HOME LANGKAN GARAH


  • Jumat, 1 Maret 2019
Kaniang...
Garah

Kaniang.....

N Mangkutto

kok awak mancaliak urang, sambie mambulalak jo incek mato, pasti ado nan tapikie langsuang tantang urang nan di caliak tuw. kok nan tacaliak tu urang nan kuruih, timbue pangana, "lah bara ari paja ko tak makan kiro2 kow?" kok nan ta senter tu urang e gapuak, timbue pangana, "paja ko a nan diadok an ka inyo pasti nyo lulue langsuang mah!". kok nan nampak tu agak pakek kalam e, nan tapikie, "baa kok sa anguih ko jadi e ko ha? talambek ba bangkik nampak e mah!". kok putiah barasieh lo nan tacigok, tapikie lo, "tak buliah kanai matoari paja ko, bisa mangareseang kulik e sakali mah"..... baa kok takah itu pikiran sakali? tak paralu kenal gai dulu sabalun mamikie an baa urang tuw? ma tau badan e nan kuruih, tapi ati e taba dek raso bakawan. kok gapuak co dorom bagai badan e, antah jiwa e haluih jo raso badunsanak. bialah itam badangkiang bana badan e, ma tau parangai e saputiah kapeh tak balang sangeneang alah juo do. tak paduli jangek e pucek co batang pisang bakubak, tapi ateh namo mampatahanan prinsip iduik iyo sabana pakek lo darah e. jadi tak lo samo panampak an jo isi kiro e do, bisa babeda, bisa balain, bisa takicuah lo urang dek maliek karosoang ko kiro e..... baralieh lo carito ka nan ndak tampak tapi bisa taraso. kok nampak urang nan agak kareh mangecek, biaso e langsuang tapikie, "gadang rarau paja ko kiro e!". nampak urang nan agak tajam incek mato e maliek ka mato awak, nan tapikie pasti, "paja karapai ko pangarengkang nampak e mah!". basobok jo urang nan angguak anggak geleang namuah, bakato lo ati ko, "galadak ko tak acuah ka nan den kecek an mah yo!". tapi kok awak sadang mangecek nampak lo urang tak putuih2 lo mancaliak awak sambie galak salayang, mangurok sakali dalam ati, "nyo cime'ehan lo den dek paja kaleren ko mah!"..... haaaa baa lo kok langsuang lo kalua pangana coitu sakali? ma tau urang nan mangecek kareh2 tu talingo e agak tasumbek? rumah e di tapi lawik? karajo e di tampek kukue karambie? ma tau urang nan tajam incek mato e mancaliak awak tu urang nan baru jago lalok? urang nan sudah malakek an ubek mato? atau mungkin urang nan baru sudah operasinmato? ma tau urang nan acuah2 ka awak tu kiro e urang sadang paniang lalek dek tak lalok 3 malam? urang nan sudah bacakak jo induak bareh e? atau urang nan lah tak makan 4 ari? ma tau lo urang nan mancaliak awak galak2 senggeang tu urang nan baru mambarasiehan karang gigi e? urang nan sudah ba kumue? urang nan sudah manang lotre?.....  jadi kok tak tau awak jo a nan tajadi jo urang tu, baa lo awak ka bisa tau sakali a pangana e ka awak? tak paralu di silau dulu? atau jan2 awak kiro e iyo punyo ilimu tenggih bisa mambaco a nan tasurek di kaniang e surang2? hahaha..... #love.bahasominang.edition#


Wartawan : N Mangkutto
Editor : TE

Tag :kucindanMinang