HOME LANGKAN TINGKOK

  • Senin, 25 Maret 2019

Balai Tangah

TINGKOK
TINGKOK

Nagari Balai Tangah

di Luhak Tanah Data

oleh Bahren

 

Balai Tangah Anam Jorongnyo

Dalam Luhak Tanah Data

Dicubo aliah kini curito

Sasudah bacurito nagari Ata

 

Jorong Kubang jo Jorong Ampera

Jorong Kota jo Tanjuang Ambacang

Bawah balai jo jorong bodi

Danga lah kisah dari Inyiak Erma

Ka Ivan Adilla nan dari Padang

 

Curito ko bamulo di rumah Pak Erma di Jorong Ampera., wakatu itu tanggal duo puluah limo  di bulan Mei tahun 2007. Liau bacurito ka Ivan Adilla bagala Bagindo Sulaiman. Pak Erma ko Walinagari kutiko itu. Mako banamo nagari Balai tangah, iyo di luhak Tanah Data. Pado maso dahulunyo di daerah ko ado sabuah pasa. Di pasako lah tajadi sagalo macam bantuak jua bali, di pasa tu juo tampaik batamu jo basuo urang-urang dari babagai-bagai nagari nan lain.

Urang-urang nan datang tu ado nan manggaleh ado juo nan sakadar mambali kaparaluan sahari-harai nan ka dimakan. Dek karano rami itulah, makonyo sagalo bantuak acara nan bahubuangan jo nagari kadok diadokan dek niniak mamak kito kaum pangulu jo pimpinan nan lain di hari pasa tu. Karano niniak ko punyo kayakinan kalau acara diadoan di hari pasa, tantu rami nan ka datang. Pasa dek urang Minang sabagian ado nan manyabuiknyo pakan, ado pulo nan manyabuiknyo balai. Di nagari ko pasa nyo talatak di tangah nagari. Dek karano lataknyo di tangah mako disabuiklah tampek partamuan jo pasa tampaik bajua bali tu inggo kini  di sabuik jo Balai Tangah.  

Di Balai Tangah tu daulu kato Pak Erma, manuruik carito nan di danga liau, tumbuah lah sabatang kayu gadang nan badaun sangaik lah rampak jo rindang. Batang kayu gadang tu kodok dijadikan kalinduangan kutiko paneh jo ujan. Urang sinan manyabuik batang kayu tu jo kayu Kubang, Batang kubang ko ampia sarupo jo kayu gatah atau batang karet kato rang kini. Inggo kini tampek Batang kubang tu di jadikan ciek jorong dek niniak kito Banamo Jorong Kubang.

Sabuah lai ado pulo joroang nan indak laweh bana tapi masyarakaiknyo bacampua, dek karano bacampua tu mako urang sinan manyabuik nyo jo ampera. Mako Banamo lah ingo kini jorong nan kaciak banyak urang tu jo Jorong Ampera.  Ado pulo sabuah lai, jorong nan kaciek tapi langkok isi nyo, baiak isi sacaro adaik karano latak nyo di tangah nagari maupun isinyo sacaro bajua bali, Mako dibari namo lah jorong tu jo Jorong Kota inggo kini.  

Tapek di bawah pasa nagari tu, ado ciek tampek nan agak karandahan. Di situ lah mambuek kampuang jo taratak pulo niniak moyang urang Balai tangah, dek lataknyo di sampiang balai agak karandahan pulo, mako disabuik lah kampuang itu Jorong Bawah balai nan aratinyo kampuang di bawah balai.

Di nagari Balai tangah ko ado pulo sabuah tanjuang nan banyak tumbuah batang Ambacang, tampek batang ambacang nan banyak tumbuah tu dek niniak nan daulu dibari namo Jorong Tanjuang Ambacang. Nan tarakir sakali jorong Bodi, mako banamo jorong bodi dek niniak nan maunyi jorong ko barasa dari suku Bodi salah satu suku asa di Minangkabau.

Namo-namo dari jorong jo nagari nan ado ko, tampaknyo memang sangai banyak mambiak paham dari alam takambang jadi guru. Sahinggo, kanampakan dan panampakan alam lah nan banyak dijadikan sabagai sumber dari ma agiah namo sagalo sasuatu nan tampak dek inyiak moyang kito nan daulu. Tarakir Pak Erma juo manyampaikan ka Baginto Sulaiman baso niniak moyang masyarakaik nagari Balai Tangah ko barasa dari Tanjuang Sungayang jo Gaduik, carito ko ditarimo liau dari datuak-datuak dan rang tuo-tuo di nagari Balai Tangah ko. Adopun suku nan ado di Balai Tangah, salain Suku Bodi ado suku Malayu, Piliang, Caniago Jo kuti Anyia. Baitulah curito nan di dapek dari Pak Erman  nan batampek tingga Jorong Ampera. 

(Bahren, Dosen Sastra Minangkabau FIB Unand)


Wartawan : Bahren
Editor : T E

Tag :AsausueNagari #Namo Nagari

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com