Kampuang Padang Gadih

Kampuang Padang Gadih

Oleh: Ike Efrita*

Padang Gadih Salereh Aia

Di Pelembayan Talataknyo

Iyo di Kabupaten Agam

Elok di ansua jo di bayia

Di bayia malah jo curito

Curito kampuang nan baragam

            Tasabuik malah sabuah curito, curito tantang sabuah kampuang, Kampuang banamo Padang Gadih, dalam luhak Agam di Salareh Aia Kecamatan Palembayan. Ba-a banamo Kampuang ko Padang Gadih baiko malah curitonya nan Ambo danga dari nenek Ambo. Adolah pado maso dulu di kampuang ko ado sabuah sumua, Sumua nan aianyo indak parnah kariang sarato janiah bana. Tapi ado larang jo pantang indak buliah mambiak ayia ka sumua nantun, karano sumua ko sumua laranagn.

Sampai pado satu kutiko, wakatu nagari dilando paneh bakapanjangan, hinggo kakaringan malah kampuang tu, Swah jo ladang lah mulai ratak, dek angek nyo hari, sado sumua nan ado di kampuang tu manjadi kariang, indak tamasuak Sumua larangan nantun. Tapi dek karano sumua talarang nan masyarakaik banyak, tatap tak namuah pai ka situ walau untuak maambiak aia agak saparian kaciak. Usah ka maambiak ayia, madakek sajo indak do buliah ka sumua nantun

Tapi samantang pun baitu, tasabuik surang anak gadih, gadih nan manih rancak bana, bungo inyo di Kampuang tu. Pai mancari aia molah si Gadis, mancari aia ka kampuang sabalah, aia di cari untuak ka diminum sajo. Sabalun sampai di kampuang sabalah, lalu lah si gadih dakek sumua tu, sumua nan barayia banyak janiah nyo indak alang kapalang cando camin baru basiram, baitu bana ka janiahan ayianyo.

Dek tagoda jo janiah ayia, mandakek malah gadih ka situ, ka dakek sumua larangan. Salangkah duo langka, cukuik ka tigo langkah panuah tibo malah gadih di sinan. Lah sampai Gadih di sumua, taniaik dalam hati untuak mandi di sumua nantun. Mandi malah gadih di sinan sampai sasudah jo salasainyo.

Tapi apo nan tajadi, sadang asyik-asyik nyo mandi nan si Gadih ko ilang bitu sajo. Lah dicari dek urang kampuang dek mandanga si gadih ilang, dicari molah nak agdih tadi, bakaliliang kampuang, tapi nan gadih indak basuo. Sampai malah urang mancari ka arah dakek sumua larangan, tapi apo nan tajadi pado maso itu. Nan basuo hanyo kain mandi untuak ka basahan sarato parian tampek aia.

Sajak kajadian itu, Mako dibari namo lah sumua tu jo sumua Gadih. Karano di sumua tu surang anak gadih ilang indak basuo inggo kini. Samantaro kampuang tampek si Gadih ilang di bari namo jo Kampuang Padang Gadih. Antah iyo, antah ko tido, curito urang nan bakabakan, Kalau pun ado nan bana, bana nyo datang dari Allah, Allah ta’ala kayo sungguah. Kalau pun itu ado nan salah, salah nan datang dari ambo, manusia basipaik kilaf jo salah. Kapado tuhan to minta ampun, kapado urang banyak maaf di pinto.

Mudah-mudahan jadi palajaran lah andak nyo ka untuak kito nan basamo. Kalau nan alah jadi larangan, usah di langga jo di tantang. Jikok nyo manjadi suruah, elok di karajoan dan di ama kan. Sakian curito dari ambo, ambo nan ketek masih baraja.

*Mahasiswa Sastra Minangkabau