MALESTARIKAN SALAWAIK DULANG MELALUI PENDIDIKAN FORMAL

MALESTARIKAN SALAWAIK DULANG MELALUI PENDIDIKAN FORMAL

Oleh;  Dr. Satya Gayatri, M.Hum*

Pado hari Kamih tanggal 6 Oktober 2022 kami dari Jurusan Sastra Minangkabau Fakultas Ilmu Budaya Universitas Andalas, mangadokan kagiatan pangabdian kapado masyarakaik di Nagari Pariangan. Adopun dipiliah Nagari Pariangan tampek pengabdian iko dek Nagari Pariangan diyakini nagari nan paliang tuo di Minangkabau. Wakatu manyampaian pasambahan sarato bapidato adaik niniak mamak kito acok manyabuik namo nagari Nagari Pariangan iko. Di bawah iko diambiak contoh pantun nan manyabuian nagari Pariangan dalam kumpulan Pantun nan ditulih dek N.M. Rangkoto tahun 1982;

Adapun Pariangan Padangpanjang

Itu nan tampuak tangkai alam

Inyo badiri sandirinyo

Tuo kutuak kabancian urang

Awak nyinyia muluik kok tajam

Pantang batupang sagalo kato

Nak ilia ka Indogiri

Singgah sabanta ka ladang panjang

Di mano adat mulo badiri

Iyo di Pariangan Padangpanjang

Minangkabau duo kalarasan

Bodi Caniago Koto Piliang

Di mano kawin Adityawarman

Iyolah di Pariangan Padang Panjang

Lah sampik Pariangan nagari asa

Pindah mancari ka tampek diam

Tiok rombongan ado kapalo

Nan tuo Luhak Tanah Data

Kaduo banamo Luhak Agam

Katigo Luhak Limo Puluah Koto

Selain itu, nagari Pariangan tasabuik juo jo desa nan rancak dek pamandangan alamnyo. Udaro nan sajuak sarato alamnyo nan alamiah manambah betah kami balamo-lamo di nagari Pariangan. Banyak tampek-tampek nan diaggap punyo nilai sejarah Minangkabau sarato tampek nan dipicayoi manganduang nilai-nilai lokal sarupo mitos nan masih beredar di masyarakaik disinan.

Nagari di kanagarian Pariangan ado 4 jorong yaitu 1) Jorong Guguak, 2) Jorong Padang Panjang 3) Jorong Pariangan, jo 4) Jorong Sikaladi. Mungkin ado nan mambayangkan Pariangan, Padang Panjang nan acok dibaco dalam tambo atau nan acok kito danga wakatu niniak mamak manvampaian pasambahan adolah kota Padang Panjang, tanyato di Pariangan iko ado pulo namonyo Jorong Padang Panjang. Jadi ado mungkin salah paham awak salamo iko, tanyato Padang Panjang Pariangan itu adolah Padang Panjang nan talatak di Kanagarian Pariangan, indak kota Padang Panjang nan salamo iko awak kenal. Kami pahami iko sasudah dapek informasi dari masyarakaik satampek wakatu pengabdian iko.

Wakatu pengabdian kami maagiahan pencerahan kapado masyarakaik nan tujuannyo supayo urang batambah bawisata ka daerah Pariangan. Dek itu lah kanyamanan tarutamo kabarasihan tatap dijago jo ditingkekan supayo urang nan datang mambao kesan baiak ka daerah asalnyo. Maso kini, bawisata bukan hanyo untuak mancaliak alam nan rancak, tapi ado juo manyaksikan budayo satampek sarupo mancaliak seni tradisional. Pertunjukan nan dilakuan wakatu itu iyolah pertunjukan Salawaik Dulang. Ado nan unik dari pertunjukan Salawaik Dulang nan ditampilkan waktu pengabdian itu adolah urang nan manyampaikan dendangnyo. 

          Indak banyak urang nan tau, mamainkan Salawaik Dulang dilakukan dek urang padusi. Suatu fenomena nan babeda dari nan diliek, Salawaik Dulang biaso ditampilkan dek laki-laki. Babeda jo pertunjukan nan dilakukan dek grup Salawaik Dulang Cahayo Berapi nan kami caliak di Pariangan waktu itu, nan didendangkan awalnyo dek padusi kudian baru dek laki-laki. Jumlah panampilnyo tatap bajumlah duo urang. Dari pertanyaan nan kami sampaian ka pandendang padusi disitu dapek dinyatokan bahaso dunia sakolah bisa manjadi tampek malestarikan budaya tradisional. Padusi itu manjawab, sabalumnyo inyo ndak tau saroto indak pandai ba Salawaik Dulang. Inyo bisa manyampaikan Salawaik Dulang dek alah barajo di tampek inyo kuliah Jurusan Kerawitan, Institut Seni Indonesia Padang Panjang. Dalam wakatu sakitar satu semester kaduo palantun Salawaik Dulang itu alah bisa malakuan pertunjukan.  Dek bantuak itu kanyataannyo makonyo rancak pertunjukan tradisional diajakan di sakolah-sakolah formal supayo anak-anak salanjuiknyo bisa manyampaikan pertunjukan itu.  

*Dosen Sastra Minangkabau Fak. Ilmu Budaya Universitas Andalas