HOME LANGKAN KATO

  • Kamis, 1 Juli 2021

GABAK DI ULU TANDO KA UJAN CEWANG DI LANGIK TANDO KA PANEH

Carito
Carito

GABAK DI ULU TANDO KA UJAN

CEWANG DI LANGIK TANDO KA PANEH

Oleh: Eka Meigalia*

Apo-apo nan ado di sakitar awak, manusia, disabuik ‘alam’. Alam adolah ciptaan Allah nan alah diatur pulo dek Allah untuak manunjang iduik manusia tu juo. Mako dek urang Minang, alam ko manjadi padoman pulo untuak iduiknyo. Itu nan tatuang dalam papatah “alam takambang jadi guru”. Baitu pulo ko papatah nan kito bahas kini ko “gabak di ulu tando ka ujan, cewang di langik tando ka paneh”.

Gabak samo aratinyo jo ‘itam, kalam, awan nan warnanyo galok manganduang ujan’. Kalau ulu aratinyo adolah bagian ateh, ujuang pangka (batang aia, pisau). Di siko nan dimukasuik jo gabak di ulu  adolah awan kalam itam nan ado nampak di arah pangka batang aia. Biasonyo di daerah nan labiah tinggi (babukik). Salanjuiknyo ka ujan bararti manyatoan baso nan andak tajadi adolah turunnyo ujan.

Salanjuiknyo ado kato cewang. Balawanan jo gabak, cewang ko adolah awan tipih, haluih, putiah, babantuak garih babarih. Awan ko juo acok nampak mamerah atau manguniang karano mamantuan cahayo matohari nan ka tabik atau ka tabanam. Cewang ko jikok nampak di langik disabuikan tando ka paneh. Paneh ko mukasuiknyo kondisi hari (cuaca) kutiko matohari ndak tatutuik awan sahinggo angeknyo sampai ka bumi. Udaro jadinyo taraso angek.

Dari papatah di ateh dapek diaratian baso jikok nampak awan itam galok nan disabuik gabak di ulu, itu tandonyo hari ka ujan. Sabaliaknyo, jiko awan barasiah mamantuan cahayo merah kakuniangan manjalang matohari tabik jo tabanam, tandonyo hari ka paneh.

Di baliak itu, ado ilimu nan bisa kito dapek pulo, yaitu ilimu mambaco tando dari alam. Urang Minang sarupo alah disabuik sabalumnyo, manjadian alam sabagai tampek baraja. Apo nan takambang di alam, itu diparatian dan dijadian palajaran padoman iduik. Baitu juo katiko mancaliak awan di langik nan dapek dijadian tando angek atau ujan ari nan sahari tu.

Salanjuiknyo, kutiko manusia alah bisa mambaco tando dari alam sarupo itu, mako manusia harus bisa pulo manyiapan diri. Basiap jikok ujan turun. Basiap jikok hari angek. Untuak nan batanam, mako iko dapek pulo jadi padoman. Kutiko ari angek biasonyo digunoan untuak manjamua-jamua hasia batanam. Kutiko hari paujan, biaso urang batanam-tanam.

Mambaco tando dari alam, manyiapan diri untuak maadoki apo nan katibo, itu bagian ketek dari caro manusia mamanpaikan nan alah diciptakan Allah. Alam disadioan dek Allah untuak manusia, manusia juo harus manjagonyo. Kutiko alam indak dijago, mako alam jadi rusak. Rusaknyo alam juo dapek manjadian banyaknyo tibo bancano. Kutiko ujan turun, banjir, galodo, jo tanah taban tibo pulo. Itu alah pulo tasurek dalam Alquran, Surek Ar-rum ayat 41. Ayat tu manyatoan baso apo nan rusak nan tajadi di darek jo lauik, itu karano ulah tangan manusia itu juo.

Baliak ka mambaco tando dari alam tadi, jikok alam tu bana nan alah rusak, kito dapek sajo manjadi salah mambaco tando tadi. Apolai kini kito caliak hari nan indak manantu. Ujan paneh tibo ndak bakajalehan. Sadang musim paujan, tibo-tibo sajo ujan baranti ndak turun-turun sahinggo apo nan baru ditanam jadi rusak. Atau sadang masonyo manjamua hasia baparak, tibo-tibo ari paujan. Jadinyo hasia parak tadi busuak ndak bisa dijua. Nan jadi rugi tantu manusia itu juo.

Jadi dari papatah nan singkek di ateh, ado babarapo panduan iduik nan bisa wak dapek. Partamu baso alam disadioan Allah untuak manusia, untuak manusia tu dapek baraja dari alam. Kaduo, alam alah maagiah tando untuak apo nan ka tajadi ka muko, mako manusia dapek baraja dari tando-tando alam. Tando-tando dari alam ko baguno bana untuak manusia dapek manyiapan dirinyo untuak apo pun nan katibo. Baiak buruak nan ka tibo, manusia dapek basiap. Katigo, manusia juo harus manjago alam karano salain iduik di situ, alam juo dapek mandatangan bancano. Utamonyo jikok alam tu lah rusak. Nan marusak alam tu tantu manusia. Jadi supayo alam tatap dapek jadi tampek untuak iduik sarato baraja, manusia harus manjago alam.

 

*Dosen Sastra Minangkabau Unand


Wartawan : Eka Meigalia
Editor : bahren

Tag :#Kato #Minangkabau#Carito

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com