Bacinto Dalam Mimpi

Bacinto dalam Mimpi (BdM)

Oleh Muhammad Nur Islamadina

Baramulo carito katiko Siti barangkek ka kampuang. Satiok duo minggu sakali jadwal Inyo pulang. Alah tabiaso dari samanjak masuak kuliah nan kini masuak samester tigo, satiok pulang inyo surang ndak ado kawan nan mangawani. Sungguahpun nan bak kian Siti indak parnah maratoki apo nan manimponyo. Bukan Siti indak bakawan, inyo nan suko pulang surang, sabab dapek batamu jo urang lain sahinggo dapek manambah kawan baru, kok dapek nan sarangkek, salain itu batamu jo nan gaek bisa manambah wawasan salamo di jalan ka pulang, tambuah ciek lai dapek mangatahui kaba baru nan sadang tajadi dalam oto tu. Mangkonyo baitu Siti labiah sanang jo acok pulang surang.

“Ondeh.. lah jam bara kini ko?” Siti bagumam, sambia maliek jam. Hari nan sadang pagi hari, di mulai sajo kagiatan nan biaso, mambasuah pinggan, manyasah baju, manyapu jo nan lain. Satiok saminggu sakali Siti malakuan kagiatan ko. Tapi kini, masonyo Siti untuak pulang ka kampuang, manjapuik sagalo nan paralu dibaok salamo di Padang jo manjanguak rang gaek nan lah taragak jo nak kanduang. Hal iko nan paliang dinanti dek Siti, mambuek hati jo jantuang sanang bak cando bungo nan sadang tumbuah kambang basami.

Alah taraso lamo bana indak pulang kampuang, sampai barasian raso ka pulang. Mangko dibuek dek Siti jadual untuak pulang duo minggu sakali, iko adolah pilihan nan ancak sabab kok indak pulang, beko rang gaek lah taragak pulo nak basuo. Bia nak samo-samo hilang raso taragak, mako bajalan pulang siti hanyo lai.

Bilo ado kagiatan nan marintang pado wakatu pulang. Siti maagiah kaba ka gaek di rumah untuak saba mananti, kok indak bisa kini, minggu bisuak pulangnyo. Nak jan cameh bana mananti kaba, lansuang batelpon untuak maagiah tau.

Sasudah mambarasiahan biliak, Siti maagiah kaba ka Yeti di dapua baso ka pulang kampuang.

“Yet, wak pulang lu dih” Siti mangajuik-an Yeti sadang masak di dapua.

“Ondeh mandeh, kau tu, elok-eloklah saketek, ndak tau sadang mamasak, batambah beko jantuangan lo den, lai talok mambiayaan dek kau tu?”.

“Iyo-iyo mintak maaflah, wak bagai, pulang lu dih Yet”.

“Iyo Ti, kirim salam untuak rang di rumah jan lupo elok-elok di jalan, pareso sadoalah barang nan babaok”.

“Adih Yet, thank you (terima kasih). Assalamu’alaikum”.

“Waalaikumussalam”.

            Hari nan galok-galok paneh mambuek badan sajuak jo ndak mangureh banyak tanago. Rumah nan jauah masuak ka dalam dakek sawah, Siti bajalan untuak bisa sampai ka labuah gadang, biaso oto angkot hilia jo mudiak maangkuik panompang. Dibaok barang teih ciek jo Tote Bag (tas kanvas) pangganti asoy, sabab kini Indonesia lah darurat sampah plastik. Jadi, Siti manggunoan teih tu untuak mambaok minuman, makanan jo nan lain di dalamnyo.

Ndak bara lamo mananti tibolah angkot tambang ka Pasa Raya, Siti lansuang naiak, dicaliak dalam oto ndak panuah bana panompang nan naiak, lamo lambek oto ko panuah, biaso oto ko nan dinanti-nanti, dek harago nan tajangkau.

            Rumah Siti di Kayutanam, untuak sampai ka rumah ado duo pilihan. Partamo, naiak kareta duo kali naiak KA Sibinuang di Simpang Haru sampai ka Lubuak Aluang, sudah tu KA Perintis di Lubuak Aluang sampai ka Kayutanam. Kaduo, naiak oto sabanyak duo kali. Nan partamo dari kontrakan turun di Pos Indonesia dakek Pasa Raya, beko manyambuang jo oto Trans Padang sampai ka Aia Tawa atau di muko Basko Grand Mall. Dari Basko baru inyo naiak oto tambang ka Bukittinggi. Jadi, untuak kini Siti mamiliah naiak oto untuak pulang kampuang. Sabab, taraso labiah lasuah naiak oto daripado naiak kareta, batin Siti mangecek.

