HOME LANGKAN GARAH

  • Sabtu, 30 Maret 2019
Salam Salasai Pilem Abih
Garah

Salam Salasai Pilem Abih

Oleh: Bahren (Dosen Sastra Minangkabau FIB Unand )

Kajadian nan indak disangko-sangko dek Si Man Iriak jo Piak Onjai tajadi juo. Kajadian ko tajadi kutiko inyo pai manonton pilem kalamari. Sabananyo iko samacam malu dek Si Man jo Supiak, tapi kabaa juo li. Dek karano itulah tajadi, dicuritokan juo lah akianyo dek Si Man Iriak.

Biko Kajadiannyo, Sasudah tigo kali bali karcis untuak manonton pilem kalamari. Yo… sabana gadang ati Si Man kutiko itu, inyo bisa mangicuah tukang jago pintu masuak nan alah duo kali mancabiak karcis nan dibali nyo. Tipu jo tepong si Man sukses karano inyo bali karcis ko ampek. Duo untuak panjago pintu nan duo lai untuak inyo. Dalam ati si Man maraso alah manang tiko itu.

Kajadian nan manyakikkan sasudah tu, kutiko Si Man Iriak jo Supiak Onjai mulai masuak ka dalam bioskop ka manonton pilem. Bitu masuak ka dalam… Takajuik lah si Man Iriak ondeh…… piak…. di sambuik e jo karpet merah wak di siko kironyo. Atau iko musajik ndak ko, kato Si Man ka Supiak. Caliak lah dek Upiak a… ancak bana lapiak e raso di Surau Jumaik di Kampuang wak nampak dek Uda, Piak!. Iyo da, Musajik ko ndak da?

Dek ragu jo malu batanyo, di tambah jo urang nan sangaik rami nyo dalam bioskop. Nan si Man mulai ganta-ganta takuik. Bukak tarompa piak? Ndak buliah jalan di lapiak pakai tarompa doh. Badoso awak. Nan dek Supiak lugu… iyo lah di bukak e pulo tarompa ko.

Urang nan rami tadi.. di salami lah dek Si Man ciek-ciek dek kabiasoan Si Man kutiko di kampuang, di Surau Jumaik kalau masuak musajik iyo basalam jo jamaah nan lain. Urang lain nan manonton takajuik mancaliak Si Man tadi, di sangko e si Man Iriak jo Supiak Onjai ko mancari bangku tampaik duduak e. dek Si Man lah manyorongkan tangan, tu panonton nan lain sato pulo manyorongkan tangan bitu lah sampai ka bangku paliang bulakang. Di salami dek Si Man Iriak jo Supiak Onjai kasadonyo.

Mancaliak kajadian nan bak kian, taheran-heran lah padusi panjago bioskop nan di dalam. A kolah nan dikarajoan dek urang nan baduo ko. Sajak tadi baputa taruih sajo, sajak dari bawah sampai ka ateh. Indak basuo kolah kurisi tampaik duduak e, pikia padusi tadi dalam ati.

Dek si padusi panjago bioskop ko, di sonsong lah si Man jo Supiak tu ka bulakang. Maap da….kato padusi cako. I yo ado apo yo diak…. Jawek si Man jo batanang. Biko da… kato padusi tadi, apo uda alun basuo jo tampaik duduak uda? Sambuang padusi tadi. Kurisi nan ma? Ado pulo ba nomor tu? Tanyo Si Man. Iyo lah da… kok indak tu tampaik duduak urang nan uda duduki bangih urang beko da. Ooooo bitu…. Bialah beko ambo urus. Sabagai urang nan baru datang indak elok raso nyo ambo indak manyudahi salam ambo jo nan dulu datang. Dima latak raso jo pareso awak diak kato Si Man Iriak.

Iyo… da batua uda tu.. kalau uda jadi tamu yo basalam jo tuan rumah da. Tapi ko dibioskop da. Ndak ado nan jadi tamu dan indak pulo ado tuan rumah e da. Urang sadang asik manonton tagaduah dek uda nan ka lai nyo da. Maengong-engog urang dek uda bajalan sambia basalaman tadi.

Labiah parah nyo da, sabanta lai pilem ko abih da. Nan uda masih juo nak basalaman. Jadi a nan ka uda tonton sabananyo ko da? Atau memang uda baniak basalaman sajo di bioskop ko? Tasarah uda lah.

Eeeee pam pam. Baa indak bakecek an dari tadi diak…… tu a nan ka uda samo Supiak caliak lai ko… ? kok bakecek an dari tadi tu lah duduak santai uda mancaliak pilem diak? Baa kok awak pulo nan uda pam pam kan? Lai batanyo uda ka awak tadi tu? Sabalun masuak jo mancari tampaik duduak? Indak kan? Uda langsuang sajo manyorong cando piluru badia balansa. Wak sangko. Uda lah acok masuak bioskop, tu mako nyo wak padia sajo.

Ondeh…diak kanduang… kok kadi kecek an bana lah ka adiak. Salamo iduang uda ditampuah salemo jak ketek diak. Iyo iko baru uda masuak bioskop diak… salabiah nyo layar tancap se nan tau uda nyo diak. Tapi a nan tajadi kini diak! Uda salasai basalam nan pilem ko lah habih pulo. Yo lah malang nasib uda jo uni mah diak. Ka baa juo lai.

Jo parasan malu bacampua paneh ati, dek gara-gara indak jadi manonton pilem. Di pacik tangan Supiak Onjai dek Si Man Iriak dibaok kalua. Maaf uda piak! Salah Uda Piak! Uda sangko tadi tuan rumah tu, kiro nyo urang nan banyak tu samo-samo panonton jo awak. Molah kito pulang, beko di tingga kan kuretapi wak. Pek lah da pulang wak li. Bisuak-bisuak kok li ka razaki wak ka siko baliak pai manonton.


Wartawan : Bahren
Editor : Bahren

Tag :#Garah #Minang