Ngangak !!!

Ngangak!!!

Oleh: Bahren*

Ngangak! Itulah kato nan paliang tapek den agiah untuak manyabuik paja tu, lai jaleh dek Ang tu Din, kato si Man Tiko ka Sudin Patai. E…e…e manga ang Ko Man, pagi ari baru lah ang katoan den ngangak. Apo nan katuju dek ang, ka bagian pipi ang nan ma ka den lakek an tangan den ko ancak e. tunjuak an lah ka den Man. kato Sudin Patai menyemba langsuang sajo. Indak!…indak ang nan den katoan do Din, tapi paja tu. Paja nan batamu jo den di lapau Supiak Antok pagi tadi. Paja nan ma lai Man?, banyak bana lawan ang nampak di den Man. Lai ka panjang umua ang ko, sabalik lawan ang kini. Rusuah ati den mandangan e Man. Kok ndak basuo den jo ang bisuak li. Bato

Din, ang pasaruik an den mati capek yo, kato si Man Tiko bagageh. Danga dek ang lu Din, baa kok ndak ngangak den katoan paja tu dek ang Din. Danga dek ang dih. Partamo. Lah den katoan karajo e ko salah dan harus nyo ulang indak juo dikarajoan e. Dek itu nan partamo den anggap sajo itu mungkin latihan dek e, masih baarok den karajo nan ka datang diubah e.

Indak do lamo sudah tu, aden lo nan di imbau e. dikecek an nyo pulo aden malangga aturan induak samang-anakbuah, dek gara-gara menyawak a nan dikarajoan e. Lah dikapuang e pulo den jo kangkawan e. di tuduah e den lah babuek indak dalam tugas jo kapasitas den tiko itu. Tapi den masih juo manarimo tu, karano inyo ko kan induak samang den mah din.

Nan kaduo danga dek ang Din, lah jaleh urang lah heboh pakaro uang lembur nan alun juo jaleh ujuang pangka nyo. Induak samang den ko sibuk juo baru jo curito urang nan mambocorkan rasio negara. Lain nan sakik lain nan diuruik e dek nduak samang den ko. Indak nan ado dimuko e nan disalasaikan e, nan lain nan diurus e. Kiro-kiro dek ang din a kato nan cocok untuak e tu, ndak ngangak nan cocok dek ang tu Din.

Lah..lah.. lah pueh ang berang-berang? Manciracau bak cando buruang barau-barau. Aden lo nan mangecek lai. Ang berang ka induak samang ang, tu ka den ang ampeh kan. Lai ndak samo lo ang jo induak samang ang tu?. Lai jaleh dek Ang Man Nan namonyo induak samang ko pasal nan laku deknyo duo nyeh. Pasal satu e, induak samang salalu batua, pasal nan kaduo jikok induak samang salah  babaliak ka pasal satu tadi.

Tapi biko lah Man. kalau ka den ang mintak pandapek Man. Saran den ciek nyo Man. Kalau lah bitu sipaik jo kurenah nyo ancak ang jan lamo-lamo jadi anak buah e, dari pado turun lo panyakik e ka ang Man. Panyakik a din? Aaaa.. baru den katoan baru. lah mulai senek-senek ang jawek warih induak samang ang tadi. Ngangak! Lai jaleh dek ang.     

*Dosen Sastra Minangkabau FIB Unand