HOME LANGKAN CARITO


  • Jumat, 1 Maret 2019
Mambalah Batuang
Carito

Mambalah Batuang

Bahren

 

Batuang, iyo batuang… lai tau ang? Kato Mak Anan ka Si Alan. A… a lai Mak, baa ko itu nan Mak Anan tanyoan ka den?. Kan dek itu lah dek ang. Kadang-kadang den abih pangana lo jo apo nan kiniko tajadi. Dima-dima urang mangaluah ka den. Mangaluah a tu Mak, Si Alan ma nyolo. Baa ka indak paniang den dek ang. Si Man Onjok, malapor tadi di kantua nyo namo e tibo-tibo ilang dari daftar pengurus nan alah dibuek sabalunnyo. Indak ado angin jo hujan tibo-tibo sajo namo e anyuik ndak ado bakajalehan. Kutiko ditanyo ka Kak Tuo, nan baru tapiliah jadi ketua alasannyo awak harus manuruik jo caro dan adaik organisasi nan labiah tenggi, yaitu nan bakantua di Jakata. Dek harus ikuik paraturan rang jakata tu mako tapaso lah namo-namo tu di reduksi kato Kak Tuo, Reduksi tu apo lo jenis barang e tu Mak? Si Alan manyolo baliak, Reduksi tu dari baso Inggirih nan lah dijadian kato bahasa Indonesia lai tau ang? Aratie, pangurangan atau pamotongan, bitu kato urang nan ahli den caliak di Kamus Bahasa Indonesia. Tapi di Man Onjok tatek sajo indak manarimo, kok iyo direduksi baa kok ado namo nan lain, tu ndak reduksi namo e doh Mak kato MAn Onjok, diganti namoe tu Mak. Tu Baa jawek Mamak? Dek katoan ka Si Man Onjok, Ang esek-esek lah tapi kain ang Man, apo masalah ang jo Kak Tuo nan lamo atau nan baru ko? Ado koh basisalak, basiasek jo bakasakik an ati gai ang jo inyo, mako e namo ang diganti indak direduksi. Baa dek baitu Mak? Yo aneh pulo tu, takana dek Ambo. Baa lo bisa mode tu Mak?

Indak itu sajo doh Lan, si Man Tiko kalamari datang lo ka den, mangaluah juo baru. A pulo nan dikaluah an dek e Mak? Baa ndak kamangaluah inyo dek waang, Si Man Tiko lah sibuk dek maolah jo mangumpuakan sagalo bahan nan paralu untuak ka pambayia Remunerasi. Tibo-tibo disuruah apuih kasadoe dek Pak Dean, bos nyo di kantua. Alasan Pak Dean, apo nan lah dibuek dek si Man Tiko tu arati e bana kan salah tu, padoan hari tingga sahari ko lai. Bisuak ndak paralu apo nan dibuek kini ko lai doh. Iyo tambah paniang awak dek e mah Mak Anan. Iko nan dunia wale kecek-kecek rang gaek saisuak tu ndak mak. Dunia nan lah gilo ko. Kan dek itu lah dek ang Lan, indak waang sajo doh aden pun paniang baa kamanjaleh an ka si Man Onjok jo Si Man Tiko.

Tampak-tampak e di den, kiniko sado e lah bak cando mambalah batuang. Batuang yo tabalah, tapi nan sabalah marasai dek kanai injak nan sabalah lai diangkek. Kok dipikia-pikia jo dikana-kana. Sarancak nyo karajo bak cando mambalah batuang ko kok dapek yo ndak usah di pabuek. Labiah labiah kutiko awak lah manjadi urang nan dituo kan. Lah ditinggi kan sarantiang didahulukan salagkah. Karajo bak cando mambalah batuang ko indak ubahnyo takah karajo mamandian baruak. Nan baruak disuruah masuak ka tang aia, dielo jo diegang talinyo dan nan punyo baruak asik kamain hape jo apdet satus facebook jo WA di tapian. Nan baruak lah mati kadinginan. Sakali-sakali disentak an e pulo tali baruak ko, lah takajuik paja dek di elo. Yo sabana malang nasib baruak ko.

