MALAKUIK TINGGA, SAKAM MALAYANG

MALAKUIK TINGGA, SAKAM MALAYANG

Oleh: Eka Meigalia*

Kini kito masih dalam maso bahari rayo. Sasudah sabulan bapuaso di bulan Ramadhan, kito masuak di Bulan Syawal. Tanggal 1 jo 2 Syawal hari rayo Idul Fitri. Di situ kito salasaian ibadah puaso kito, mambayia zakat, sarato akhianyo bamaaf-maafan. Bak kato papatah Minang, “malakuik tingga, sakam malayang”. Sasuai bana papatah ko jo urusan maaf maafan tadi.

Kato malakuik mungkin lah banyak di antaro kito nan indak tau aratinyo. Kalau dalam kamus bahaso Indonesia, malakuik ko samo jo melukut. Bahaso lainnyo lemukat, lemukut, lukut-lukut. Baliak ka bahaso Minang kito manyabuiknyo malakuik atau lakuik  nan aratinyo ‘ujuang bareh nan lapeh katiko ditumbuak’. Dalam papatah di ateh disabuikan baso “malakuik tingga”. Kato tingga sabananyo ado banyak arati. Tapi di siko mukasuik kato tingga iyolah ‘tatap barado di tampeknyo’.

Sasudah itu, ado kato sakam nan samo jo sekam dalam bahaso Indonesia. Aratinyo ‘kulik padi nan ado katiko padi ditumbuak’. Pado papatah di ateh, sakam disabuik malayang nan arati malayang di siko samo jo tabang. Bisa karano angin atau karano ringgannyo sahinggo murah sajo tabang.

Malakuik jo sakam adolah istilah nan bakaik jo karajo mahasian bareh. Katiko padi alah dipisahan dari batangnyo, padi ditumbuak sahinggo bapisah pulo isi jo kulik. Isi dari padi tadi iyolah bareh, samantaro kuliknyo disabuik sakam. Salain bareh nan bulek rancak nan akhianyo kito tanak manjadi nasi, ado ujuang-ujuang bareh nan tapisah dari bareh tadi katiko manumbuak. Itu nan disabuik malakuik. Bantuaknyo sarupo pacahan-pacahan bareh. Katiko manumbuak padi juo, nan malakuik tadi tatap tingga basamo bareh karano barek. Samantaro sakam nan ringan akan tabang malayang maninggaan bareh jo malakuik. Baiak bareh atau malakuik, itu adolah bagian elok nan rancak nan akan dipakai ditanak manjadi nasi. Samantaro sakam biaso dibuang biapun kini alah banyak pulo digunoan dek urang untuk pupuak atau dibaka jadi abu panggosok. Tatap sajo nan tapakai iyolah bareh jo malakuik tadi.

Alam takambang jadi guru, itu bana nan dipakai urang saisuak di siko. Baumpamo ka malakuik jo sakam tadi, sarupo itu pulo nan baiak jo nan buruak. Nan buruak bialah tabang, nan baiak nan tingga di kito. Baitulah pulo sagalo urusan nan ado antaro sasamo manusia, ado sajo bagian elok jo bagian buruaknyo. Jikok nan elok, mako bakawan arek lah antaro manusia ko. Jiko buruak, indak saketek manjadi pangka patangkaran antaro bakawan atau juo antaro sanak sudaro. Iko tajadi juo karano satiok kito punyo pamikiran surang-surang. Sahinggo indak bisa antaro awak mamasoan kahandak jo pandapek ka urang lain. Nyampang baitu, sarupo disabuik tadi, indak pulo dijadian buruak sado nan ado di urang karano babeda pandapek. Tatap ado nan elok dari urang tu nan bisa kito simpan, kito pakai, kito jadian palajaran. Mako jiko nan elok diambiak, nan buruak dibuang, patangkaran tadi juo bisa disalasaian. Itu bana mukasuik nan bisa diambiak dari papatah di ateh.

Di wakatu hari rayo pulo masonyo kito maafakan sasamo. Kito tinggaan dan lupoan apo-apo nan buruak tadi. Ambiak nan elok sahinggo hati jo pikiran dapek barasiah. Baliak suci barasiah sasudah sabulan manahan hawa nafsu. Jikok talok manahan nafsu salamo sabulan, insya allah malapeh marilaan nan buruak-buruak malalui maaf jadi murah pulo dilakuan. Jikok alun takarajoan, cubo baliak mangana nan elok-elok. Tarago masih di bulan Syawal iko, mari kito saliang maaf-maafan.

*Dosen Sastra Minangkabau Unand