HOME LANGKAN TINGKOK

  • Selasa, 13 Agustus 2019

Lareh Nan Panjang

TINGKOK
TINGKOK

Lareh Nan Panjang

Di Luhak Tanah Data

Oleh: Bahren*

 

Balayia Kapa dari bangkahulu

Balayia inggo ka pulau Pagang

Kaba curito Rang daulu

Iyo kaba tantang lareh Nan Panjang

 

Lareh na  panjang jo bancah laweh

Tanah Itam jo bukik tui

Ambo bakaba bukan bagageh

Kok jampang gawa tolong tunjuak-i

 

Rami lah urang di ulakan

Rami nyo kutiko hari pakan

Kaba nyo urang ambo kabakan

Salah jo jangga tolong maafkan

 

Datanglah Zuriati wakatu itu, datang nan jauah dari Padang. Mahadok ka baliau Adnan Datuak Tuo. Gadang mukasuik dijalang nyo dek baliau Zuriati. Adopun makuasuik jo tujuan mahadok ka Datuak Tuo, iyo nak untuak mangatahui tantang asa jo usua namo nagari sarato daerah nangko. Manga koh banamo Lareh Nan Panjang.

Tanggal tigo baleh kutiko itu di dalam tahun duo ribu tujuah. Di Bancah Laweh lah tapek nyo kutiko Mak Datuak Tuo bacurito. Tujuah Puluah duo umua liau wakatu itu, tiko manyurah asa jo usua mangko nagari banamo Lareh Nan Panjang. Bagulambek liau bakaba sarato mayurah kabakeh kami. Simakkan molah elok-elok, dangakan bana baiak-baiak.

Ado lah pado zaman dahulu, babarapo urang niniak jo moyang kami sampai lah liau di sabuah tampek. Tampek itu, iyo lah babantuak sabuah lareh nan lataknyo mamanjang. Bamupakaiklah niniak moyang kami tu, untuak manetap di tampek nantun. Dek lamo lambek tingga di sanan, mako dibarilah namo tampek tingga niniak kami tu jo sabutan Lareh Nan Panjang.

Dek daerah lareh nan panjang ko sangaik lawehnyo sarato panuah dek tanah lunak bak cando bancah jo barayia. Mako dibari namo lah dek niniak kami tadi tampek nan babancah laweh tadi jo namo Bancah Laweh. Ado pulo sabuah lai, masih di dalam daerah lareh nan panjang. Tampek nan tanah nyo barono itam. Mako dibari namo lah tampek nantun jo Tanah Itam.

Indak doh jauah dari tanah itam, ado pulo niniak kami mambuek pamukiman nan lataknyo mamanjang. Lamo jo lambek daerah nantun manjadi sabuah koto, dibari namo lah Koto Panjang. Limbak nan dari pado itu, ado pulo sabuah tampek bamukim nan agak ketek, kaciak kato rang di siko mako banamo lah tampek tadi jo namo Koto Kaciak.

Lanjuik batanyo Zuriati, kapado Mak Datuak Tuo. Manjunjuak lah Zuriati kutiko itu, kasabuah daerah nan agak tinggi. Cando bukik nampak nyo daerah nantun. Kok daerah nan bak cando bukik itu, apokoh namo tampek nantun Mak Datuak?. Manjawek Adnan Datuak Tuo, daerah tu banamo Bukik Tui, mangko banamo bukik tui, basabab jo bakarano daulu di bukik nantun banyak lah tumbuah batang Tui. Mako dibari namo tampek nantun jo Bukik Tui.

Samantarao itu, indak jauah dari bukik tui ado daerah nan banyak rawang nyo nantun, mako dibarilah namo daerah nantun jo Rao-Rao. Untuak labiah jaleh curito tantang Rao-Rao nantun di curito salanjuiknyo dikabakan. Ado duo lai tampek di siko nan dibari namo sarupo jo urang nan punyo tanah di daerah ko. Nan paratamo daerah nan banamo Pak Lambiak. Samaso jaman ulando, adolah surang banamo Pak Lambiak, punyo tanah nan sangaik laweh di siko, mako daerah nan punyo dek Pak Lambiak tadi di bari namo jo Pak Lambiak. Bitu pulo jo Sikoloih. Nan  punyo Kabun di daerah kami ko. Mako daerah tampek, kabun punyo Si Koloih tadi disabuik jo sabutan Kabun Sikoloih.

Itulah curito nan dikabakan dek baliau Mak Adnan Datuak Tuo. Kapado Zuriati nan datang ka baliau. Curito nan dikabakan dek Baliau tadi, iyolah di dapek dari kaba rang tuo-tuo nan daulu. Manuruik rang tuo-tuo nan daulu niniak moyang kami ko asa nyo dari nagari Gunuang. Adopun suku dari kami di siko, ado nan basuku Sikumbang, Suku Pisang, Suku Koto, Suku Panyalai jo Suku Guci.    

*Dosen Sastra Minangkabau FIB Unand


Wartawan : Bahren
Editor : Bahren

Tag :# Langkan # Tingkok # Asa # Usua # Nagari # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com