HOME LANGKAN TINGKOK


  • Senin, 29 Juli 2019
Labuah
TINGKOK

Labuah

Di Luhak Tanah Data

Oleh: Bahren*

 

Alai-alai tabang lah ka alai

Tabang lah pipik sangaik jauah

Curito lah lamo nan tabangkalai

Curito tantang nagari labuah

            Ado pun labuah nan jadi kaba

Labuah di luak tanah Data

Pangulu nan kuniang bacurito

 

Oi. Dunsanak pabanyak saba

Tando nyo kito yo manusia

Nan indak lapeh dari salah jo doso

 

Di ulang juo oi .. curito

Curitto tantang daerah kito

Kok untuang jadi pahalo

Dek nan bakaba jo nan ba curtio

 

Bakabah lah baliau Z. Dt. Mangkuto Pangulu Nan Kuniang, bakaba liau kapado Zuriati nan datang dari Padang. Datang mahadok ka baliau dalam tanggal duo puluah tujuah di bulan Mei wakatu itu pado tahu duo ribu tujuah. Alah tujuah puluah lapan umua liau wakatu bacurito tantang Nagari Labuah. Pulang liau dari sawahnyo tapek nyo di rumah wakatu itu.

Apokoh bana kaba dari liau, simak kan malah elok-elok. Baco malah baiak-baiak dek dunsanak sakalian. Manga kok daerah kami banamo Labuah iko malah curitonyo nan ambo dapek dari rang tuo-tuo dahulu. Kutiko sarombongan niniak moyang kami nan barangkek dari Pariangan Padang Panjang untuak mancari lahan ka tampek tingga sarato basawah jo baladang nan baru.

Sampai lah niniak kami tadi, di daerah nan banyak samak jo baluka nyo. Sahinggo niniak moyang kami ko musti marambah jo manabeh samak baluka tu inggo tabukak malah jalan manjadi labuah. Kamudian jalan tadi, lah nan dijadikan tampek lalu ka pai jo ka pulang. Mako jalan atau labuah tadi samakin rami, dibarilah namo tampek tadi dek niniak moyang kami jo sabutan Labuah.

Samak jo baluka nan di rambah jo di tabeh tadi inggo manjadi labuah, dibuanglah hasia parambahan tadi ka sabuah tampek. Tampek itu kini, tampek mambuang parambahan labuah itu dibari banamo Labuah Parambahan.

Ado pulo sabuah lai. Di dakek labuah nantun, ado nan banyak tumbuah batang Ampalu Kaciak. Mako limbak nan dari pado itu, dek ulah baguru kapado alam niniak kami langsuang mambari namo tampek jo daerah nantun jo sabutan Ampalu Kaciak.

Lain nan dari pado itu, ado pulo daerah ampalu ko manjadi bagian dari Sungai Tarok. Dek karano sungai tarok ko adolah daerah nan Gadang, mako dibari  banamo Ampalu Gadang.

Itulah kaba nan di kabakan dek Mak Z. Dt. Mangkuto Pangulu Nan Kuniang. Kaba ko liau dapek dari niniak sarato mamaknyo cukuik jo urang tuo-tuo nan daulu. Saketek lai liau bacurito tantang suku nan ado di Labuah nantun. Kami di Labuah nangko ado nan basuku Mandaliko, ado pulo basuku Koto,  Suku Gurun Godang Jo Suku Piliang.

Jikoknyo ado kaba nan bana, iyo lah kabanaran nan datang dari tuhan, Allah ta’a tuhan kito nan sangaik kayo sungguah, tampek ilimu bahimpunnyo. Jikok nyo ado kaba nan salah sarato angga. Salah nan datang dari ambo. Ambo nan hanyo manusia tampek salah jo jangga bakumpau nyo. Kapado Tuhan ampun dimintak, ka dunsanak nan mambaco maaf dipinto.

 

*Dosen Sastra Minangkabau FIB Unand


Wartawan : Bahren
Editor : Bahren

Tag :# Langkan # Tingkok # Asa # Usua # nagari # Minangkabau