Tagadai

Tagadai

Oleh: Peppy Reskilianti*

Surang diri Si Laya bamanuang dalam kamarnyo. Inyo kini sadang mamikian baju apo nan rancak dipakainyo untuak pai nongki di cafe samo kawan e bisuak. Baju ma yang ancak Ya pakai kini yo? iko ancak tapi lah acok lo dipakai, yang iko suai tapi ketek lo, ndeh baju a ka Ya pakai bisuak ko, Pokok nyo, Ya harus ado baju baru untuak bisuak, ndak mungkin baju ya iko ka iko se do, malu lah samo kawan-kawan.

"Mak oh mak.." Laya maimbau amaknyo

"Iyo nak, ado apo tu? " tanyo amak Si Laya

"Mak Laya nio baju baru, Laya ka pai main bisuak samo kawan-kawan" kato Si Laya

"Baju Laya, yang baru mak balian minggu patang kan ado tu? manga bali baju lo baliak? tanyo amak si Laya

"Ndeh mak, tu lah Laya pakai ma mak, maso itu ka itu se yang Laya pakai? nampak na bansek wak jo urang mak" kato Si Laya

"Ya Allah nak, ba a kok kayak itu mangecek nak? ndak nio kawan Laya bakawan jo Laya kalau ndak baju baru emang e tu? jan pituruikan bana gaya urang nak! "

"Ndak usah amak banyak tanyo mak, poko e Laya harus ado baju baru kini" bantak Si Laya ka amak nyo.

"Jo apo ka amak bali baju baru nak? amak sadang ndak bapitih kini do nak" jawek amak Si Laya

"alah jan baduto juo amak lai mak, upah manjaik baju tek tini patang kan ado ma mak! " kato Si Laya

"Tu untuak uang sakolah Laya ma nak, ndak mungkin amak pakai untuak bali baju baru do nak. jo apo ka amak bayia uang sakolah Laya beko nak? uang sakolah Laya lah 3 bulan manunggak nak. " jaleh ama si Laya

"Laya ndak nio tau do mak, Laya nio bali baju kini ko juo. Baok kamari pitih e mak! " kato si Laya

"Ndak bisa do nak, jan gara-gara baju baru tu lo ndak tabayia uang sakolah Laya beko nak"

"Itu urusan amak bukan urusan Laya! sambia maegang pitih dari tangan amak ee".

Sasudah mandapekan pitihnyo, Si Laya pai ka pasa mambali baju. Indak nyo pikian parasaan amak yang alah nyo bantak-bantak tadi. Inyo labiah paduli manuruikan gaya kawan-kawan e yang alun tantu sabana elok ka inyo.

Isuak ari nyo, pai lah Si Laya jo kawan-kawan nyo nongkrong di cafe

" Ancak baju kau ma Laya, dima dapek tu? " tanyo Si Siti ka Laya

"Lamak se kau ngecek dapek, baru den bali baju ko ma Siti, baju maha! " jawek Si Laya

"Wuih banyak pitih Laya tu? " tanyo Si Tari

"Bisa traktir kami tu ma" kecek Si Nana manyambuang

"Hmm tantu bisa nyo, nio bali apo kalian? pasan lah, jan kayak urang susah kalian" jawek Si Laya santai

"Ondeh yobana tu? kok iyo den pasan makanan lai a! " jawek Si Tari

" Iyo pasan lah!" kato Si Laya

Sasudah makanan tibo, dibaokan dek pramusaji nyo, mulai lah makan anak urang tu. Nan di dalam hati Si Laya lah cameh jo apo ka nyo bayia makanan tu sedangkan pitih di tangan nyo hanyo tingga siso mambali baju kapatang

" Ndeh Laya yo sabana elok kau yo, lamak makan kami a" kecek Si Nana

" Iyo elok bana Si Laya ko, acok -acok se lah mode ko Laya" jawek Si Tari kasanangan

" Iyo santai se lah kalian ndak usah lebai, makan se lah lai" jawek Si Laya pura-pura santai.

