HOME LANGKAN CARITO


  • Minggu, 10 Maret 2019
Ka Sarugo
Carito

Ka Sarugo

Bahren

 

Tapek pukua 6.30 Nasyifa jo Nayla lah bagageh pai ka sikola. Sikolanyo indak jauh bana dari rumah, tapi dek takuik talambek dan kanai hukuman makonyo mereka ko bagageh pai agak pagi. Duo hari sabalunnyo Nasyifa talambek. Buk gurunyo manyuruah sado nan talambek mambarasiahkan pakarangan sikola. Sagalo daun-daun nan baserak di pakarangan harus diangkek dan dimasuak-an ka dalam goni sampah nan talatak di ujuang sabalah ka ilia sikola tu. Hari ko, nampak nyo mereka lai indak talambek ka sikola.

Jam palajaran partamo pun dimulai, anak-anak kelas III baraja matik-matika. Banyak anak-anak nan tagak di muko kelas karano indak bisa mangarajoan soal matik-matika nan diagiah dek buk guru. Palajaran hari ko adolah palajaran mangali jo mambagi. Pakaliannyo pun indak nan talalu tinggi bana. Mereka hanyo baraja kali-kali 1 sampai kali-kali 10. kali-kali 1 sampai 5 lai lancar-lancar sajo, a nan ditanyo guru dapek mereka manjawek nyo, sahinggo ado nan baciloteh kali 1 sampai 5 ko samudah cik ayam tabik nyo buk, sahinggo tabasuik galak anak-anak nan lain.

Tapi katiko kali-kali ko lah sampai ka kali-kali 6 sampai 10 baru banyak nan tadiam, tamasuak Nasyifa, agak lamo mamikia nyo walaupun bisa juo mereka manjaweknyo. Ibuk gurunyo pun bakato, ma nan samudah cik ayam tadi? Kok tadiam kalian sado e. Payah buk, jawek mereka sarentak. Dima payah nyo? Kato buk guru, kali-kali e banyak bana bu. Ma lo banyak dek kalian tu, ciek tambah e dari kali-kali 5 nyo mah. Beko pulang dari sikola ko kalian hapal di rumah, bisuak pas baraja matik-matik wak ulang baliak, lai tadanga dek kalian tu?. Lai buuuuuuk, sarentak murik-murik manjawek. Jam palajaran matik-matik pun salasai, anak-anak basiap-siap untuak palajaran agamo.

Lonceang babunyi 3 kali, tandonyo wakatu kalua main-main alah habih, murik-murik balarian masuak kelas. Surang baduo ado juo na talambek, babageh hinggo tajatuah dek balari. Pak agama lah masuak dan lah duduak pulo di muko kelas. Assalamulaikum anak-anak! Kato pak guru, sarentak mereka manjawek waalaikumussalam warahmatullahi wabarakatuh. Anak-anak apak sadonyo, pagiko kito baraja agamo. Palajaran waka kini masalah sarogo jo narako.

Nah… untuak paratamo sakali apak nio batanyo, apo itu Narako? Dari muko Manunjuak tangan Adli, silakan Adli kato pak guru, Adli pun manjawek, narako tu pak tampek nan dijanjikan Allah bagi urang-urang nan ingkar ateh parintah dan larangan dari Allah. Jadi sia na ingkar masuak ka narako lah mereka tu pak. Santiang Adli kato pak Guru mambaleh, jadi batua apo nan dikatoan dek Adli tadi, kalau awak ko ingkar atau indak patuah ka parintah jo larangan Allah mako urang-urang nan bak itu akan dimasuakkan dek Allah ka narako. Amuah anak-anak apak sakalian masuak narako? Indak paaaaak, jawek anak-anak sarentak.

Nan kaduo, Apak nio batanyo apo itu sarugo?. dari suduik bulakang manunjuak Bilqis. Aaa.. Bilqis, cubo Bilqis sabuik an apo itu sarogo?. Bilqis pun manjawek, sarugo tu pak tampek nan dijanjikan dek Allah tuhan semesta alam bagi urang-urang Islam nan babuek baiak, batingkah laku sopan, manuruik sagalo parintah tuhan dan maninggakan sagalo larangan-Nyo. Santiang Bilqis, kato pak Guru, jadi anak-anak apak sakalian, kalau awak ko salalu babuek elok, manuruik kato urang tuo, mangarajoan sagalo parintah Allah, maninggakan sagalo nan dilarang dek Allah, Insya Allah kito akan masuak Sarugo. Karano Allah alah bajanji, budi baik nan awak karajoan walaupun sagadang incek sayu bayam akan dinilai sabagai amal. Baitu juo kalau anak-anak apak nan babuek jahek, walapun sagadang incek sayua bayam akan dicatat sebagai doso. Amuah anak-anak apak masuak sarogo? Amuak Paaaaaak, jawek anak-anak sarentak. Sia nan amuak angke tangan. Kok amuah masuak sarogo, beko pulang sikola basamo-samo awak pai ka musajik, sumbayang bajamaah bia masuak sarogo wak basamo-samo.  Banyak lah anak-anak ko nan maangkek tangan. Hampia kasadonyo anak maangkek tangannyo, Tapi apo nan tajadi, Nasyifa nan duduak di suduik muko meja pak Guru indak ma angkek tangnnyo doh, pak guru pun heran manga kolah Nasyifa indak ma angkek tangan. Sambia bajalan mandakek ka Nasyifa Pak Guru batanyo, baa Nasyifa indak ma angkek tangan nak, ndak amuah Nasyifa masuak sarugo? Sambia manangih Nasyifa manjawek, awak lai amuah lo masuak sarugo nyo pak, Tapi mama jo papa wak mangecek kok pulang sikola langsuang pulang, jan kama-kama, kok pai lo wak masuak sarugo tu payak mama jo papa wak mancari pak, kato Nasyifa polos. Pak Guru hanyo bisa tadiam sambia bapikia-pikia surang.

(Bahren, Dosen Jurusan Sastra Minangkabau, Fakultas Ilmu Budaya Universitas Andalas)

 

 


Wartawan : Bahren
Editor : TE

Tag :Carito Minang #Bahaso Minangkabau