            Sasudah turun dari angkot, Siti bajalan dulu, sabab oto angkot indak lalu di muko Pos Indonesia, oto nan luruih taruih ka Pasa. Molah baitu sabab jo karanonyo Siti bajalan. Kutiko bajalan Inyo maliek sakuliliang nan sangaik rami di wakatu weekend (akhir pekan), dicaliak oto Trans Padang lah mulai rapek ka koridor untuak maangkuik panompang. Dek karano padek, Siti lah batenggang raso samo panompang nan lain, oto nan padek sangaik, mambuek badan balipek duo. Tarif nan hanyo tigo ribu limo ratuih rupiah untuak umum, sadangkan untuak sikola (SD, SMP jo SMA) saribu limo ratuih, jauah-dakek samo haragonyo, oto nan sampai Lubuak Buayo.

            Salamo di oto, inyo nan mancaliak ka lua kaco jendela, dicaliak rumah-rumah, bangunan-bangunan nan badirik sapanjang jalan, tasusun elok mambuek mato ndak bosan mamandangi jo mangawani salamo di jalan nantun. Sairing oto jo waktu nan bajalan lah tibo Siti di muko Basko Grandmall, inyo nan taruih malanjuik-an palangkahan manuju oto nan barangkek ka Bukittinggi. Dapeklah dek inyo oto saparampek gadangnyo dari oto bus barisi urang kurang labiah sapuluah urang jo sopir sitokar sakali. Dalam sabarih tu dapek karosi duo buah suok jo kida, oto nan lah lansuang padek ndak dikana inyo nan duduak samo bujang sarangkek. Alah kurang labiah limo baleh minik, oto nan lansuang bajalan manuju Bukiktinggi. Rasaki nan indak kamano, Siti nan duduak dakek jendela tampek nan paliang dicari sabab nan lah talampau suko duduak disinan nantun. Banyaklah urang nan indak dapek oto, lah duo-tigo kali urang balalui, sabab dek oto nan lah panuah tadi, indak dapek manambah lai. Kutiko lah saparampek jalan dibayialah pitih nan lah basisiah sabalun ka barangkek tadi, supayo nak jan talupo maagiah ongkoih nan takah biasonyo.

            Ndak dikana Siti nan duduak jo bujang itu, nan kamudian manaruah hati. “Ndak ka mungkin cinto akan manjadi, pado hal baru basuo jo inyo”, gumam Siti. Indak disangko cinto ka tajalin di ateh oto, Siti jo Inyo samo-samo manaruah hati. Sapanjang jalan, kutiko oto samakin kancang balari, samakin asik maota baduo, saraso dunie inyo baduo nan punyo. Malang nan sakijok mato, badan tahampeh ka muko, dek oto baranti sakutiko, ruponyo itu hanyolah bungo lalok nan mandayo dek Siti. Kadang antahlah, tapi baalah, raso cinto jo kasiah sayang hanyo barado dalam mimpi. Ndak disasali bana apo nan lah tajadi nantun. Indak dikana pulo lah ampiang tibo di tujuan. Sakutiko otolah manapi di Kayutanam. Dicaliak Ayah lah manungguan di tapi jalan, Siti nan lansuang manjawek salam jo Ayah. Sudah tu Ayah jo Siti nan lansuang babaliak ka umah.

Alahsampai di rumah Siti nan basalam jo Amak sambia mancaritoan nan alah tajadi salamo di oto. Kutikolah sampai mukasuik nan kadisampaian ka Amak tadapek pituah nan dibari iolah sarupo iko:

 “Nan kato mandeh elok baok sumbayang, nan sakali ko bia ganti pangaja”, tangiang-ngiang juo dalam buruak manuang Siti. Inyo nan nio manyimpan kanangan nan alah tajadi nantun. Alah dikana pulo kato mandeh ka bajalani juo, untuang kok jodoh nan indak kama, sabab nan Satu indak kan lalok untuak umaiknyo. Bialah kini ndak dapek, untuang kok isuak ado rasaki nan labiah ancak dari ko. Indak basasali apo nan lah tajadi, iko lah suratan dari nan kuaso, mungkin dek badan nan lah panek mamikia nan indak pasti, mako coiko nan tajadi.

*Mahasiswa Sastra Minangkabau Unand