HOME LANGKAN KATO

  • Sabtu, 20 Februari 2021
Datuak Marajo; Pinang Pulang ka Tampuaknyo (4)
Mahyeldi Dt Marajo

Datuak Marajo; Pinang Pulang ka Tampuaknyo (4)

Oleh TE Radjo Boedjang

Sasudah "malantai sabalun luluih" paralu pulo mamakai pituah "malabiehi ancak-ancak, mangurangi sio-sio", nan--Alhamdulillah--lah dipakaikan dek baliau Dt Marajo.

Di ujuang-ujuang wakatu mamimpin di Kota Padang, sambie manunggu hasie sidang di MK, baliau Dt Marajo bukannyo mambuek opini-opini baru untuak manandiangi parang opini nan sadang tajadi takaik Pilgub tu. Malainkan bakuliliang di ranah jo rantau. 

Manyapo anak nagari, badiskusi jo urang rantau sungguah caro nan bijak daripado baradu urek lihie dak tantu ujuang pangka di dunie politik nan rumik tu. Alhamdulillah, Dt Marajo lah arif tantang itu.

Salaku pihak nan dapek suaro paliang banyak, "malabiehi ancak-ancak" jadie sakironyo Dt Marajo tabaok jo parang muluik bakatuntang nan tun!

Sungguahpun mungkin nan disampaikan adolah argumen-argumen politik jo fakta dan dalil hukum, tapi kok itu nan dikakok Dt Marajo jo timses saat kini, bisa jadi "malabiehi ancak-ancak". Sakali lai, syukur Alhamdulillah, idak itu nan tajadi.

Namun di baliek pambalakangan itu, "mangurangi sio-sio" pulo, apobilo sakironyo lah tabatu tajak, tasakek galah, tapi nan baliau diam saribu basa juo. 

Kalaluannyo bana lah tu kini, tipak di badan Dt Marajo, sarato jo baliau Dt Rajo Pasisie Alam, takaik jo hal-hal nan jaleh, tantu "siang caliek-caliek i, malam danga-danga kan". 

Jan sampai alah limau dek binalu. Jan sampai cupak dituka rang manggaleh. Kok santano barang nan jaleh nan dipakaroan, iyo bagalanggang mato rang banyak jo basuluah matoari andaknyo diindang ditampi tareh!

Kok hal nan sarupo itu masih diilak-ilak kan, bukannyo "malabiehi ancak-ancak" nan tajadi. Tapi "mangurangi sio-sio"!

Nan katigo, "babuek elok pado-padoi, babuek jaek sakali jangan!

Alhamdulillah, Nan Kuaso kayo sungguah. Pasangan Calon (Paslon) H Mahyeldi Dt Marajo-Audy Joinaldi Dt Rajo Pasisie Alam pun tak tagaduah karano gugatan duo Paslon lainnyo di Pilkada Sumbar. Sarupo nan dibaritokan, Dt Marajo-Dt Rajo Pasisie Alam dalam kutiko nak dak lamo akan dilantik dek Presiden Jokowi.

Kini KPU sadang manyiapkan administrasi, sasudah tu DPRD Sumbar akan sugiro bakirim surek ka Mendagri, supayo Dt Marajo-Dt Rajo Pasisie Alam dilewakan jadi Gubernur-Wakil Gubernur Sumbar. Mungkin dalam pakan katigo bulan kini ko, baliau lah dilantik, dan sah manjadi nangkodo di Ranah Minang.

Sasudah itu, sarupo surek Dirjen Otda Kemdagri, pado pakan ka ampek Februari ko, bupati/wakil bupati dan walikota/Wakil Walikota dilantik pulo dek Dt Marajo-Dt Rajo Pasisie Alam. Ado 11 pasang nan ka dilantik, di lua Bupati/Wakil Bupati Solok Selatan yang abih periodenyo di bulan muko, jo Bupati/Wakil Bupati Solok yang gugatan Paslon lanjuik sidang di MK. Untuak Kabupaten Solok, bakamungkinan bulan April 2021 baru dilantik.

Tu apo kaitannyo jo "babuek elok pado-padoi, babuek jaek sakali jangan"?

Biasolah, "sakali aie gadang, sakali tapian barubah". Tiok-tiok nan baru, tantu mambaok kabaruan. Antah itu namoe visi-misi--sarupo nan dijua salamo kampanye--tamasuak kabijakan-kabijakan sarato urang-urang nan kamambantu mandayuang kapa Ranah Minang ko.

Adolah kurang tapek sakironyo bangkalai-bangkalai urang daolu dipabiakan tabangkalai. Sagalo nan tabangkalai, jaleh mubazir. Mako malanjuik an bangkalai, sapanjang dak malangga aturan dan untuak kamaslahatan urang banyak, tantu wajib ditaruihan. Untuak pakaro bangkalai tu, sacaro garih nan tampak, in Sya Allah lai kabataruihan mamaek barihnyo nah.

Tapi, satantangan visi-misi, tantu kawajiban pulo untuak mangkongkritkannyo. Tamasuak pambangunan infrastruktur nan lah jadi buah bibie salamo maso parang di Pilkada. Contohe fly over Sitinjau Lawik dan pambangunan destinasi wisata kelas dunia jo 19 baleh destinasi wisata kelas nasional, iko iyo diarok an bana dek masyarakaik Ranah Minang.

Mako, dalam paga "babuek elok pado-padoi, babuek jaek sakali jangan" tu, kito tonton alek malewakan gubernur/wakil gubernur Sumbar. In Sya Allah.


Wartawan : TE Radjo Boedjang
Editor : sc.astra

Tag :#MahyeldiDtMarajo #Minangkabau #AudyJoinaldy