HOME LANGKAN PEPATAH


  • Minggu, 4 Agustus 2019
Manjangkau Sarantang Tangan
Pepatah

Manjangkau Sarantang Tangan

Mamikua Sakuaik Bahu

Malompek Saayun Langkah

Bakato Sapanjang Aka

Oleh: Eka Meigalia

Dosen Sastra Minangkabau FIB Unand

 

Kato manjangkau kato dasarnyo iyolah jangkau. Jangkau ko aratinyo manuruik Kamus Besar Bahaso Indonesia ado duo. Partamu aratinyo ‘jarak paliang jauah nan dapek dijangkau dek peluru’. Arati kaduo ‘jarak paliang jauah antaro duo zarah sabalum bainteraksi’. Zarah ko samo bagian dari satu benda nan paliang ketek, sarupo mulekul, atom, atau sel. Tapi katiko kato jangkau tadi diagiah awalan ma-, jadilah kato manjangkau nan aratinyo ‘mancapai (manjapuik, maraiah, maambiak) jo mauluan tangan ka muko’. Arati lainnyo dari kato manjangkau adolah ‘mancari (manamuan) sasuatu jo usaho surang’.

Kato barikuiknyo dari pituah di ateh adolah sarantang. Sarantang ko kato dasarnyo adolah rantang nan aratinyo ‘bateh jangkauan’. Kato rantang diagiah awalan sa- sahinggo aratinyo manjadi ‘sabuah atau suatu jangkauan’. Jadi sakali jangkauan, itu nan disabuik jo sarantang. Kato sarantang iko disandiangan jo kato tangan sahinggo aratinyo manjadi ‘sabuah atau sakali jangkauan tangan’. Bara jauahnyo sarantang tangan ko tantu babeda-beda di tiok urang. Ado nan tangannyo dapek manjangkau jauah, tapi ado juo tangannyo nan hanyo dapek manjangkau nan dakek. Mako manjangkau sarantang tangan aratinyo ‘maambiak atau maraiah sasuatu dipanjang rantang tangan masiang-masiang’.

Di barih kaduo ado kato mamikua nan kato dasarnyo adolah pikua. Pikua ko aratinyo ‘baban nan dibaok jo bahu’. Mamikua aratinyo ‘mambaok baban jo bahu’. Sudah tu ado kato sakuaik nan kato dasarnyo kuaik. Kuaik aratinyo ‘mampu, bisa, kuaso, dapek’. Jadi sakuaik aratinyo ‘sado kakuatan, kamampuan’. Kato sakuaik tadi disandiangan pulo jo kato bahu, nan disabuik urang juo jo pundak nan lataknyo antaro lihia jo pangka tangan. Sakuaik bahu aratinyo jadi ‘sado kakuatan atau kamampuan bahu’. Sarupo pulo jo barih sabalumnyo, kakuatan bahu tiok-tiok urang tu babeda pulo. Ado nan talok mamikua baban nan barek. Ado nan talok mamikua nan ringan sajo. Ado juo tu nan indak talok samo sakali. Jadi mamikua sakuaik bahu aratinyo ‘mambaok baban di bahu disasuaian jo kamampuan bahu masiang-masiang’.

Salanjuiknyo di barih nan katigo ado kato malompek, yaitu kato dasar lompek diagiah awalan ma-. Arati kato malompek jadi ‘manggarik atau maangkek kaki ka muko (ateh ka bawah) jo capek. Kato lain nan hampia samo maknanyo adolah maloncek. Sudah tu ado kato saayun nan kato dasarnyo ayun. Ayun aratinyo ‘manggarik ka muko atau ka balakang sacaro teratur. Kato lainnyo goyang. Saayun aratinyo jadi ‘sakali manggoyang atau manggarik ka muko, ka balakang, sakuaik kamampuan’. Kato saayun disandiangan jo kato langkah, yaitu ‘garak kaki wakatu bajalan’ atau ‘jarak antaro duo kaki waktu malangkah ka muko. Saayun langkah aratinyo ‘jarak atau kamampuan kaduo kaki sajauah nan bisa dibuek katiko malangkah’. Ado urang nan sakali maayun langkah tu panjang dan jauah. Ado pulo nan pendek-pendek sajo. Jadi malompek saayun langkah tu aratinyo ‘maayunan kaki ka muko sacaro capek sasuai jo bara talok jo jauah kaki sakali malangkah’.

