HOME CELOTEH PROVINSI SUMATERA BARAT

  • Rabu, 3 Oktober 2018

Medsos Lah Jadi Rajo

Indonesia dihoyak dek duo kejadian gadang. Patamo gampo di provinsi Sulawesi Tangah, kaduo dek berita bohong (hoax) dek Ratna Sarumpaet. Soal gampo lah jaleh bana kejadian jo penanganannyo.

Tingga soal kaba kicuah bu Ratna ko lai. Mulo mangaku babak beluar dikeroyok, barubah jo operasi sedot lemak. Sampai ujuangnyo minta maaf. Masalah ko alun bisa salasai lai, karano ado nan malaporkan Ratna ka Polisi karano menyebarkan hoax. Sampai-sampai kalah pulo berita penanganan gampo di Palu, Sigi jo Donggala nan lah mamakan korban labiah dari saribu ampek ratuih urang.

Dek berita hoax Ratna Sarumpaet (RS) ko, heboh umat nan punyo medsos. Macam-macam analisanyo karano dikaik-kaikan jo pemilihan presiden sarato pemilu, bulan April 2019. Kaik-mangkaik ko mako jadi panjang carito.

Ado nan mambuek tulisan, "cukuik sakali ko kanaik kicuah." Antah bilo pulo nyo baurusan jo RS.

Ado pulo nan manulih, "iko sabana ratu hoax sejagat." Pokoknyo isi medsos lah soal si RS sadonyo atau umumnyo, mulai dari facebook, twitter, sampai WA, langkok jo gambar-gambar RS, atau istilah kini meme.

Disiko nampak medsos nan dimiliki satiok urang ateh namo pribadi, lah co rajo di alam maya. Urang maleh mambaco media massa koran, mandanga radio, nonton tipi, tamasuak mambaco media onlie. Nan paralu main medsos, caliak perkembangan, maota jo kawan, badebat soal capres sarato kirim-kirim video bagai.

Sasuai bana jo kecek Gubernur DKI Jakarta, Anies Baswedan, masyarakaik kini minat mambaco tinggi (mambaco medsos mukasuiknyo) tapi daya atau sumangaik mambaco randah (mambaco buku). Ka manga wak lai, memang co itu pulo keadaan ummat kini.

Bisuak ko, hari-hari manjalang pilpres jo pemilu, rasonyo parang komentar, parang gambar sarato debat di medsos antaro pendukung A jo pendukung B batambah manjadi-jadi mah. Nyo anggap manang parang di medsos, tando ka manang pulo di pilpres. Padohal itu alun tantu lai.

Pasan ka awak nan ndak sato mendukung ko, jan sato-sato pulo menyebarkan berita, gambar, atau video di medsos nan alun tantu salah jo bana nyo. Mudah-mudahan tanang hiduik wak dari persoalan nan marusak pangana wak. 

Ancak dipabanyak dzikir, shalat sunat jo mangaji lai. Yo ndak sanak.

Wassalam. 

 


Wartawan : Batuah
Editor :

Tag :#medsos#jadirajo#

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com