HOME OPINI CELOTEH

  • Minggu, 5 Mei 2019

Hoaks Di Tangan Urang Bapendidikan

Baa mangko hoaks (kaba kicuah/bohong) di tangan urang bapendidikan.? Sabab nan bisa mambuek hoaks, pasti urangnyo basikolah sarato bailimu tenggi. Inyo ka mangicuah urang banyak.

Tantu urang tukang hoaks ko musti punyo pengalaman pulo di bidangnyo. Liau pasti punyo data, mangarati jo sajarah, jalannyo karir urang-urang gadang, urang kayo, urang bapangaruah. Abeh dinyo sadonyo.

Dari situ baru kaba barito dibuek sasuai jo framing, istilahnyo, atau arah nan dituju. Kalau paralu pakai foto-foto bagai carito hoaks ko diedarkan. Malah kini makin canggih caronyo, dibuek bana videonyo ancak-ancak. Iko kini nan tak pernah baranti beredar di media sosial. Dari satu grup ka grup nan lain, babega sae barang nan baisi kicuah ko, dari hape nan ciek hape nan lain. Kadang dalam tiok-tiok grup WA ado juo kaba barito hoaks ko.

Kalau dulu jolong-jolong kalua istilah hoax, hoaks, kicuah, ko, awak yakin nan jadi korban pasti urang nan pendidikannyo randah, urang nan alun pengalaman jo politik, jo ilimu pengetahuan, atau nan kurang mambaco. Tapi nyatonyo indak. Urang nan basikolah pun kini jadi korban hoaks, dek karano bitu ebatnyo urang mambuek hoaks, sampai-sampai urang batitel insinyur, dokterandes, ateh namo sarjana, sampai doktor, jo profesor bagai lah kanai tembak dek hoaks.

Baa mangko disabuik kanai tembak. Sabab liau-liau nan basikolah tenggi tu sato pulo manshare (manyebarkan) barang nan hoaks tadi. Ndak gawat tu sanak. Jadi basuo jo nasehat urang tuo-tuo awak saisuak, ilimu sajo ndak cukuik, harus basaratoan jo iman. Iman ko lah nan bisa jadi benteng. Benteng nan sabana kuek untuak manahan tersebarnyo hoaks.

Di dalam Al Quran, jaleh bana Allah magiah resep supayo aman dari hoaks. Itu nan disabuik jo tabayyun (telitilah kebenarannya). Baa caro manaliti kebenaran tu..? Kok dapek kaba nan angek-angek, caliak bana sumbernyo. Dari media online ko, dari koran kolah, dari Alquran atau Hadist lah, awak teliti bana. Buka link online tu, buka bana Alquran nan disabuik tu, atau hadist. Kini tingga batanyo sae ka inyiak internet, google, basuo tumah. Contoh tabayyun ko, cubo sanak pelajari di Alquran, surek Al Hujurat (QS 49 : 6).

Al Hujurat, ayat 6 tu jaleh bana jadi panulak hoaks ko. Bunyinyo "Wahai orang-orang yang beriman.! Jika seseorang yang fasik datang kepadamu membawa suatu berita, maka telitilah kebenarannya, agar kamu tidak mencelakakan suatu kaum karena kebodohan (kecerobohan) yang akhirnya kamu menyesali perbuatanmu itu."

Lai ado pitunjuak nan salangkok itu untuak awak nan jadi korban hoaks tu lai. Jaleh Allah menyuruah awak, maneliti, pareso dulu, lacak dulu, sudah tu baru ditimbang-timbang baiak buruaknyo sabalun disebarkan. Tapi nan nomor satu, parentah Allah tu, adalah teliti. Mudah-mudahan ummat Islam bisa jadi palito untuak mambari cahayo kapado urang banyak. Insya Allah.


Tag :#Hoaks#Pendidikan#

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com