HOME OPINI CELOTEH

  • Jumat, 1 Mei 2020

In Sya Allah Cegak, Paliang Lamo Tigo Bulan Lai

Celoteh
Celoteh

In Sya Allah Cegak, Paliang Lamo Tigo Bulan Lai

 

Sapakan ko yo bak kato balam padi rabah. Sarupo api dalam sakam. Dicaliek langang, tibo-tibo malimbak. Malanyau sabalik. 

Mirip kantuik tak babunyi, tibo-tibo baunnyo manggapuro sampai ka pangka talingo! Sarupo itu lah angko-angko manggado kapalo. Tibo-tibo lah hampie tigo suku! Data kapatang, Kamih (30/4) lah 148 urang positif Corona. Kamih nan daulu baru 81 kasus positif. Co alang-alang tagak tali naieknyo.

Data kapatang, Kamih (30/4), di Indonesia, 9.771 positif. Cegak 1.391 dan maningga sabanyak 784 urang. Sedangkan di dunia, lah 213 negara nyo lanyau, belasan negara se nan alun. Total nan positif Covid-19 di dunia adolah 3.024.059, nan maningga sabanyak 208.112 urang. 

Mambaco data-data tu. Mambaco nan tasurek, tiok hari kasus batambah. Ado nan batambah tagak tali, sarupo alang-alang dapek angin. Ado nan sarupo alang-alang tapinggang, maenggak naieknyo. 

Saketek negara di dunia nan lah mulai manurun kasusnyo. Tapi ado negara di dunia, sarupo Myanmar yang saketek bana kanai nyoh. Keadaan Kamih (30/4), hanyo 98 kasus, ampek urang maningga, padohal jumlah panduduaknyo 55 juta. 

Ndehhh, virus ko bilo ka sudahnyo? Bilo ka cegak?

Manuruik kajian dari Singapore University of Technology and Design (SUTD), virus ko bisa diprediksi persebarannyo. Mamakai pamodelan matematik, dari siklus iduik virus corona ko--mulai dari fase wabah, akselerasi, titik belok, deakselerasi, dan titik henti--bisa dipakiro an bilo bala ko ka baranti. 

Dimuek di laman nan diunggah pada 18/4 pakan kapatang, prediksi mamakai pamodelan matematik tu mancaliek ka siklus virus. Samantaro siklus tu adolah hasil kurenah adaptif dan palawanan dari agen tamasuak awak surang-surang, pamarentah, serta pembatasan alami dari ekosistem.

Singkek kaji, siklus iduik virus ko tagantuang kapado; 1) kurenah panyasuaian (adaptif) tamasuek palawanan dari awak masiang-masiang, 2) respon pamarentah, dan 3) bateh alamiah dari lingkungan iduik (ekosistem).

Kecek kajian SUTD tu, pola siklus iduik pandemi Covid-19 ko dipakiroan muncul sarupo kurva bantuek huruf S. Pola iko pun mamparetongan dinamika lainnyo nan mambeda an tiok-tiok wilayah, sarupo pertumbuhan penduduk. 

Dari takok-takok (prediksi)--tapi idak takok-takok uwok do yo--dari SUTD tu, ado tigo agak-agak atau kiro-kiro (perkiraan) alternatif dari akhir pandemi, yaitu; 1) saat kutiko kasus terakhir nan di kiro-kiro lah diidentifikasi, 2) saat kutiko 99 persen total kasus nan di kiro-kiro lah diidentifikasi, dan 3) saat kutiko 97 persen total kasus nan di kiro-kiro lah diidentifikasi.

Dari pemodelan itu, diunggah Minggu (26/4) di laman SUTD, pandemi Covid-19 di dunia ko kiro-kiro akan salasai 97 persen pada 29 Mei 2020, dan 100 persen pada 8 Desember 2020. Titik belok (kurva turun) di Indonesia lah tajadi pada 20 April 2020. Samantaro, akhir pandemi 97 persen kiro-kiro akan tibo pado 7 Juni 2020. Dan 100 persen pado 7 September 2020. 

Kini kan lah 1 Mei. Labieh saketek sabulan lai lah cegak wak 97 persen. Tigo bulan labieh saketek, cegak total! Alhamdulillah.

Tapi, mbek cah. Pamodelan tu dibuek dari mancaliek kurenah awak surang-surang, baa pamarentah bausao, dan bateh alamiah ekosistem. Aratinyo, kutiko awak babana surang, tangka dak amuah ditagah untuak patuah jo PSBB, mako pasti dak ka jadi cegak!!!


Tag :#prediksicovid19 #sutd

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com