seumur hidup. Untuang lai sugiro diklarifikasi kaba busuak ko!)

Baitu pulo di daerah. Mulai dari gubernur, bupati/walikota, camek, walinagari, sampai ka pak jorong, dan pangurus musajik jo surau, lah sarangkuah dayuang malawan corona. Baliau-baliau tu lah karusuak anyak dek bakarajo. 

Bahkan para politisi, cakada-cakada, jo anggota dewan bagai, sato turun ka bawah, bagi-bagi masker. Ado lo nan berang-berang apak tu bagai. Manyarengeh ka patugeh nan maatur supayo dak bakarumun. Ndehhh...Antah lah, bisa bata puaso wak dek e.

Tapi, nan jaleh, baliau-baliau tu iyo sibuk. Alum lai rapek-rapek, zoom ka zoom, baliau-baliau tu malah bakuliliang pulo sato mambagi sembako. Ikuik pulo mambagi-bagi masker. Pokoknyo, super lah baliau-baliau tu. Sabaleh pontennyo!

Bia se lah urang nan dangki mangecek; kan dak jo pitih inyo dibali du? Manga pulo sarupo pitih dari saku-saku inyo surang maruok-ruok ka masyarakaik? Mungkin supayo dikecek an; eh...iyo elok apak tu, dermawan liau. Jan lupo bisuek dak? Ndehhh... (sssttt...tanyo ciek;"Ado dak patugeh khusus untuak mambagi-bagi bantuan tu? Atau memang itu karajo liau yo?)

Tu manga lo wak? Kini ari dek liau nah. Kutiko ari dek kito, jaan ka kalah, podo se dak amuah! Labieh lo dari iko nah. Lah sarupo itu se sajak dulu kok! Lah kasuri tuladan kain, kacupak tuladan batuang. Hahaha...

Baitu pulo dek kito nan banyak. Dak kamaa kamailak. Suok, kida, muko, balakang, lah corona se sabalik. Di mudiak tubo dilapeh, di hilie lukah mananti, di tangah jalo takambang, di lua parangkok makan. Ndehhh... kamaa badan ka batenggang?

Sia nan dak nyio tubo ko capek pai? Lah sa dunia urang baharok; bilo lah ka bulieh malala jo mangopi rami-rami, sarupo dulu. Bilo lah paja bisa sakola? Bilo bisa bajumek? Bilo mall ka dibukak, lah taragak nan manonton di twentyone haaa. 


Nan pilkada pun lah dakek pulo, lai ko lah ka jadi "mancucuak" taun kini? Para cakada diarak ragu. Kok dak jadi taun kini, jaan sampai capek abih paluru. Kok aniang se, nyo alieh pasa dek kawan!

Baa toh di nan kini? Satantangan kito nan basamo. Apo ka tarandam randam indak basah, tarapuang apuang indak hanyuik sajo? Lapan kali sawah tagadai, nan koncek di ateh pamatang juo! Nan corona tibo juo. 

Atau lah kasarupo barabab di talingo kabau? Alang tukang binaso kayu, alang cadiak binaso adat, alang arih binaso tubuah. Nan corona, corona juo, nan manyabu taruih juo! Nan wabah, wabah juo, nan pasa rami taruih! Anguak anggak geleng amuah, nan dek inyo lalu juo.

Nan jaleh, kan lai baransue kaji mah. Lai banyak nan cegak dari corona. Walau sarupo cipuik dalam banda, lambek gariknyo. Covid-19 ko sarupo ikue pituah rang tuo-tuo juo ruponyo; pulang maalum pado kito!

Mangko dak ado jalan lain. Tagak rumah, paga diri. Paga rumah surang-surang. Jaan sampai tapaso. Jaan kuaik katam karano tumpu, kuaik sapik karano takan. 

Tagak rumah, paga diri. Mulai dari rumah surang-surang; usaokan jaan baranjak dari rumah. Jan pai bakarumun. Acok-acok basuah tangan. Kok tapaso kalua, pakai masker. 

Tapi, kok duduak yo marawik ranjau, kok tagak maninjau jarak. Karajo taruih, namun sasuaikan jaan sampai kanai tubo. Jaan sampai ka balakang suok. Nampaknyo Covid-19 ko maagieh pangajaran; sahabih-habih main, pa kuek paga surang-surang!

(Taufik Effendi, Pemimpin Redaksi Minangsatu, Wartawan Utama)

*Tulisan ini sudah diterbitkan pula di Surat Kabar Harian Khazanah, Jumat (15/5).


Tag :#tagakRumah #pagaDiri #psbb #covid19