HOME LANGKAN TINGKOK

  • Senin, 1 April 2019

Nagari Balimbiang

TINGKOK
TINGKOK

Nagari Balimbiang

di Luhak Tanah Data

Oleh   Bahren*

        

Balimbiang jo bukik bunian

Bukik Nyaru jo sawah kareh

Pado Malam jadi rasian

Di kabakan  bia nak jaleh

 

Rumah kampai di Balimbiang

Baratuih tahun lah umuanyo

Dek nan tau tolong lah bimbiang

Ka unduang-unduang ka sarugo

 

                Kalau dikaji-kaji bana, tantang asa jo usua nagari nangko baa banamo Nagari Balimbiang dalam Luhak Nan Tuo, di Tanah Data malah tapeknyo. Ado pun kaba nan kami danga dari baliau  S. Datuak Rajo Mangkuto. Anam puluah umua liau kutiko itu, Tapeknyo bana ditaggal 30 bulan Mei tahun ,Z2007. Mak Datuak Rajo Mangkuto kutiko itu manjabat sabagai katua Karapatan Adat Nagari Balimbiang. Curito ko liau sampaikan ka bakeh Zuriati di Nagari Balimbiang maso itu.  

                Balambek-lambek liau bakisah. Niniak jo moyang urang Balimbiang ko asanyo bana datang dari Pariangan sacaro batahap. Dek lamo lambek bajalan dari Pariangan, mandaki bukik jo manuruni lambah-lambah nan ado untuak, mancari tampaik bamukim nan baru. Mako dek litak jo latiah salamo bajalan, Baranti lah baliau niniak kito ko di sabuah tampek.

                Sambia malapeh lapeh rangah, di tampek niniak bakumpau tu tampaka lah sabatang tinaman nan sadang babuah sangaik labeknyo. Saliang batanyo lah niniak ko kutiko itu, apo garan namo buah tu? Kina atau Balimbiang ko kato niniak kito ko? Mako dicubolah mamakan buah nantun. Tanyato rasonyo masam alang kapalang, mako sapakaik lah maagiah namo buah tu jo Balimbiang dek asamnyo. Dek masam buah tadi dibuanglah buah nantun ka batang aia nan indak jauh dari batang balimbiang tu. Anyuik lah buah tadi ka ilia batang aia. Dek lamo jo lambek makin rami juo lah tampek niniak moyang ko parnah makan Balimbiang tadi. Mako dinamokanlah tampek niniak moyong partamo makan balimbiang ko daerah nyo jo Balimbiang.  

                Samantaro itu rombongan nan lain, dari niniak kito ko bajalan, manyisi batang aia, dalam pajalanan basuolah jo buah nan mirip jo balimbiang tadi. Mako dimakan pulo lah buah tadi. Tapi raso nyo indak masam tapi paik. Baa raso buah tu kato niniak nan lain, raso Kina Wai. Kina ko sangek paik raso nyo. Mako tampek niniak ko makan buah nan rasonyo paik cando buah kina tu sampai kini banamo Kinawai gabuangan dari kato kina dan wai (sabutan untuak urang yang labiah tuo).

                Kisah nan lain juo dicuritokan dek Mak Datuak Rajo Mangkuto. Ado juo nan mangatokan baso nagari ko banamo balimbiang karano niniak moyang kito wakatu itu mambarasiahan tampek untuak ka bamukim tu lah pakai lambiang, sajinih alaik nan biaso digunokan untuak marambah jo manabang sarato mambuek lubang sasuatu. Jadi niniak ko mambukak lahan tadi ba lambiang atau manggunoan lambiang. Dek lamo kalamoan mako di sabuiklah nagari nan dibukak manggunoan lambiang tadi atau ba lambiang tadi manjadi nagari balimbiang.

                Dek panduduak samakin rami juo, mako makin lamo nagari samakin sampik. Mako dibukaklah tampaik-tampaik nan baru nan kadijadikan tampek tingga. Tampek niniak kito nan partamo sakali didiami banamolah tampek tu jo Koto Tuo aratinyo bana tampek tingga paliang tuo di antaro nan lain.

                Tampek-tampek dibukik-bukik sakitaran nagari ko yang samolo dijadikan tampek rapek jo mancari mupakat, kamudian hasia dari mupakat tu di saruan (diimbaukan) ka sakaliliang kampuang mako banamo lah tampek tu ju namo Bukik Nyaru.  Salain disaruan jo disorakkan hasia rapek tadi ado pulo nan manyampaikannyo malalui bunyi-bunyian dari alat-alat dari kayu dan lainnyo, mako banamo lah tampek tu jo Bukik Bunian.

                Samantaro itu, tampek masyarakat basawah di tanah-tanah nan agak kareh banamo lah daerah tu jo namo Sawah Kareh. Tapi samantang pun baitu, dek ado duo mode curito nan liau danga dari niniak nan daulu, Mak Datuak mangatoan curito nan partamo labiah ditarimo dek masyarakaik kami kiniko dari pado curito nan ka duo. Masyarakaik Nagari Balimbiang ko asanyo dari Pariangan Padang Panjang suku-suku nan ado di nagari ko Bodi, Caniago. Simabua jo Suku Kampai. Bitulah curito nan didapek dari Mak Datuak Rajo Mangkuto mudah-mudahan curitoko manjadi palajaran jo padoman dek anak cucu kito isuak kato mak datuak. Aaamin. 

 

*Dosen Sastra Minangkabau FIB Unand


Wartawan : Bahren
Editor : Bahren

Tag :# langkan #tingkok #asa #usua #nagari #minangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com