Terakhir di barih kaampek ado kato bakato nan aratinyo ‘mangaluakan isi hati jo kato-kato’ atau ‘mangecek’. Kamudian ado kato sapanjang nan kato dasarnyo adolah panjang. Panjang aratinyo ‘bajarak jauah dari ujuang ka ujuang’ atau ‘jarak mambujua dari ujuang ka ujuang’. Kato sapanjang aratinyo jadi ‘sajauah; manuruik panjang’. Kato sapanjang di papatah di ateh disandiangan pulo jo kato aka nan aratinyo ‘daya pikia untuak mamahami satu hal; pikiran’. Aka bisa juo barati ‘kamampuan mancaliak jo mamahami apo nan ado di sakitar’. Bakato sapanjang aka aratinyo ‘mangecek tu sasuai jo daya pikia atau kamampuan aka masiang-masiang’.

Pituah atau papatah di ateh adolah ajaran nan paliang dasar agar satiok pribadi tu tau diri (mawas diri). Tu timbua partanyaan, manga pulo awak harus tau diri? Tau diri di siko mukasuiknyo mangarati jo paham jo kamampuan diri. Manusia sajatinyo diciptakan dek Tuhan babeda-beda. Sagalonyo babeda, bahkan urang kamba sakali pun, tatap juo ado nan babeda. Dalam pituah di ateh pun dipiliah kato  manjangkau, mamikua, malompek, jo bakato. Kaampek kato itu dapek dikarajoan dek satiok urang, tapi hasianyo babeda-beda. Utamonyo kalua disasuaian jo kato-kato nan maiiriangi sasudahnyo, sarantang tangan, sakuaik bahu, saayun langkah, sapanjang aka. Sacaro indak langsuang, pituah itu manyuruah awak untuk mangarajoan sagalo hal itu sasuai jo kemampuan diri masiang-masiang. Jiko manjangkau sajauah rantang tangan, atau mamikua sabara kuaik bahu, malompek sabara bisa kaki maayun langkah, sarato mangecek sasuai jo apo nan awak tahu sajo. Baa kalau indak sarupo itu? Apo akibaiknyo? Dapek kito caliak baliak ka pituah tadi. Umpamonyo awak nak manjangkau satu barang. Mako tuak manjangkaunyo dirantang tangan sajauah nan bisa dirantang. Ruponyo lah dirantang bana tangan, barang tadi indak juo tajangkau. Bakareh juo nan manjangkau jo sagalo nan bisa dipakai. Baitu juo mamikua baban di bahu. Awak tantu lah tau bara baban nan bisa dipikua dek bahu. Dipikua juo baban nan indak tapikua dek bahu, akibaiknyo ndak bahu sajo nan sakik. Sabatang tubuah sato pulo marasoan sakiknyo.

Tapi apokoh ndak paralu bausaho? Iko bana nan paralu dipahami. Pituah di ateh indak pulo diaratian supayo awak pasrah dan manarimo sajo keadaan nan ado. Pituah di ateh hanyo maagiah bateh untuak awak, sajauah ma usaho ko paralu dikarajoan. Utamo bana pituah iko dikaikkan jo harago diri. Bagi satiok awak, harago diri pasti bahubuangan jo kadudukan nak tapandang, tanamo, cadiak pandai, sarato harato bando. Mako satiok awak akan bausaho dan maupayo untuak maraiah sado hal itu. Limbak nan dari pado itu, pituah tadi maagiah bateh ka awak untuak usaho awak. Baa kok harus dibatehi. Gunonyo supayo ndak balabiahan nan dapek mandatangan kasusahan. Umpamo sajo dek karano nio tampandang dan nampak baharato, babali sagalo nan rancak jo maha. Samantaro kamampuan diri untuak mambali barang-barang tadi indak ado lai. Dek mampaturuikan hati, bausahoan juo jo sagalo caro. Akibaiknyo kok hutang nan tabuek, ko tagadai apo nan lai. Itu pulo nan akhianyo mandatangan susah ka diri.

Baliak ka pituah tadi, bateh-batehnyo alah jaleh. Kok ka bausaho, tatap paralu maukua diri. Sajauah ma kamampuan diri. Sajauah usaho dapek dilakuan. Jan sampai manyusahan diri. Jadi tujuan utamonyo pituah tadi indak mambuek awak baranti bausaho. Usaho tatap harus dilakuan samaksimalnyo sasuai kemampuan. Tapi jan pulo usaho nan dibuek malah mandatangan susah. Padohal nan dicari adolah katanangan samo kanyamanan. Mako, manjangkaulah sarantang tangan, mamikualah sakuaik bahu, malompeklah saayun langkah, sarato bakatolah sapanjang aka.

 


Wartawan : Eka Meigalia
Editor : Bahren

Tag :# Langkan # Pepatah # Minang