Sadang lamak-lamak nyo makan datang lah pramusaji maantaan struk pambayaran

"Ondeh banyak nyo lai ko, jo apo ka den bayia ko!" kato Si Laya dalam hati, mancaliak Si Laya cameh heran lah kawan-kawan nyo ko

"Oi Laya dek a kau? ba a ko cameh tampang kau" tanyo Si Tari

"Antah dek a kau Laya, ndak ado pitih kau mambayia nyo do? jawek Si Nana

"Ndak itu do, giko a, pitih den tingga lo di rumah a" kecek si Laya

" tu ba a lai? " tanyo si nana

"Pinjam pitih kalian lu beko Laya ganti" kecek Si Laya harok-arok cameh

"Ndeh ma bisa, tapi ang yang ka mambayian, tu ka bapakai lo pitih kami, ma bisa nyo! " jawek Si Tari

"Iyo, pitih nyo tingga a, tolong lah pakai pitih kalian lu" jawek Si Laya mambana

"Eh ndak ado pitih kami nan ka di pakai do, kau pikian lah surang. ba a ka mambayia nyo "kecek Si Nana

"Tu mangko nyo, jadi urang jan sok kayo bana, bakecekan lo pitih banyak" kecek Si Tari

"peklah Na pulang se wak lai Na, tinggan se lah paja sok kayo ko" ajak Si Tari ka Nana

" Iyo pek lah tar, buek malu se paja ko" sambuang Si Nana

" Jan lah mode tu Na, pakai lah pitih Na dulu" mohon Si Laya

"Eh ndak ado do kami pulang lai, bayia lah dek kau lai! " jawek Si Tari

Akhirnyo pulanglah kawan-kawan Si Laya tadi, maninggaan Si Laya yang sadang binguang jo apo ka dibayia nyo makanan ko.

Satibo nyo di kasir batanyo lah Si Laya" bara kak? sambia maagihan struk pembayaran nyo ka kasir. "Sasuai di struk pembayaran nyo ni, kan ado tu ni" jawek kasirnyo

" Pitih awak ado sagiko nyo ni" jawek Si Laya cameh

" Eh ndak cuikuik do ni" jawek si kasir

" Ndeh ba a caro nyo ko ni? wak lupo baok pitih

" Ndak tau lo wak do ni, pokok nyo uni harus bayia! " jawek kasir

"Ndeh ba a yo, buliah wak pulang sabanta Ni, jampuik pitih ka rumah" mintak Si Laya

"Eh ndak bisa do ni, nio kabur yo? jawek si kasir

"Ndak ado wak kabur do ni, wak nio japuik pitih se nyo

"Ndak giko se lai, tinggan hp adiak di siko sabagai jaminan" jawek kasir

"Jan lai ni, ko harato wak satu-satu nyo ma ni" jawek Si Laya

"Ndak buliah indak do ni, ko caro nyo lai nyo ni" kato kasir

"Ha iyo lah Ni, ko Ni, jan sampai ilang hp wak nak"

Sudah tu bajalan lah Si Laya pulang ka rumah samo parasaan risau, nyo ndak manyangko ka giko kajadian nyo do, kawan nan salamo ko nyo anggap elok, lah pai maninggaan nyo disaat nyo butuah. Niek hati awalnyo ingin sanang-sanang, sangsaro datang malah kironyo, dek muluik lah talompek mangecekan ka mantraktir kawan, apo dayo hp nyo kini lah jadi jaminan.

Sampainyo di rumah Si Laya langsuang mangadu ka amak nyo

"Mak, maafan laya mak, hp nan baru mak balian lah tagadai di cafe mak" kecek Si Laya sambia manangih

"Ondeh nak, ba a kok bisa takah itu nak? " tanyo amak Si Laya

"Kawan-kawan Laya minta traktir tadi mak, kiro e pitih Laya ndak cukuik mambayia nyo mak" jawek Si Laya tasadu-sadu

"Andeh nak, jaleh wak urang bansaik nak jan lah sok-sok mantraktir kawan nak, tau lah jo untuang nak. Makan sahari hari se wak susah nak, kan lah mak kecekan jan talalu maikuikan gaya kawan-kawan nak co iko lah jadi nyo. "kecek amak Si Laya manasehati

"Iyo mak, Laya ndak manyangko lo kayak iko jadi nyo mak, maafan Laya mak" mohon Si Laya

"Kini tanang se lah Laya, yang lah tajadi bia lah tajadi, bisuak ko jan diulang lo parangai yang lalu-lau nak. Tolong dikana nak, awak urang susah, jan sambarang se manghambuan pitih, masa depan Laya masih panjang nak. Masalah hp, kok ado pitih amak, amak balian Laya hp yo nak, tapi gunoan sabaik-baik nyo yo nak" pinta amak Si Laya

"Makasih banyak mak lah mamaafkan Laya mak, Laya janji Laya akan barubah manjadi labiah baik. bia ndak dikecek dek urang, urang kayo bali ndak mak. Laya janji ka manyanangan amak.

"Alhamdulillah lah Laya, kok itu niek hati Laya. samoga Allah mangabuan pamintaan Laya.

*Mahasiswa Sastra Minangkabau FIB Unand