HOME LANGKAN CARITO

  • Kamis, 27 Februari 2020
PITUAH KUCIANG II
Carito

PITUAH KUCIANG II

(MANCIK SIKUA USAH DIABIHKAN)

OLEH: BAHREN*

 

         Sasudah pueh bacarito jo maota-ota tadi malam. Banyak sungguah ota nan alah dibicarokan dek anak jo induak kuciang nantun. Mako, sampailah ka sabuah kasimpulan dek anak-anak kuciang tadi, sarancak-rancaknyo manjadi bulan panuah, awan itam, angin limbubu, bukik nan gadang, kabau sarato mancik, iyo labiah ancak juo awak manjadi kuciang lai. Karano alah takadia kandak Allah. Mako limbak nan dari pado itu, syukur iyolah kato kunci untuak sagalonyo. Syukuri apo nan alah diagiah sarato di takadiakan dek Allah untuak kito. Sapakaik lah kaduo adiak baradiak kuciang tadi untuak tatap manjadi kuciang. Disampaikannyo lah ka Amak nyo baso inyo akan manjadi kuciang nan elok untuak induak samangnyo, urang nan punyo rumah, nan alah maagiah nyo makan sarato tampek balinduang salamo ko. Mandanga kecek nan bak kian, sanang malah  ati Si induak kuciang.

         Takana pulo dek induak kuciang, nak bapitaruah kabakeh anak, jikok iyo anak nyo, ka manjadi kuciang nan elok laku. Mako, diimbau lah anak nan sapasang, bak cando anak balam. Oi nak kanduang sibiran tulang, duduak kamari malah anak ado sabuah ka Amak sampaikan. Mandanga imbau dari amak basugiro lah kaduo anak kuciang tadi. Apokoh mukasuik Amak maimbau kami, mako kami sugiro datang. Takana dek badan diri amak Nak, dek kalian alah mulai gadang sarato lah baniat ka manjadi kuciang nan elok. Mako ado sabuah pasan Amak, nak oi. De badan Amak alah samakin bangkeh juo. Apokoh pasan nan ka amak sampaikan, sabuik kan malah dek Amak kanduang, bia nak kami dangakan baiak-baiak, kami simakkan elok-elok. Mandanga kato anak nyo tadi, mako sananglah dalam ati, sajuak di dalam kiro-kiro. Ado pun pasan Amak ka kalia baduo, biko bana bunyi pasannyo “Mancik sikua usah diabihkan” kok kalian lai ka tatap tingga di rumah nangko. Jikok itu pasan Amak, itulah pasan nan sabananyo, ka kami ingek jo kami kana sampai bilo-bilo indak ka lupo.

         Sasudah mandanga pasan jo amanat dari Amak nyo, mako pai lah bajalan-jalan anak kuciang tadi sakuliliang rumah. Adopun mukasuik jo tujuan nyo iyolah manjago rumah dari gangguan mancik. Dek anak ado baduo, mako duo pulo makna nan dapek dek anak nyo.

         Jikok dicaliak ka anak nan gadang, dalam manangkok mukasuik pasan amak nyo, lah diburu nyo sagalo mancik nan ado, tapi ado saikua ditinggakannyo. Nan saikua kolah mukasuik nyo indak diabihkan. Jikok nyo abihkan ka sadonyo mako nyo badan dirinyo indak ka tapakai lai di rumah nantun. Indak ado lai mancik nan kadiburunyo, baiak lah ambo tinggakan mancik ko agak saikua. Bia tapakai juo badan diriko. Bitu bana makna nan dipagang taguah dipacik arek dek anak kuciang nan gadang, sahinggonyo inyo disayang dek nan punyo rumah. Asa malam alah tibo anak kuciang nan gadang ko lah sibuk mangaja mancik nan tingga sikua tadi. Bitulah karajonyo tiok malam.

         Baraliah curito ka nan ketek, lain pulo makna nan dibari nyo untuak pasan mandeh kanduang. Sagalo mancik nan ado abih diburu jo dilalahnyo. Sasudah mancik ko dapek, mako di lapah dan dimakan lah mancik ko dek kuciang nan ketek ko. Tapi, dek ingek jo pasan mande, mancik sikua usah diabihkan, mako indak dimakannyo pulo mancik nan tatangkok tadi kasadonyo, sakarek bagian badan ka bawah, atau sakarek badan ka ateh tatap sajo ditinggakannyo. Itulah karajo nyo tiok hari. Mancaliak nan bak kian sanang malah nan punyo rumah, lai barakaik mamaliharo kuciang. Tatap sajo ado atiok malam mancik nan dapek. Ado pulo bukti kuciang ko lah bakarajo. Sakarek dari badan mancik ko, tagaletak di laman rumah. Walalu awak harus mambarasiahnnyo tiok pagi, tapi sanang ati indak tabedo dek mandapek kuciang nan panamuah jo mancik.

         Itu malah karajo  si anak kuciang satiok hari, nan sikua bakaja-kaja jo mancik nan ditinggakannyo nan sikua lai, makan saparo badan mancik. Samo sanang lah anak kuciang tu  kaduonyo, dapek induak samang urang nan punyo rumah elok bana.  

 

 *DOSEN SASTRA MINANGKABAU UNIVERSITAS ANDALAS


Wartawan : Bahren
Editor : bahren

Tag :# Langkan # curito #minang