HOME LANGKAN TINGKOK


  • Senin, 4 November 2019
Padang Laweh
TINGKOK

PADANG LAWEH

DI LUHAK TANAH DATA

OLEH: BAHREN*

 

 

Alai-alai tabang ka alai

Tabang lah pipik duo tigo

Kaba lah lamo tabangkalai

Kini diulang-ulang pulo

 

Anak urang oi Padang Panjang

Pai ka pasa tagageh gageh

Apokoh kaba nan ka diulang

 Curito tantang Padang Laweh

 

Bakabalah liau Datuak Sari

Bakaba ka Ivan Adilla

Apokoh surah nan lia bari

Simak kan malah dek pembaca

 

Tanggal duo puluah limo di bulan Mei dalam tahun duo ribu tujuah, datanglah Ivan Adillah dari Padang mahadok ka liau Mak Abu Bakar Datuak Sari. Anam puluah umua Mak Datuak Sari wakatu itu, kutko Ivan datang manyilau ka rumah liau di Rumbai. Apokoh mukasuik nan dibaok dek Ivan Adilla sarato kawan dari jauah datang kamari, bitu bana tanyo Mak Datuak. Iyo dagang mukasuik nan Kami baok ko Mak Datuak, datang mahadok ka mamak nak batanyo sarato mintak di surahkan, manga ko nagari banamo Padang Laweh. Tolong dek Mamak jo bicaro, bia nak sanang ati kami, untuang manjadi amal ibadah dek kito samuonyo di kudian hari.

Jikok itu nan ka dimintak, kok lai kandak buliah pintak ka balaku, bialah ambo curai papahkan bagulambek sado nan ambo dapek dari curito niniak sarato mamak langkok rang tuo-tuo nan dahulunyo. Biko curito nan ambo danga, simakkan molah elok-elok dangakan bana baiak-baiak. Mako nagari banamo Padang Laweh biko malah curitonyo. Adolah pado maso dulunyo, niniak muyang rang Padang Laweh ko sampai lah di sabuah tampaik. Tampaik tu iyolah sabuah padang nan sangaik laweh nyo. Laweh nan indak alang kapalang, sasauik mato mamandang bitu bana ka laweh an Padang nantun.

Dek lamo lambek bajalan, mako diputuih lah dek niniak moyang kami untuak baranti dan manetap di siko. Abih hari baganti hari, abih hari baganti minggu. Minggu lalu bulan pun datang, urang batambah rami juo. Dek ueang lah batambah rami, mako tampek manetap tadi dibari namo lah Padang Laweh nan aratinyo tanah nan sangai lawehnyo. Limbak nan dari pado itu, ado pamukiman nan lataknyo agak ka ateh dari Padang Laweh ko dibari lah namo tampaik nantun jo sabutan Kapalo Koto, ado pulo pamukiman nan talatak di tangah, mako dibari namo lah daerah nantun manjadi Tangah.

Ado pulo sabuah lai, masih di Padang Laweh nangko, ado sabuah daerah nan banyak tumbuah batang rambai (Scirpodendron ghaeri), mako dibari namolah daerah tu kini banamo Rambai. Samantaro itu, ado pulo sabuah tampaik nan banyak tumbuah batang sari bulan, sajinih baringin caro rang kini, dibari lah dek niniak moyang kami daerah nantun jo namo Sari Bulan. Sabuah lai nan ado di Padang Laweh nangko, sabuah Tanjuang nan dijadikan sawah mako sawah di Tanjuang tadi disabuiklah tampek tu inggo kini jo Tanjuang Sawah.

Bitulah kisah jo curito nan ambo tarimo, dari rang tuo-tuo nan daulu. Kok ado kaba sarato curito nan bana, sungguahnyo kabanaran datang dari tuhan, Allah ta’ala kayo sungguah tampek ilimu bahimpunnyo. Kok ado curito ambo nan salah, salah nan datang dari ambo. Ambo nan hanyo manusia, tampek salah jo gawa bakumpuanyo. Itulah kato nan disampaikan dek baliau Mak Datuak Sari. Samo-samo ka Tuhan kito mamintak ampun Mak Datuak, samo-samo ka manusia, maaf di pinto. Tolong dek dunsanak maaf dibari.    

 

 

*(DOSEN SASTRA MINANGKABAU FIB UNAND)


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau