HOME LANGKAN TINGKOK


  • Selasa, 8 Oktober 2019
Lubuak Jantan
TINGKOK

Lubuak Jantan

Di Luhak Tanah Data

Oleh: Bahren (Dosen Sastra Minangkabau FIB Unand)

 

Yo ..alah yo oiiii

 

Alah lamo indak ka lauik

Urang Kalauik mamakai bagan

Yo Di ulang kaba di sabuik

Yo kaba tantang lubuak jantan

 

Lubuah Jantan jo tanah nan tuo

Di dalam luhak tanah data

Baramulo kaba ka di baco

Di ulang curito dari Ivan Adilla

 

Datang lah pado maso itu, sakitaran bulan Mei di tahun duo ribu lapan. Tanggal lapan baleh wakatu itu. Datang lah, Ivan Adilla datang nan dari kota Padang, Mahadok kabakeh Pak Syahrial Bagala Khatib Soetan.  Apokoh mukasuik nan dibaok, apokoh tujuan nan tanyo makonyo Ivan datang Mahadok. Baitu bana tanyo Pak Syahrial maso itu, di Lubuak Jantan tapeknyo maso itu.

Bacurito Lah Ivan Adilla, ako mukasuik nan dibaok sarato tujuan datang ka Lubuak Jantan nantun. Adopun mukasuik jo tujuan datang mahadok kapado Bapak, gadang mukasuik nan dibaok langkok jo tujuan nan kaditanyo. Mukasuik ambo kamari nak batanyo kabakeh Bapak tantang asa jo usua manga kok nagari banamo Lubuak Jantan. Itu bana nan kaditanyokan, sudilah apak mambari jawek bia nak jadi suluah dek kami kutiko malam nak jadi matoari kutiko siang, bilo di kalak kamudian hari ado anak cucu kito nan batanyo.

Mandanga curai sarao paparan dari Ivan Adilla, bakisah lah Pak Syahrial wakatu itu. Bakisah tantang nagari nangko, mako banamo Lubuak Jantan. Baa bana kisah jo curito dangakan molah elok-elok, simakkan molah baiak-baiak. Mako nagari banamo Lubuak Jantan. Adolah pado maso daulu sarombongan niniak moyang kami sampai di sabuah tampek. Di sakitaran tampek nantun ado sabuah batang aia yang ado balubuak di batang aia nantun. Mako supakaik lah niniak kami manetap di sakitara lubuak nantun.

Indak bara lamo sasudah itu, tampaklah dek niniak kami, ado surang urang maningga di lubuak nantun. Sasudak dicaliak dipandangi, kironyo surang mayik laki-laki dalam bahaso niniak kami laki-laki disabuik jantan. Mako tampek ditamukan maik laki-laki tadi disabuik lah jo Lubuak Jantan. Tasabuik inggo kini.

Limbak nan dari pado itu, daerah di kaitaran Lubuak Jantan tadi, nan dijadikan tampek bamukim nan partamo dibari namo Taratak Nan Tuo nan arati nyo tampek bamukim nan paliang tuo atau lamo. Kaba ko lah di dapekkan dek Baliau Pak Syahrial Khatib Soetan dari urang tuo-tuo daulunyo. Lain nan dari pado itu, ado sabuah daerah lain nan ado di Lubuak Jantan nagko. Daerah nan banyak di tumbuahi dek batang bungo Kamboja atau bungo seroja. Mako daerah itu kini banamo Seroja. Baitu pulo daerah nan banyak ditumbuahi dek bungo mawar, dibari namo dek niniak kami daerah nantun jo mawar, di daerah mawar ko pulo tasabuik surang tokoh masyarakat banamo Amir, yang kalak dikamudian hari daerrah mawar nantun di kenal juo banamo Tuanku Amir. Tampek tuanku Amir barasal.

Itulah saketek kaba nan ditarimo dek Ivan Adillah, dari Baliau Pak Syahrial Khatib Soetan. Surang Patani nan barasa dari Lubuak Jantan. Jikok ado kaba nan salah. Ksalahan tantu datang nyo dari kito, kito nan hanyo manusia, tampek basarang salah jo jangga. Jikok nyo ado kato nan bana, kabanaran datangnyo dari tuhan. Allah ta’alah. Tampek sakalian ilimu bahimpunnyo.


Wartawan : bahren
Editor : bahren

Tag :#Langkan #Tingkok #Asa #Usua #nagari #Minangkabau