HOME LANGKAN PEPATAH

  • Rabu, 23 Oktober 2019
Bajalan Paliharo Kaki, Mancaliak Paliharo Mato
Pepatah

 

Bajalan Paliharo Kaki, Mancaliak Paliharo Mato

Oleh: Silvia Zuria Melita*

Adat di Minangkabau kayo dek falsafah hiduik nan maajakan kito untuak arif dan bijaksana. Sabananyo banyak nilai-nilai hiduik nan diajakan di dalamnyo tamasuak  nilai moral akhlak yang elok dan tenggang raso. Tapi anak mudo kini banyak nan alah lupo akan hal sarupo itu, sahinggo kito sabagai anak mudo harusnyo sadar akan hal itu .pananaman karakter samanjak ketek paralu dilakukan karano arus globalisasi nampaknyo samakin parah.

Di Minang memang disarankan untuak saliang manjago hubungan dalam lingkungan sakitanyo. Baa ka indak, adat Minang ko mangajakan kito untuak bisa mambiasoakan diri baropok atau bamusyawarah untuak manyalasaian masalah tu sakali pun itu masalah pribadi urang Minang tetap manyalasaikan sacaro basamo.

Adat Minang sangaik manjunjuang pasatuan dan kasatuan dalam masyarakat Minang. Sadari dulu urang Minang yakin tanpa adonyo pasatuan dan kasatuan tu bisa manjauahan dari tujuan masyarakat yang nan sabananyo. Adat Minang salalu mancubo mamaliharo caro mangecek, karano di Minang setiok masalah bisa disalasaikan malalui musyawarah dan dalam musyawarah tu harus ado tata caro mangecek supayo indak manyingguang urang lain.Bak kato papatah:

Bajalan Paliharo  Kaki,

Mancaliak paliharo Mato.

Bakato Sapatah  Dipikiri,

Bajalan  Salangkah  Madok Suruik.

Bajalan paliharo kaki dan maliek paliharo mato bamukasuik jikok bajalan ka nagari urang jan sampai salah malangkah, dan maliek harus elok-elok karano jikok idak bisa sajo mambuek urang lain tasingguang. Bakato sapatah dipikiri dan bajalan salangkah madok suruik mukasuiknyo satiok nan awak sampaian atau nan di kecek an harus dipikian talabiah dahulu, sahinggo indak manyigguang parasaan urang lain. Parasaan manusia ko sangek haluih tasingguang saketek bisa buek urang taluko dan buek bancano. Karano itu adaik maengekan kito untuak taruih bahati-hari dalam batindak, baik dalam mangecek, parilaku atau pabuatan. Jan sampai mambuek tasingguang parasaian urang. Sadari ketek kan alah di ajaan raso jo pareso. Dek itulah kito harus maingek papatah nan itu, supayo kito tahindari dari masalah nan mambuek urang manjauah dari kito.Salain itu ado juo papatah nan sarupo itu:

Bajalan paliharo kaki

Bakato paliharo lidah

Kaki tataruang inai padahannyo

Lidah tataruang ameh padahannyo

Bajalan salangkah madok suruik

Kato sapatah dipikian

Papatah di ateh hampia samojo nan sabalumnyo tapi di nan kaiko ditambah jokato kaki tataruang inai padahannyo, lidah tataruang ameh padahannyo. Dari kato nan tu mukasuik nyo jan sampai kito menyakiti urang lain karano kito hiduik saling mambutuhkan kito dituntuik untuak bisa saliang tenggang raso, kito ditintuik untuak cermat dalam dalam arti manggarati bahwasanyo mangecek pakai ilmu, takandung nasehat yang bamanfaat atau bisa manjaniahan masalah sahinggo dikana urang banyak.Kito harus nyo sadari bahwasanyo kito hiduik saliang membutuhkan dan untuak itu kito harus bapandai-pandai dalam basikap, sarupo papatah:

Nan elok dek awak katuju dek urang

Lamak dek awak lamak dek urang

Sakik dek awak sakik dek urang

Aratinyonan elok dek awak harus disukoi dek urang, nanlamak manuruik awak harus lamak lo dek urang, dan sakik manuruik awak sakiklo dek urang. Jadi jan asa mangecek se, awak harus mampatimbangkan kato nan kalua dari muluik, jan sampai tasingguang urang dek nyo. Dek karano itu sangaik paralu mamaratian caro awak bakomunikasi dan keadaan yang sadang balangsuang supayo hal yang awak sampaian bisa tasampaian sacaro elok atau baik Dan tantunyo ditarimo elok lo dek urang lain.

*Mahasiswa Sastra Minangkabau FIB Unand


Wartawan : Silvia Zuria Melita
Editor : bahren

Tag :# Langkan # Pepatah # Minang