Tu baa nan kaelok dek Mak Anan? Kan dek itu lah dek ang. Kalau kito ikuik pituah urang nan tuo-tuo dahulu kok dalam pakaro iko, sarancaknyo awak tu kan bak cando mamandian kudo. Nan kudo disuruah masuak ka tang aia, tukang kudo masuak lo ka tang aia tu, digusuak e kuduak kudo tu jo sabuik di agiah pulo sampo, nan tukang kudo sato puloa manggusuak badan e jo sabun sambia wee tu basampo pulo. Nan kudo mandi wee mandi pulo. Jadi nan jadi inti e kok mandi yo samo samo mandi kito ko andak e, kok basah samo-samo basah. Tapi nan acok tajadi, tampak dek mato awak ko kan kok basah bia lah urang nan basah awak tatap kariang di ateh, utang lah bagalimang nan awak mancaliak-caliak jauah je dari jauah lo tu.

Tu baa nan ancak kini ko lai Mak Anan? semba si Alan makin panasaran. Kini kasado e kan lah tajadi mah. Apo nan ancak wak pabuek lai ko Mak?. Kok di den nan ka ang tanyo, saran di den ka Si Man Onjok jo Si Man Tiko. Kok talanjua langka kan bisa wak basisuruik. Kok Talompek kato kan bisa bamaafan. Kok Onjok nan salah elok Onjok mintak maaf cek den ka wee, Kok Tiko nan talonsoang bitu pulo. Salagi masalah ko alun gadang dan batambah rumik elok lah kito salasaikan masalah ko sacaro elok-elok jo musyawarah. Tapi Mak?? solo si Alan baliak, nan salah dalam pakaro ko kan ndak Si Man Onjok dan Si Man Tiko doh mak. Baa lo wee nan kamintak maaf mak?  

Iyo, batua kato ang tu Lan, tapi nan ang paralu tau Lan. Dalam kito iduik ko kan ado aturan nan kito turuik, ciek di antaro aturan tu aturan ugamo kito. Di Ugamo Islam urang nan barani maminta maaf walalupun inyo ndak basalah labiah tinggi darajaik e dari urang nan basalah indak amuah mintak maaf lai jaleh dek ang tu? Kini ko ang nio nan ma tinggi darajaik ang di mato tuhan atau di mato manusia? Tasarah dek waang lah lan. Manga lo awak mak sato-satoan lo mak? Kan ndak awak nan bamasalah doh mak, mamak nan bacarito jak tadi tu kini awak lo nan mamak suruah bapikia.

Iyo pulo ndak, manga waang lo nan den suruah bapikia, tapi samantang pun baitu, kok masalah sarupu tajadi di badan diri ang. Ang kenek ka gadang. Kok untuang apo nan kito baco kini ko dapek manjadi palajaran sarato contoh nan baiak pulo dek waang isuak. Kok aden ko lah gaek, kok angok lah canto angok bauang lah bakaja-kaja jo malaikaik mauik. Kok badan ndak kalamo raso e lai doh. Lai tingaran dek ang tu Lan. 

 

  Lai Mak, nan kato mamak sabanta ko kan awak pagang arek dan ganggam taguah. Di jadikan suluah katiko malam. Tungkek kutiko siang. Kaunduang undang ka sarugo. Tapi ciek pintak wak nyo mak. Kok dapek, ingek-ingek an juo lah awak kok tampak dek Mamak dih. Aman tu Lan, salagi ang masih amuah mandanga den ndak kan panek maingik jo mangana kan waang doh lan.

(Bahren, Dosen Jurusan Sastra Minangkabau Fakultas Ilmu Budaya Universitas Andalas)


Wartawan : Bahren
Editor : TE

Tag :caritoMinang