HOME LANGKAN TINGKOK

  • Kamis, 11 Juli 2019

Koto Baru Pandai Sikek

TINGKOK
TINGKOK

Koto Baru Pandai Sikek

di Luhak Tanah Data

 

Oleh   Bahren*

 

Jikok sabalunnyo kito bacurito tantang niniak nan turun dari Pariangan mambuek pamukiman jo paladangan. Nan tasabuik banamo Koto Baru langkok jo Tampek Bujang Juoaro, Sarasah jo Aia Manambuih Batu. Mako dalam kasampatan iko kini, dialiah curito molah saketek ka daerah Koto Baru nan sabuah lai. Iyolah koto baru nan lataknyo di dalam daerah sapuluah koto aia angek, dalam wilayah Pandai Sikek.

Bakabalah Angku Datuak Pangulu Nan Basa, kapado Zuriati nan datang mahadok ka baliau dalam tarih tujuah baleh di bulan Mei wakatu itu tahun duo ribu tujuah. Apokoh bana curito liau, baa bana kisah kato baru ko. Simakkan bana elok-elok dangakan molah baik-baik, dek pambaco nan budiman. Bagulambek liau Angku Datuak Pangulu Nan Basa bacurito baa nagari ko bamano Koto Baru.

Takalo daerah di sakitaran Pandai Sikek, samakin lamo samakin rami, mako sabagian niniak dek kami dari suku koto bajalan mancari pamukiman nan baru. Dek lamo lambek bajalan mako sampai lah niniak kami di siko. Mako niniak kami urang suku koto nan mandiami daerah ko disabuik lah jo urang koto baru. Mako satiok ado urang nan datang, dari Agam ataupun Tanah Data nan batanyo tantangan niniak kami tu, urang ma tu? Mako dijaweklah dek niniak kami Koto Baru. Mako lamo bakalamoan disabuiklah daerah nan didiami dek urang koto nan baru tadi jo Koto Baru.

 Di koto baru ko kini, ado daerah nan khusus didiami dek niniak kami jo katurunannyo nan basuku koto sajo. Mako kampuang nan hanyo ado urang koto tadi disabuiklah jo Kampuang Koto. Indak do jauah dari kampuang koto tadi ado ciek kampuang nan lataknyo di subarang batang aia ketek disabuiklah kampuang tadi jo subarang nan aratinyo bana talatak di subarang.

Curitoku didapek dek baliua Datuak Pangulu Nan Basa dari urang tuo-uo nan daulu di curitokan dek niniak jo mamak kami sacarao lisan. Limbak nan dari pado itu, bakisah juo liau ka Zuriati, tantangan asa niniak rang Koto Baru nangko. Sabagian Niniak moyang kami ado nan datang dari Agam ado pulo nan datang dari Luak Tanah Data.

Adopun suku nan mandiami daerah koto baru ko ado nan basuku Ampek Indu, Maliputi suku Guci. Suku Pisang jo Sikumbang sarato Suku Anam Indu nan maliputi Tabalai, Diujuang, Subalah Labuah, Guci Pisang Jo Sikumbang.

Itulah kaba nan dikabakan liau Datuan Pangulu Nan Basa ka Zuriati, jiko nyo ado nan bana tantang itu, kabanaran iyolah datang dari Tuhan. Allah taala kayo sungguah tampek sagali ilimu bahimpunnyo. Jiko ado salah jo gawa. Salah nan datang dari ambo. Ambo nan hanyo manusia, tampek salah jo gawa bakumpua. Kapado tuhan Ambo minta ampun, ka pambaco maaf di pintak.    

 

*Dosen Sastra Minang FIB Unand

 

 


Wartawan : -
Editor : Bahren

Tag :#Langkan # Tingkok # Curito #Asa # Usua # Nagari # Minangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com