Ciek Lai, Satantangan Pananganan Covid-19

Ciek Lai Satantangan Pananganan Covid-19

Oleh TE Radjo Boedjang

Jumlah urang nan tatular covid-19 dak kunjuang suruik. Tiok ari batambah taruih. Sarupo alang-alang tagak tali naieknyo!

Apo sabeknyo ko? Apokah pamarentah dak bakarajo? Apokah masyarakat dak patuah?

Nan jaleh, sajak virus ko terdeteksi lah ado di negara ko--di awal bulan Maret 2020, diumumkan dek Presiden Jokowi hari Sanayan (2/3), ado duo urang asa Depok Jabar nan tatular--lah karusuak anyak pamarentah maurusnyo. 

Lah bagalanggang mato rang banyak pulo, pamatentah tunggang-tunggik maurus covid-19, sungguahpun cacek calo taruih tadanga dari urang-urang nan kurang pueh mancaliek virus ko malonjak taruih!

Mulai dari mambagi tugeh, maatur pitih dan maatur masyarakat supayo dak tatular (PSBB, gerakan Tiga M--di Sumbar kini bahkan batambah jadi Ampek M), bahkan mancari ubek jo vaksin taruih dikarajoan dek pamarentah. 

Baitu pulo di Sumbar, sasuai berita Minangsatu.com, Wako Bukittinggi Ramlan Nurmatias, Kamih (26/3), mengumumkan sorang warga Kota Jam Gadang itu kanai korona. Iko tacatat jadi kasus partamo di Sumbar. Sasudah itu, daerah lain pun manyusul. 

Kini warga Kota Padang nan paliang banyak kanai covid-19. Makonyo Padang saat kini masuak zona sirah. Sajak tanggal 11 Oktober sampai 17 Oktober 2020, ado tigo daerah masuak resiko tenggi (zona sirah), yakni Kota Padang, Kota Sawahlunto dan Kota Pariaman. 

Pemprov Sumbar pun tak lalai manyikapi. Ado PSBB dilakukan. Pambatasan urang masuak Sumbar pun dibuek. Tiok nan masuak dipareso suhu tubuah. Nan baliek bajalan dari lua dipareso dan salamo ampek baleh ari diminta maisolasi diri. 

Nan paliang baru, Pemprov Sumbar pun mangaluakan Perda 6/2020 tentang Adaptasi Kehidupan Baru dalam Pencegahan dan Pengendalian Covid-19 (AKB PPC19), dan mulai Jumek (9/10) dibalakukan di Sumbar. Ado dando dan hukum kuruang badan apobilo malangga aturan tu. 

Salamo babarapo ari, perda tu disosialisasikan ka sabalik nagari. Dak hanyo gubernur jo jajaran, bupati/walikota, sampai camek dan walinagari pun sato manjalehan aturan tu ka masyarakat. Polisi dan tantara ikuik mangawal Pol PP dalam malakukan razia sarato panindakan warga nan malangga.

Tapi, korona ko batambah tagak tali. Dalam sahari, bahkan ado batambah labieh tigoratuih urang sakali kanai! Urang-urang mulai babisiek-bisiek. Mulai baceloteh di kadai dan di medsos. Tunjuak pun luruih; baa ko pamarentah, makin lamo makin naiek mah! 

Di baliek pambalakangan itu, ado juo bananyo nan dikecek an di Jubir Gugus Tugas Penanganan Covid-19 Sumbar, Jasman; makin banyak urang tadeteksi kanai korona ko, makin ancak! 

Hahhh? Baa kok baitu? Jikok saketek urang nan lah dipareso, mako ado kemungkinan urang-urang di sakitar kito, nan alum dipareso tu, sabanae lah kanai korona.

Kecek liau tu, sacaro teori kalau positivity rate (PR) sabuah daerah 1,5 persen, berarti bisa diduga lah ado 1,5 persen urang di daerah itu nan kanai covid-19. Nan PR ko adolah hasil bagi antaro jumlah urang nan dites (nan paliang mangkuih tes swab atau PCR--polymerase chain reaction) jo jumlah urang nan positif covid-19. Jikok dites 1000 urang, positif 20 urang, mako PR nyo 20 per 1000, atau 2 persen. 

