Bujang Dilan Jo Gadih Milea

BUJANG  DILAN JO GADIH MILEA

Oleh :Lia Safitri*

Antah apo ka dayo jo badan tasabuik namo bujang  Dilan. Anak mada subhanallah manggaduah kawan co urang bagak kampuang. Kampuang banamo Kayu manang di kanagarian Minangkabau. Bujang  Dilan tanamo dek gadih gadih Kayumanang, tapi ba a mato ka mamandang indak ado nan manusuak ka dado  Dilan. Tapi ado ciek parangai elok  Dilan yo bana dicari mandeh-mandeh di kampuang inyo subana pandai mangaji suaro bak buruang murai, sanang hati sia se nan mandanga-an. Dek suaro rancak, Dilan kadang dimano ado baralek atau mandu’a Dilan pasti tabaok di undang urang kampuang. Ka dijodohan ba a ka dikecek nan si  Dilan indak namuah padok hatinyo ka padusi sinan.

Matoari sapanggalan tabik, ado kaba dari kawan bujang  Dilan banamo Anhar raso ado cewek rancak tibo ka kampuang nanko

‘’Lai tau ang  Dilan? Ado padusi rancak tingga kampuang wak?’’ Cek si Anhar

‘’Lai subana e.. tu? Kok iyo den nio lo mancalik a..?’’ Jawek si  Dilan

‘’Tapi jan salah ang  Dilan, padusi tu banyak nan maincar tau ndak, ang? tambah si Anhar

‘’Yo bana tu? ‘’ Dilan panasaran dalam hatinyo

Sasudah baagiah kaba barito, di sisi nan lain ado padusi baru baliak ka Kayumanang. Pindah dari padang dek gaeknyo pindah karajo. Padusi tu banamo gadih Milea. Rancak bana kalau mato mamandang bak intan bakilau. Galak manih gadih nan ko luluah ati bujang-bujang kampuang. Dak badayo lai, iyo bana nio dakek Milea malah nio kok bisa batunangan. Ba’a kok cando urang Minang dahulu padusi indak buliah basobok baduo-duo dek beko banyak muluik nan ka mangecek banyak dindiang nan ka mandanga. Tapi samantang pun baitu, tetap sajo ado tampek bisa basobok, di musajik lah tampeknyo.

Biaso gadih jo bujang basobok di musajik dek karano manimbo ilmu agamo. Tapi ba a lai yo urang subana mada nan suko manggaduah kawan apolagi padusi mulai baraksi. Dilan marayu Milea nan baru pai ka musajik. Wakatu itu hampia ka magrib sakitar jam limo satangah patang. Nan si bujang  Dilan mandakek ka Milea pakai kain saruang di baluik bak cando rok. Tambah gagah jo baju koko guntiang cino.

‘’Kau Milea yo ? ‘’kato si  Dilan

‘’Ha aa(takajuik dek ado urang sok kenal sok dekat), iyo ba a tu?’’ Si Milea binguang

‘’Den ramal beko wak sholat basamo di musajik.’’ ( Dilan galak sambia balari ma ambiak ayia wudhu’)

‘’Tu iyo lah, kan wak sumbayang di musajik samo garin’’. ndak engak tu. Si Milea bantuak ka berang antahlah atau ka galak jadi satangah hati nak berang.

             Siap diramal dek bujang  Dilan ka sumbayang basamo, si Milea pai ka batang ayia untuak ambiak aia wudhu’ sambia dikawanan dek Wati. Sabalum itu, Wati ko dunsanak si bujang  Dilan nan tangka tapi hebaik mangaji di kampuangnyo. Kok bisa dibangga-an yo di sabuik muko rancaknyo kampuang. Dek baru pindah ka Kayumanang mangko Milea basobok jo Wati manjalang jalan ka musajik tadi, baliak awak lik ka carito Milea, tapi wakatu ka batang aia kiro e tamu sirah nan tibo. Dek hati dak dapek mamaso kiro e Milea babaliak pulang untuak baranti sumbayang jo mangaji.

