HOME OPINI OPINI

  • Kamis, 2 April 2020
Elok jo Buruak Internet, Iko Informasinyo
Nofri DZ

Elok jo Buruak Internet, Iko Informasinyo

Oleh Nofri DZ

(Mahasiswa Sastra Minangkabau, Universitas Andalas)

Adonyo Internet diciptakan dek manusia untuak mamudahkan sagalo urusan. Contohnya dari jarak jauah sudah bisa  mangirim pesan tanpa harus magunjunginyo, mangirim pitih dalam jumlah nan sangaik banyak kini lah bisa di takan-takan sajo.

Iko manandoan kamajuan teknologi nan lah samo-samo dirasoan. Namun disampang itu ado juo masyarakaik yang salah manggunoan internet.

Internet mamiliki banyak dampak buruak bagi panggunonyo, bagi urang nan salah gunoan, khususnyo bagi saorang palajar. Partamo sakali, konten Dewasa, bagi nan sadang di bangku palajaran iko manjadi larangan, karano bisa merusak parkambangan disaat nyo sadang baraja. Apobilo saorang anak alah tapangaruah atau kancanduan dek situih iko, mangko anak tersebut akan mangalami parubahan nan sangaik drastis. Dan kabanyakan nan mambukak situih iko adolah palajar. Iko marupokan sabuah palanta bagi inyo, apolah wakatu bakumpua-kumpua jo kawan-kawan.

Kaduo, tersebarnyo informasi nan palsu. Informasi palsu atau urang kini manyabuik hoaks sangaik mudah menyebar di internet. Informasi mode iko sangaik manakuik an pangguno internet, apolai bagi urang nan alun paham terhadap informasi yang damikian. Jadi, infromasi palsu iko labiah kajam dari pambunuhan, karano efeknyo bajalan dalam wakatu panjang.

Sabananyo sangaiklah mudah untuk mangatahui mano informasi nan palsu dan mano informasi nan batua. Hanyo sajo masyarakaik kini indak namuah mamikian lebih lanjuik. Masyarakaik kini hanyo picayo jo kato-kato urang banyak tanpa nyo cari kabanaran tantang informasi nan di dapekan. Nana labiah parahnyo, informasi palsu tersebut di sebarkan ka urang lain, sahinggonyo marugian urang lain. 

Nan katigo yaitu mancaliak an sisi kakajaman. Kompleksnyo babagai informasi banyak situih mancaliak an informasi nan ma arah kakajaman, kakarasan dan pambunuhan, maskipun hanyo untuk mancaiak sajo. Tantunyo informasi mode iko indak patuik untuak diacaliak ka sagalo masyarakaik.

Perkembangan zaman kini nan samakin canggih, akses internet mambuek kito mudah mandapek informasi. Dan juo akses nan samakin rancak, mamudahkan kito untuk malakukan sesuatu dari jarak jauah. Dan labiah canggihnyo, bisa video call dari jauah tanpa harus awak manuruiknyo. Kagunoan internet sangaik mambantu, jikok digunoan untuk nan elok.

Zaman kini kalau indak bisa ma akses internet tantunyo sangaik marugian. Karano bisa dikatoan saketek katinggalan zaman. Kini banyak nan berbasis online sajo, mulai dari informasi, balanjo online, mambayia liStrik online, mambayia ayia online, sampai-sampai kini kuliah bisa jo online. Tantunyo kalau indak pandai ma akses internet, pastilah katinggalan dek urang.

Disisi lain, adoh babarapo hal yang mambuek rugi kalau indak bisa internet, antaro lain: 

1. Internet manjadi ladang wawasan ilmu dan pangatahuan. Hal iko manjadi salah satu manfaat internet untuak urang nan sadang manuntuik ilmu. Apobilo kasulitan di mato palaran atau mato kuliah, di internet bisa dicari dengan capek.

2. Mampamudah sitem palaksanaan akademik. 
Internet indak hanyo marambah ka bidang hiburan atau komunikasi sajo, tapi bamamfaat juo di bidang pandidikan. Khususnyo di wakatu kini ko. Virus Corona sadang marajalela. Jo internet bisa kuliah. Itulah salah satu kagunoan internet.

3. Kagunoaan internet nan paliang manolong bagi seseorang yaitu tingkek kamudahannyo untuak bakamunikasi dan maurus babagai hal. Manggunoan internet sangaik mahemat wakatu dan pitiih kalua. Hanyo jo mambali paket internet, dunia bisa di ganggam. Akses internet bisa mangirim data dan surek elektronik lain dalam wakatu hitungan datiak.

4. Internet sangaik rancak untuak bisnis dan usaho.
 Contohnyo wakatu handak mambari tau urang lain tentang usaho seseorang, malalui internet akanlabiah mudah dan capek. Kagunoaan internet lainnyo yaitu tampek mampabanyak kawan, tarutamo nan banyak social media.

Apolai di zaman kini alah banyak di caliak urang yang kenal dan bajodoh lewat social media. Malalui internet bisa bakawan jo urang nan indak satampek dan baeda daerah dan wakatunyo indak tabateh.

Internet juo bisa sabagai media hiburan. Mulai dari anak ketek sampai ka urang nan alah dewasa, acok manggunoan internet untuk tampek hiburan. Bebasnyo hiburan malalui internet, mambuek panggunonyo dianjurkan untuk bisa selektif dalam mamiliah. Apobilo pangguno media hiburan malalui internet adolah anak-anak, paralu di awasi oleh urang tuonyo. Karano dampaknyo sangaik gadangdalam mambantuk karakter, sakaligus kepribadian anak. Urang tuo sangaik berperan dalam mamiliah tontonan nan cocok untuak anak, supayo indak mamnimbulkan dampak buruk ka anak.

Banyak sakali kagunoan internet di maso kini. Baiak atau buruaknyo tergantuang bagaiamano caro manggunoannyo. Jikalau di gunoan untuk nan elok, mako internet akan mambuek awak samakin mau, dan sabaliaknyo jikok digunoan ka dalam kaburukan mako akan mahancurkan seseorang. Karano itu, mari samo-samo kito manggunoan internet sabagai media untuk mambuek ka nan elok. Supayo bisa mangikuti pakambangan zaman nan samakin maju.


Tag :#internet #covid19