HOME LANGKAN PEPATAH


  • Selasa, 29 Oktober 2019
Babiliak Ketek, Babiliak Gadang
Pepatah

Babiliak Ketek, Babiliak Gadang

Oleh: Eka Meigalia*

Arati nan sabananyo dari kato biliak adolah ruangan nan disakek bia ukurannyo labiah ketek. Biasonyo digunoan untuak manjadi tampek lalok atau istilahnyo “kamar”. Biliak ko ado nan ketek, ado nan gadang. Ketek aratinyo samo jo sampik, indak laweh, indak leba. Lawannyo adolah gadang. Nan gadang ko ukurannyo labiah dari sadang. Jadi samo jo laweh, leba.

Pado ungkapan “babiliak ketek, babiliak gadang”, kato biliak sarupo nan dijalehan di ateh diagiah awalan ba- nan manjadian kato babiliak baarati ‘mampunyoi biliak’ atau ‘punyo biliak’. Jadi sacaro nan tasurek, ungkapan tu aratinyo adolah mampunyoi biliak nan sampik jo biliak nan laweh.

Dibaok ka kahidupan sahari-hari, di satiok rumah dapek ditamuan pulo apo nan disabuik ‘kamar’ atau ‘biliak’ ko. Biliak adolah tampek untuak lalok atau baistirahat. Ukuran dari kamar ko iyo ado pulo nan ketek sarato nan gadang. Kalau nan ketek tantu hanyo bisa diisi surang atau paliang banyak baduo. Tapi kalau nan gadang, lai bisa labiah dari duo urang nan maisinyo. Untuak rumah gadang biasonyo biliak-biliak nan ado ukurannyo samo gadang. Biliak tu diparuntuakkan untuak anak padusi nan alah balaki. Jadi masiang-masiang biliak dihuni dek sapasang laki bini. Samantaro untuak nan gadih diagiah biliak di anjuangan sabalah suok pado rumah gadang baanjuang.

Biliak untuk laki bini di rumah gadang pado umumnyo ketek-ketek. Muek untuk ciek tampek tidua ditambah lamari. Ukuran nan ketek tu ndak mamungkinkan untuak panghuninyo mamakai tuak kaparaluan lain salain lalok. Jadi hanyo lalok sajo nan bisa dilakukan di biliak tu. Untuak kaparaluan nan lain, bisa digunoan biliak nan lain nan labiah laweh atau ruang nan tabukak.

Katiko biliak tu ketek dan hanyo bisa dipakai dek duo urang atau sapasang laki bini sajo, mako di dalam biliak tu ado banyak hal nan bisa disalasaian baduo salain lalok. Banyak karajo atau pambicaraan nan bisa dilakuan baduo sajo indak sapangatahuan urang lain. Kok ka bacakak bana di dalam biliak tu, urang di lua indak ka sato atau tau. Aratinyo biliak nan ketek ko dapek dipakai untuak urusan-urusan nan hanyo paralu dikatahui baduo, indak malibatan urang lain.

Sabaliaknyo, di biliak nan gadang ado labiah dari duo urang nan muek di dalamnyo. Karano labiah dari duo urang, mako kalau ado karajo sarato pambicaraan nan tajadi di dalamnyo, sipaiknyo tantu ndak sarahasio katiko di dalam biliak ketek. Tapi urang nan di lua biliak atau nan indak tamasuak ka dalam panghuni biliak gadang tu indak pulo akan tau apo nan tajadi di biliak tu. Atau apo nan dibicaroan di dalam biliak tu. Hanyo nan ado di biliak tu sajo nan tau.

Bakaik jo itu, jaleh ado hal-hal nan sipaiknyo hanyo untuak dikatahui dek urang nan saketek. Saketek dalam arati dakek pulo hubuangan karabaiknyo. Sarupo hubuangan antaro laki bini tadi. Urusan antaro laki bini di biliak ketek tadi adolah urusan nan sipaiknyo sangaik pribadi. Sangaik rahasio. Ndak elok kalau dikatahui dek urang lain nan sarumah. Balawanan jo urusan di biliak gadang. Urusannyo ndak sarahasio antaro laki bini. Hubuangannyo bisa sajo sarumah, sasuku, atau sakaum. Tapi tatap indak bisa dikatahui atau dicampuri dek urang di lua itu.

Di Minangkabau, ungkapan babiliak ketek, babiliak gadang ko maagiah panduan ka awak untuak mamilah-milah. Indak manyampaian sadonyo untuak urang banyak. Utamonyo bakaik jo aib. Aib dalam rumah tanggo, cukuik dalam rumah tanggo tu sajo nan tau. Dalam ciek rumah kadang ado mintuo, ipa, jo basan. Urusan dalam rumah tanggo diistilahkan di biliak ketek. Indak tau urang lain bia pun dalam ciek rumah. Sadangkan aib nan ado di rumah, cukuik urang-urang nan sarumah nan tau. Jan sampai urang di lua rumah tau, baiak tatangga, atau dunsanak di lua rumah.

Aib dalam hal iko adolah sasuatu nan harus disambunyian. Di simpan rapek-rapek jan sampai marusak harago diri. Di Minang, harago diri itu paralu bana dijago. Baiak itu dalam barumah tanggo, atau juo dalam kaum. Malu nan baakibaik manjatuahan harago diri manuruik urang Minang indak dapek ditabuih. Kalau malu lah didapek, indak kama manyuruakkannyo. Mako itu paralu bana manjago aib. Kalau ka bacarito, mako babiliak-biliaklah. Ka sia carito tu patuik diagiah. Ka laki bini sajo, atau ka urang sarumah.

Sahubuangan jo itu, pado maso kini ko nan sadang bakambang adolah media social. Hampia satiok urang punyo media sosial kini ko. Baiak itu WhatsApp, Facebook, Instagram,     Youtube, atau Twitter. Di situ masiang-masiang awak dapek babagi gambar, video, carito, atau komentar-komentar. Nan ndak tapek, ado pulo di antaro awak nan manyampaian masalah rumah tanggo di media sosial tu. Misalnyo hampia ka bacarai, istilahnyo “curhat” lah di media social. Tau lah urang sadunia jo masalah wak tadi. Itu nan namonyo aib dalam rumah tanggo. Indak patuik tau urang lain, apolai urang nan indak pernah wak kenal. Masalahnyo di media social ko urang bisa lo mambagian carito awak tadi. Manjadi “viral” pulo lah masalah rumah tanggo wak tadi.

Salain aib, media social kadang ndak disadari lah jadi pulo tampek untuak mamanggak. Alah bali rumah, oto, pai kian ka mari, ka lua nagari. Baposting lah di situ. Mukasuik hati untuak menyimpan foto sajo. Tapi urang lain bisa manilai lain. Itu lo nan harus diingek dikana kini ko. Manggunoan media social harus bijak. Pakai juo handaknyo papatah Minang, “babiliak ketek, babiliak gadang’. Ado urusan nan harus disimpan rapek, ado nan patuik dikatahui urang. Sajauh dan sabanyak apo pulo urang handaknyo tau. Apolah patuik urang sakampuang atau urang sadunia nan indak dikenal jadi tau urusan-urusan nan harusnyo hanyo awak nan tau. Atau cukuik awak jo keluarga sajo nan tau. Bisa pulo dipakai ilimu “malu indak ka dibagi” sarato ilimu padi “makin barisi makin marunduak”. Aib indak ka dibagi, santiang indak ka maninggi.

 

*Dosen Sastra Minangkabau FIB Unand

 


Wartawan : Bahren
Editor : bahren

Tag :# Langkan # Pepatah # Minang