HOME LANGKAN GARAH


  • Jumat, 1 Maret 2019
Layue...
Garah

Layue.....

N Mangkutto

apo2 sajo nan di sabuik urang layue kok iyo? mungkin ado urang nan tibo2 batanyo coitu ka awak,  kok lai dianggap serius,  mungkin lai tapikie lo a nan ka dijawek. tapi kok ndak dianggap serius,  bisa sumpah sarapah lo nan ka bakaleperan, "galadak,  baa kok layue lo nan waang tanyoan ka aden, layue den nampak dek ang tuw?!?!?! ". ha mati kito!..... dek namo e awak nan batanyo, sudah tu awak lo nan manjawek, yo galak2 senggeang lo karuik mangana kok dapek tanyo nan sarupo itu. bantuak urang ele lo awak jadi e manjawek tanyo nan ndak bakarunciangan coitu! tapi dek lah tatanyoan,  tantu iyo tapaso lo dipikie an jawek e.....  partamo tantu tantang tanaman nan lah sebulan tak dapek aie, ari angek garang, matoari tagak tali taruih,  mako daun jo rantiang2 aluih layue di buek e! baa bantuak layue e tu ha? nan jaleh,  malepai daun tu jatuah ka bawah,  kurau ragi dek ilang rono,  kok biaso e ijau segar bak kecek urang,  kini lah ijau ka kuniang2an sarupo cirik ayam angek rono daun e tuw!..... kaduo tantang badan buruak manusia ko. nan biaso e tagak gagah,  badagok,  manggaretang,  campin,  tageh, kancang,  baminyak,  manggarik taruih bantuak kudo pacu silunak saisuak, kok tibo2 takulai,  lamah tak badayo,  ndak kama ka di osohan,  di tundo latiah,  di ejang lepai,  mako man tasabuik dek kawan nan mancaliak pasti layue badan paja tuw!..... katigo tantang sumangaik iduik. bak kecek urang gaek2 iyo gadang karengkang e,  iyo tabudue sumangaik e,  iyo kancang baliang2 e,  sabalun di suruah lah pai,  sabalun di tagah lah baranti, sabalun sudah tak ka duduak,  sabalun panek tak ka maunjue,  kok tibo2 bantuak tali gitar kandue gaya e,  bantuak kaset maleo bunyi suaro e,  bantuak urang kurang lalok incek mato e,  bantuak sarang tampuo kusuik rambuik e,  mako nan tasabuik dek urang pasti lah layue lo sumangaik paja tu kini..... tanaman,  badan buruak,  jo sumangaik tadi kiro e coitu lo parumpamaan e. kok co nan biaso bantuak e mako capek tasabuik segar daun e,  tageh badan e,  tabudue sumangaik e. kok ndak coitu?  lakek sakali cap layue! kok lah dapek cap layue baa aka lae? tantu di cari lo jalan kalua e,  tantu di cari ko baa ubek e..... a jalan kalua jo ubek e tuw? hahaha,  kan iyo ele juo awak kecek urang tu ha, gigiah na batanyo surang co urang ele mah! lamo2 dek coitu juo parangai, sagalo nan ka batanyoan, lai ndak ka layue ko di buek e tuuuuu?!?!?!  #love.bahasominang.edition#


Wartawan : N Mangkutto
Editor : TE

Tag :kucindanMinang