HOME LANGKAN CARITO

  • Selasa, 19 Maret 2019

Cubadak

Carito
Carito

Cubadak 
Artocarpus integer (Thunb.) Merr

Bahren

 

Cubadak tangah Hilaman
Di Juluak jo Ampu Kaki
Usah Lamo Tagak di laman
Ambiak Cimbuak basuah lah kaki

Ambo yakin dan picayo banyak di antaro dunsanak alah jarang mandanga pantun nan di ateh. Pantun itu lah jarang tadanga kiniko. Kalaupun ado tadanga, paliang dalam adegan dan bagian-bagian dari pamainan randai. Tapi, kalau ditiliak jo dikaji bana. Pantun nan di ateh tu, sabananyo bana bagian dari pantun nan ado dalam pidato adaik atau pasambahan serak bareh kuniang.

Dari sakian banyak pasambahan nan ado mungkin pasambahan serak bareh kuniang ikolah pasambahan nan disampaikan dek induak-induak atau bundo kanduang. Samantara pasambahan nan lain, ampia kasadonyo di sampaikan dan disurah dek angku datuak jo pangulu. 

Namun, parnah juo Mak Anan caliak di sakitaran Kambang Ranah Pasisia, pasambahan adaik ko disampaikan pulo jo kaum laki-laki. Pidato serak bareh kuniang ko masih ciek lai nan unik jo patuik di kaji. A bana nan unik nyo? Nan unik jo rancak dari pasambahan nan ciek ko adolah pasambahannyo hanyo disampaikan dek surang urang, indak ado bajawek kato atau titah manitah dalam pasambahan serak bareh kuniang ko.

Samantaro pasambahan nan lain, ado si pangka dan ado alek nan datang, sahinggo sambah nan disampaikan ado sambuik jo saliang jawek dalam panyampaiannyo.

Itu…, Mak Anan raso ancak ka jadi pambukak kato dalam curito kiniko, nan ka mak Anan sampaikan sabana nyo  tantang Cubadak atau namo latinnyo Artocarpus integer (Thunb.) Merr. Tapikia-pikia kudian dek Mak Anan, dari sakian banyak tanaman nan tumbuah subur di Minangkabau ko, tanyato Cubadak tamasuk ka dalam ciek di antaro namo tanaman nan tasabuik sampai ka dalam pasambahan. Takana dek Mak Anan kato-kato guru Mak Anan, Angku Usuih, parnah bakato ka Mak Anan, kalau kato itu ado dan tapakai dalam pasambahan atau kaba dan curito, bisa dikatoan itu kato nan masuak ka dalam kato-kato kebudayaan dan khas dari suku bangsa nan mamakai kato itu. 

Cubadak sabagai tanaman tuo atau tanaman nan baumua panjang, singajo tampaknyo di tanam di muko rumah rang tuo-tuo awak daulu. Indak lain dan tak bukan tujuan nyo ka untuak bataduah jo balinduang. Batangnyo na  Gadang jo daunnyo nan rimbun rancak bana dijadikan tampek malapeh panek jo sasak pulang dari parak ataupun sawah. Labiah-labiah kalau cubadak ko lah babuah, baunnyo manyeba kama-kama. Raso nyo indak usah di tanyoan, nan pasti manih jo lamak. Rancak bana untuak ka malapeh auih. Di daerah jo tampek lain cubadak ko ado nan manyabuik nyo bangkong (cubadak utan di Malaysia), ado nan manyabuik nyo jo baroh, ado juo nan manyabuik nyo jo nangka beurit (sunda) atau nongko cino kato rang Jawa. 

Niniak Moyang kito ko kan lah sangaik musahua jo pituah alam takambang jadi guru. Mak Anan mangiro, karano baraja dari alam itulah, niniak kito mananam batang cubadak ko. Karano kanduangan gizi nan mampaat nan banyak sangaik dalam dagiang buah cubadak manjadi salah satu sabab. Kalau Mak Anan caliak-caliak di babarapo laman di internet tanyato cubadak ko salain ancak untuak kasehatan sacaro umum, nyatonyo cubadak sangaik rancak untuak kacantikan. Di antaronyo nan mamak parnah baco, cubadak ko sangaik ancak untuak urang-urang nan payah karayia atau kato rang kini susah BAB (Buang Air Besar). Mako, makan lah cubadak mako karayia manjadi lancar. 

Mampaat nan lain dari cubadak ko, untuak mampakuek tulang sarato jo gigi, jadi nan punyo anak kaciak nan baru katumbuah gigi mulai lah agiah anak kito tu cubadak supayo tulang e rancak gigi e kuek. Untuak induak-induak nan sadang sibuk mancari pormula anti aging (anti penuaan dini) usah dipakai juo ubek kimia, makan sajo cubadak tiok ari, kulik nan karuik tu ka manjadi barasiah baliak. Samantarao itu, cubadak ko sangai rancak untuak proses pamulihan kutiko tasarang damam malaria, mamakan cubadak sangaik elok untuak dunsanak nan sadang sakik malaria. Itu kiro-kiro nan pernah mamak baco.

Jadi…
Dek karano itulah, agaknyo pilihan, kato cubadak dalam pantun di ateh nan ditujukan ka bakeh marapului jo anak daro nan datang kutiko alek kawin di baco dalam pasambahan serak bareh kuniang. Manjadi harapan mungkin dek niniak kito nan daulu, supayo anak jo minantu nyo iduik ko sarupo jo batang cubadak. Batang nan paliang indak, sangajo ditanam dek urang lamo dan mambari mampaat untuak rang nan banyak.

Labiah dari itu, cubadak ko sangaik mudah tumbuahnyo, sajak mudo lah baguno ka gulai. Bahkan di babarapo tampek di daerah awak ko cubadak juo dijadikan samba adaik. Indak langkok samba alek kawin dalam kampuang kok alun ado pangek cubadak atau gulai cubadak. Gulai cubadak juo sangaik lamak kalau dicampua jo tunjang. Indak dapek jo kato-kato Mamak ka manjalehannyo lai doh. 

(Bahren, Dosen Sastra Minangkabau FIB Unand)


Wartawan : Bahren
Editor : T E

Tag :Carito Minang #Bahaso Minangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com