HOME LANGKAN TINGKOK

  • Senin, 8 April 2019

Nagari Barulak

TINGKOK
TINGKOK

Nagari Barulak

di Luhak Tanah Data

Oleh   Bahren*

           

Oi Barulak di tanah data

Dalam wilayah tanjuang baru

Oi Di aliah pulo malah kaba

Asa usua nagari  baru

 

Apo nagari nan ka disabuik

Nagari barulak lah namonyo

Untuang kok lai sampai mukasuik

Oi Manjadi amal  lah andak yo

 

Amal dek urang bacarito

Amal dek kito nan mandanga

Masuak sarugo ka sadonyo

Indak Do Surang oi nan tingga

 

Baramolo kisah ka diurai dek Baliau Pak Ali Usman bagala Datuak Tumangguang. Anam puluah ampek umua liau kutiko itu, sangkek manjadi Wali Nagari Barulak. Kaba ko liau sampaikan kapado Ivan Adilla, di tanggal 19 bulan Mei tahu 2007. Di Barulak kutiko itu, Datuak Tumangguang bacurito.

Adopun curito nan liau sampaikan baa nagari banamo Barulak. Ado lah pado suatu wakatu, sampailah niniak sarombongan dari sabuah tampek, untuak mancari tampek tingga jo manetap. Sasudah dicaliak dipandangi, tampek ko sasuai untuak pamukiman sarato bacocok tanam. Baranti lah niniak wakatu itu, di tapi batang aia nan ado di sakitar nagari iko kini. Tapi ado nan istimewa jo nagari ko, aia sungainyo mangalir sangaiklah kancang sarato lancar, tapi tapek di nagari ko aia sungai tahanti dan babaliak arah dan kamudian mailia baliak ka arah nan balawanan. Karano balawan arah, ilia nyo aia dari samulo urang dulu manyabuik nyo jo Barulak, inggo kini baitu juo.

Makin lamo urang samakin banyak daerah bamukim di sabuik jo koto, kok nyo talatak di katinggian mako banamo lah daerah tu jo koto tinggi, inggo kini manjadi salah sabuah jorong di Barulak. Ado juo ciek lai, koto nan wilayah nyo labiah kaciak dari nan lain, tasabuik lah koto nantun jo namo Koto Kaciak.

Samantaro itu, ado polo koto nan latak nyo mamanjang di nagari barulak, mako pakumiman nan latak nyo mamanjang tadi dibari namo jo Koto Panjang. Adopun daerah nan partamo dibukak dan di tunggui, untuak bamukim jo batani niniak kito manyabuik nyo jo Koto Ranah. Ado  pulo ciek daerah nan banyak ditumbuahi dek batang Aua, sajinih tinaman bambu lah agak nyo. Daerah nantun inggo kini dibari namo Aua, karano aua nan banyak indak alang kapalang di tampek tu.

Labiah lanjuik Baliau, Ali  Usman Datuak Tumangguang bacurito kutiko itu, dari warih nan ambo jawek, curito nan ambo tarimo dari niniak moyang dan urang tuo-tuo daulu Urang barulak ko ado ampek suku nan gadang di nagari ko. Adopun suku itu adolah Suku Mandahiliang, Suku Kutianyia, Suku Payobada jo Piliang. Baitu lah curito nan batarimo tantang asa jo usua nagari Barulak, dari Baliau Ali Usman Datuak Tumangguang. Kok nyampang tasabuik di nan bana, sungguahpun kabanaran datang dari tuhan Allah taa. Jiko Tasabuik di nan salah, silap jo salah sipaik manusia ka urang banyak ambo mamintak maaf kapado tuhan ambo maminta ampun. 

 

*Dosen Sastra Minangkabau FIB Unand

 


Wartawan : Bahren
Editor : Bahren

Tag :# Langkan # Tingkok # Asa Usua

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com