HOME LANGKAN PANTUN

  • Kamis, 26 September 2019
Nan Bana Bak Cando Gatah
Pantun

Nan Bana Bak Cando Gatah

Karya : Yasin Habibillah Pratama

 

Lah liruih kato jo tindakan

Lah bulek suaro dek piliahan

Nan niaik untuak maubah seso

Lah busuak badan menangguang baban

Sasak didado lah maantam

Takuik jo tungkek pambaok rabah

Jikok basanda patah pagangan

Iyo kok salah, manga dipatuduahi

Nan bana diampok kayu

Nan salah malah disanjuang

Dima minyak ndak ka bapisah jo aia

Sadangkan asa ndak ka barubah lai...

 

 

Lusuah Baju Dek Manunduak

Karya : Yasin Habibillah Pratama

 

Alah tagak si matohari

Nan ubun lah manggalagak

Dek tarang yo sapatagak

Baju lusuah panuah dek luluak

Karingek bialah den minum

Pangganti latiah sakujua badan

Indak pitih nan ka diharok

Kanyang di anak yo nan kasanang

Bialah luko lambuang manahan

Asakan jantuang indak kalansangan

Sungguah pitaruah nan nyo hadang

Bia nak sanang, harok di kamudian

 

Dek Mamak, Kamanakan Mati

Karya : Yasin Habibillah Pratama

 

Indak surek nan ka dibantai

Yo dek hiduik nan marasai

Pangana hati yo nak kasanang

Hiduik mularaik apo nan ka di bantang

Kasiah ka anak indak tausai

Jo kamanakan baiak mukasuik

Yo bijak sarato pandai

Mamutuih kato nan balawan

Disitu kasiah tak nampak

Balaian anak yo ka mambaok

Kok kamanakan usah di cigok

Nak bia langang di lumbuang

Nan sawah abih tajua

Kok anak babaok gala

Nan kamanakan alah  taelak

Bia mati di baliak rangkiang

Manahan seso luko di dado

 

 

Penulis adalah Mahasiswa Sastra Minangkabau FIB Unand


Wartawan : Yasin Habibillah Pratama
Editor : bahren

Tag :# langkan # Pusi # Pantun # Minang