HOME LANGKAN CARITO


  • Jumat, 8 Maret 2019
Padieh
Carito

Padiah

Bahren
Padiah... 
Agiah taruih...
Ampai...
Kato-kato tu acok tadanga sapanjang patandiangan sipak bola tadi malam. Asa Ronaldo nan Dapek bola panonton langsuang basorak, agiah taruih nal, arak bola e mesi, Ampai ..., masuak an ka ka gawang tu bia Goooool.  

Tangiang-giang dek Mak anang sorak sorai urang nan ado di Kadai si Pudin tadi malam kutiko manonton bola basamo-samo. Manga lo padiah lah nan di sabuik-sabuik dek panonton nan banyak tu, padoan si Ronaldo nan mambaok bola di lapangan indak ado bagai tabariang dek rumpuik sianik bagai doh. Nan panonton tatek sajo mangecek padiah. Padoan sasudah dicaliak jo disigi-sigi dek Mak Anan. Arati padiah dalam Bahaso minang dalam kamuih hanyo ado duo nan partamo padiah aratie pedih (dalam bahaso Indonesia) bahkan dalam contoh pun dituliah Matonyo padiah dek kanai aia sabun (matanya pedih kena air sabun). Nan kaduo padiah aratie (sedih dalam bahasa Indonesia). Contoh nan di kamuih di tulis Padiah hatinyo mandanga sindiran tu (sedih hatinya mendengar sindiran itu). 

Indak juo abih pangana dan maraso pueh sarato sajuak dikiro-kiro Mak Anan pun batanyo ka dotor Cika, dotor nan paham jo bahaso minang karano sikola S3 nyo tantang bahaso Minang. O dotor Cika, Baa kok salamo manonton bola tadi malam, banyak panonton nan basorak padiah kutiko Ronaldo barasil mangicuah jo mangilik lawan main e di lapangan. Heran Ambo dotor...padoan si Ronaldo ndak ado kanai rumpuik sianik bagai, indak pulo kanai jilatang ayam di lapangan tu do dotor, tapi nan panonton basorak padiah juo. Tolong lah ambo dek dotor jo ilimu dan pangatahuan nan dotor punyo tantang itu.
Inyo biko mak Mak, indak kasado e nan awak danga sacaro langsuang itu bisa wak caliak aratie dalam kamuih doh mak, kok mamak caliak di kiamuih baso Minang, memang padiah tu arati e jikok indak sakik, kalau indak itu sadiah. Tapi mak, samantang pun  baitu. Dalam babahaso ko, awak rang minang ko kan banyak pulo ragam jo caro urang manyampaikan raso hati e tantang nan dicaliek jo di danga e mak. 

Kato padiah bitu pulo Mak, kok diaratian manuruik kamuih yo ndak masuak e doh mak, kutiko sadang mancaliak tandiang bola jo manonton saluang. Padiah di situ bisa jadi sabantuak luapan parasaan gadang hati, nan manonton jo mancaliak partandingan tadi. Padiah di situ bisa di aratian rancak bana karano kehebatan ronaldo mangilik ampek urang pamain lawan, mantap karano indak banyak pamain bola nan bisa cando Ronaldo tu.

Atau padiah bisa juo diaratian sacara panuah patandiangan sipak bola tu memang sasuai jo harapan urang nan manonton. Bitu manuruik ambo Mak, tarang dotor Cika. Kiro-kiro baa dek Mamak tu, lai ko lah mamak paham jo nan ambo sampaikan?. Oooo bitu pulo tu yo dotor, jadi kalau ambo kecek an kini ko yo padiah pulo panjalasan dotor tantang itu. Sabana pueh ambo jo panjalasan dotor tu. Ampai dotor...., Agiah taruih..... bibilo e ambo  ka batanyo juo baliak ka dotor a. Ambo baharok bana tantang itu dotor, karano banyak juio diantaro anak kamanakan awak kiniko lah jarang, wee tu mandanga kato-kato nan tadi tu, kalau pun lai mandangan mareka tu sakedar sato-sato basorak se nan banyak tampak dek ambo dotor. Banyak juo nan indak tau jo mukasuik a nan dikatoan nyo. Mudah-mudahan ilimu dari dotor ko baguno pulo untuak rang banyak. Sakali lai tarimokasih Dotor. 

(Bahren, (Dosen Sastra Minangkabau FIB Unand)


Wartawan : Bahren
Editor : TE

Tag :Carito Minang #Bahaso Minangkabau