Angko bateh paliang tinggi untuak klasifikasi aman, manuruik WHO adolah 5 persen. Sadangkan bateh paliang randah urang nan di tes--dikutip dari laman Kompas.com (30/5), kecek ahli epidemiologi dari Griffith University Australia, Dicky Budiman--adolah 1 persen dari jumlah panduduak.

Nah, untuak Sumbar, kok diambiek jumlah panduduak 5 juta, mako saidak-idaknyo sabanyak 50 ribu urang paralu di tes. 

Pado ari Sanayan (12/10), dikutip dari laman www.sumbarprov.go.id, jumlah urang nan dipareso lah 231.050 urang. Aratinyo, lah labieh 1 persen dari total penduduk Sumbar yang banyaknyo sakiro 5,48 juta urang. Angko tapeknyo 4,21 persen. Iko prestasi Sumbar nan patuik kito haragoi.

Lalu, masih di laman www.sumbarprov go.id, yang dipublish Senin (12/10), pukul 18.00 Wib, PR Sumbar lah di angko 4,87 persen! Lah dakek ka bateh bahayo!

Tapi angko PR Sumbar masih jauah di bawah rerata nasional yang mancapai 9,9 persen. Dan jauah di bawah Jakarta nan PR nyo 14,30 persen.

Karano angko jumlah urang nan lah dipareso di Sumbar lah jauah labieh dari 1 persen, sudah tu sasuai teori epidemiologi; bahwasanyo untuak mangandalikan korona paralu gerakan 3 T,  trace (lacak), test (uji) dan treat (penanganan), mako nan paralu dipasamoan adolah penanganan ko. 

Aratie, sasudah dilacak dan diuji, baa caro penanganan urang nan kanai jo nan idak/alum kanai?

Untuak nan lah kanai, dari data di laman yang samo, www.sumbarprov.go.id, lah ado 8.847 urang positif covid-19, ditangani dengan caro dirawat dan diisolasi. 

Sabanyak 409 urang sadang dirawat di babarapo rumah sakik, 2.973 isolasi mandiri, 212 isolasi daerah, 38 urang isolasi di BPSDM, 53 urang isolasi di PPSDM. Dan nan lah cegak ado 5.008 urang, nan maningga 181 urang.

Lalu baa pananganan urang nan idak/alum kanai? Iko lah yang paralu labieh difokuskan!

Sungguahpun maatasi covid-19 ko harus sajalan jo maurus ekonomi, tapi maurus urang nan idak/alum kanai ko juo paralu!

Mako, ado babarapo hal yang bisa diusulkan ka pamarentah. Partamo, paralu manjalankan Work From Home (WfH) untuak kantue pamarentah, BUMN/BUMD dan swasta, sampai ubek atau vaksin lah sampai ka tangan masyarakat.

Kaduo, mampanyak transaksi daring, didukuang dek transportasi yang bisa dipasan sacaro online. Kini lah mulai ado urang bajojo bareh, sayue, bahan samba, di facebook, kanapo iko dak didorong bana dek pamaretah?

Tingga maarahkan SKPD teknis se untuak mahimpun urang manggaleh. Tantu sajo kok amuah, dan nyio bapikie dak copy paste!

Kok oto jo ojek daring lah sambueh pulo. Kok bisa pamarentah mandata, mangoordinasikan dan mangawalnyo sacaro serius, mako pado saatnyo pasa akan langang. Urang manggaleh di dunia maya se lai. Untuak paangkuik lah ado pulo kandaraan nan bisa tiok datiek dipasan jo hape!

Di lua itu, maatur urang kalua masuak Sumbar harus taruih dikarajoan, sasuai jo protokol kesehatan (protkes). Masyarakat pun wajib managak an Perda 6/2020, tanpa pandang bulu!

Jadi, masalah Sumbar kini ko takaik pananganan covid-19 adolah baa caronyo urang nan idak/alum kanai tu dijago jan sampai kanai. Dan urang nan lah kanai, dak kanai ciek lai. Lah, bapulang maalum pado kito!