            Yo sabana ibo bujang  Dilan nan mancaliak ka balakang mancari Milea indak nampak wajahnyo do. Yo subana malang si bujang  Dilan sok bantuak dukun nan pandai maramal tapi dak jadi-jadi. Nan sumbayang alah salasai si  Dilan di tanyo samo Anhar

            ‘’ Dilan, mano Milea angnyo?’’ Mancimeeh  Dilan

            ‘’Antah lah dek ang, den ngecek ka si Milea tu. Den ramal beko ka sumbayang basamo di musajik’’. Jawek  Dilan sadiah

            ‘’Gilo ang mah  Dilan, marayu padusi sambia maramal. Alah bantuak dukun sae ang mah. Hahahhahhahahha. Si Anhar takekeh dek sakik paruik galak.

            ‘’Jan ang cimeeh den, apo nan den kecean beko pasti tajadi. Caliak dek ang beko’’.  Dilan sok gagah.

Babarapo ari siap tu Milea alah salasai jo tamu sirahnyo. Babaliahlah ka musajik dek iyo paguno ilmu mangaji untuak mati elok basobok jo tuhan. Nan ko yo jadi anak babudi bayiak ka mandeh jo bapak. Pasti juo ka laki nan ka jadi panutan diri kalau alah siap di palakiaan. Alum sampai malangkah ka musajik, si  Dilan tibo manggaduah Milea sambia mangecek

            ‘’Milea, kau rancak. Sayang tapi aden alum nio babini lai’’.  Dilan sambia galak manih

            ‘’Apo kecek ang?’’. Milea berang

            ‘’Iyo kau rancak, sayang den alum nio babini lai alum tau kalau bisuak. Tungggu se’’.

Si  Dilan pai balari baliak ka batang aia bia indak dicaramahan Milea

 Dek kato-kato  Dilan, tamanuang Milea. Ba a kok ado urang macam itu. Sok gagah bana dan sok mandaekek lo tu sambia ngecek kayak itu. Bisuaknyo tapek Milea ka mandu’a untuk nazarnyo,  Dilan tibo sambia maagiah juz amma. Tapi indak ka si Milea tapi ka eteknyo Milea. Juz amma tu kironyo ado surek ketek nan isinyo

            Tek, jan di baco tulisan ko. Beko etek babaliak mudo

            Tapi kalau alah tabaco bararti etek alah gaek ado anak pulo

            Tapi sabalum itu bia ambo mambaco

Bismillahhirrahmanirrahim, ateh namo adat basandi syarak, syarak basandi kitabullah

Ambo banamo  Dilan manitip juz amma ka etek untuk Milea

Sambia mansahkan kalau etek baco surek ko

Etek satuju ambo jo si Milea

Mokasi etek manih J

Katiko mambaco surek itu takekeh etek Milae mambaco.

Bujang apo ko, barani ngecek aden alah satuju inyo jo Milea. Kato etek Milea.

Sasudah mambaco surek nan boco, di agiah lah juz amma ka Milea. Tapi si Milea ko dak namuah tagaduah mako di bacolah tangah malam manjalang ka lalok. Katiko di bukak juz ammma di bagian mungko ado tulisan

Milea, juz amma ko untuak kau

Jan sampai indak di baco

Karano narako tu barek

Den dak bisa nolong kau

Jadi bia se setan nan masuk

Dak nio den kalau kau paniang mamikia narako

Isi surek nan sok bacaramah mambuek Milea galak manih sambia mamikian yo sabana taraso ado balain di hatinyo. Antah inyo manyangko yo kok Milea tu alah suko dan jatuah ati ka bujang  Dilannyo kampuang Kayumanang. Taruih sajo si  Dilan mambuek Milea takajuik dek parangainyo nan mambuek Milea tambah suko bana ka  Dilan. Tiok ari dibaoknyo pantun-pantun nan mambuek ati padusi tabang ka langik katujuah. Sampai ka niek yo bana ka malamar Milea. Niniak mamak basobok untuk mansahkan antaro  Dilan jo Milea jadi halal. Jadi laki bini dunia akhireik. Sado mato galak sado bibir manih bacahayo mandangan duo sajoli ka baralek. Sayang malang nan ka tibo  Dilan di tangah sawah nan takuik jo baluik. Tajatuah ka tanah basambuik jo batu si bujang  Dilan tanamo pai ka Allah nan satu. Tinggalah mato ayia gadih Milea marauang mandangan kaba calon laki nan di ambiak dek tuhan Allah.

*Mahasiswa Sastra Minangkabau FIB Unand