HOME LANGKAN TINGKOK


  • Selasa, 26 November 2019
Pangian
TINGKOK

Pangian

di Luhak Tanah data

Oleh: Bahren*

 

            Yo lah lamo indak ka rimbo, batang kayu lah gadang-gadang. Yo lah lamo indak bacurito, kini ko dicubo juo maulang-ulang. Diulang sajamang lai, kisah curito rang daulu tantang asa sarato usua mangko nagari kini banamo nan bak nangko. Adopun kisah nan ka diurai iyolah curito tantang sabuah nagari nan banamo Pangian. Manga kok banamo pangian danga dek sanak lah kisah nyo simak kan bana lah curito.

            Bakisahlah pado maso itu, baliau Pak Khaidri A.P Katua KAN jabatan liau maso itu kutiko kami datang manjalang di tanggal lapan baleh bulai Mei, tahun duo ribu tujuah. Limo puluah umua liau maso itu, wakatu bakisah kabakeh kami tantang asa sarato usua mako nagari banamo Pangian.  Mako nagari banamo Pangaian, adolah pado maso itu, sarombongan niniak moyang kami sampailah di sabuah tampek nan di sakitaran tampek nantun ado sabuah ngalau atau guo kato rang kini.

            Supakaik lah niniak kami maso itu, untuak manetap di guo nantun sarao manjadikan ngalau tadi tampek hunian atau pahunian caro rang di siko. Di ngalau itu lah sagalo karajo dimulai dek niniak muyang kami, sajak dari maolah tanah untuak ka digarap hinggo bacocok tanam di sakitaran pahunian nantun. Limbak nan dari pado itu, salain bacocok tanam sarato batani niniak moyang kami juo manangkok ikan di sungai nan mailir di dakek ngalau nantun.

            Habih hari baganti hari, hari balalu ulan pun datang, taun pun baganti pulo. Batambah rami juo lah niniak moyang kami ko. Mako kalua lah niniak kami tadi mambukak parumahan jo paladangan nan baru, samantaro itu kini, daerah nan parnah jadi tampek pahunian tadi di sabuik lah jo Pangian nan asa nyo dari Pahunian. Ngalau nan ado di dakek pahunian nantun disabuik lah jo ngalau pahunian. Sabuah lubuak pun ado di dakek Sungai nan ado di dakek ngalau tadi. Di sakitaran lubuak nantun banyak lah tumbuah batang-batang kayu gadang nan kayu nyo dijadikan kapambuek rumah dek niniak moyang kami, mako sakarang iko kini pamukian nan kayunyo diambiak dari lubuak nan banyak batang kayu nyo tadi dibari namo lah Lubuak Batang.

            Ado pulo pamukiman nan babantuak koto-koto, ado koto nan kaciak sajo mako dibari namo lah tampek nantun jo sabutan Koto Kaciak, samantarao itu kini koto nan agak gadang dibari namo lah jo Koto Gadang. Pambarian namo tadi iyolah sangaik sasuai jo palsapah urang awak ko urang minang kato urang, a bana palsapah nyo iyolah Alam takambang jadikan guru. Ado pulo sabuah lai, daerah kapuang na lataknyo di paladangan mako dibari namolah kampuang tadi jo namo Kampuang Sawah. Daerah pasawahan nan banyak batang tago palange mako dibari namo lah daerah nantun jo namo Tago Palange. Ado pulo sabuah lai daerah nan manjadi patamuan duo aliran sungai nan datang dari ngalau pangian sarato Tigo Landai banamo lah daerah tu kini jo Patameh. Itulah kisah nan ambo danga dari niniak kami nan daulu sarato urang nan tuo-tuo nan ado di kampuang nangko. Carito niniak kami dulunyo niniak moyang kami rang Pangian asanyo dari Bungo Satangkai, suku kami di Pangian nangko ado nan basuku Caniago, ado pulo suku Malayu, Mandahiliang jo Pangian Kacoak, Suku Bajo Baliang jo Patopang, Tapi Ayia jo Suku Guci.  

 

 

*Dosen Sastra Minangkabau Universitas Andalas


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau