HOME LANGKAN CARITO


  • Minggu, 28 April 2019
AYAM BARANAK ITIAK
Carito

Ayam Baranak Itiak

 

Oleh: Bahren*

 

Alah labiah sabulan agaknyo, Si Alan indak basuo jo Mak Anan. Antah Si Alan, kolah nan sibuk atau Mak Anan nan sadang tabedo jo sagalo tugaih nyo di kantua yang sabanyak garobak tundo. Tapi, nan sakali ko si Alan bapikia elok sajo, kaduo nyo sibuk, baiak inyo atau pun Mak Anan. Maklum lah kini ko, urang nan baduo ko banyak manjadi panitia.

Dek lah taragak bana jo Mak Anan, pai molah si Alan manuruik Mamak e tu, ka rumah nyo. Sambia malengah-lengah hari, sakalian mamintak maaf lahia jo batin dek ka masuak puaso. Lapeh sumbayang luhua, Si Alan pun pai ka rumah Mak Anan. Di dapek-i nyo mamak e sadang duduak santai di langkan rumah, sambia minum kopi jo mambaco koran, sakali-kali dicaliak e mamak e, tagalak surang kutiko mambaco koran tu. Bia indak manjadi sakwa sangko, batanyo lah Si Alan ka Mak Anan, manga ko lah liau gala-galak surang.

Ba’a dek galak-galak surang Mak, Apo bana nan Mamak baco?. Heran lo awak mancaliak mamak, biaso e bangih je pambaok an mamak asa mambaco koran. Kini lah galak-galak surang sajo. Hahahaha… wa’ang Lan. Baco gai lah salam, tu naiak lah kateh rumah, baru batanyo. Ko indak alun salam jo naiak ang lah batanyo. Molah kamari duduak siko. Bia den jaleh an ka wa’ang. a bana nan den galak an.

Ba’a den indak ka galak-galak surang dek ang Lan, heran den kini ko mancaliak laku jo kurenah urang nan banyak ko. Lah bak cando ayam baranak itiak. Lai tantu dek ang Lan?. A…a.. apo lo tu Mak, Ayam baranak Itiak tu. Yo indak tantu dek awak doh Mak. Itu mangko nyo den tagalak Lan. Banyak urang kini nan lah lupo atau malupoan jaso. Memang budi baiak ko indak untuak kadisabuik-sabuik doh Lan. Tapi samantang pun baitu, awak juo indak buliah lupo jo jaso urang ka awak. Itu samo jo Ayam baranak itiak tu.

Ba’a dek samo baitu. Ado istilah nyo ciek lai Dek kasihan ayam mangko baranak Itiak. Danga dek ang dih, Ba’a mangko coitu. Dari babagai curito nan mamak danga Itiak ko indak bisa manateh an talua nyo surang. Mako untuak manateh an talua itiak tu biasonyo nan punyo itiak manumpangkan talua itiak tu ka ayam nan sadang maaram-kan anak nyo. Makonyo manateh lah talua itiak tadi manjadi anak itiak. Walapun kini lah ado alaik tateh otomatis, tapi bitulah nan biaso dibuek dek urang dulu.

Salain tu, mamak batanyo-tanyo juo ka kangkawan mamak nan sakolah di bagian taranak, ba’a kok itiak indak bisa manatehan taluanyo, Kawan Mak Anan tu manjaleh an baso itiak tu suko nan lambok-lambok jo nan basah-basah. Arati-e bana itiak tu suko jo aia atau lunau jo bancah. Mako nyo kalau sadang basah-basah itak ko maaram, talua nyo manjadi busuak dan manjadi tilambang, indak manjadi anak jadi e doh, bitu kikiro panjalehan dari kawan Mak Ana tu Lan, dotor peri namo-e. Makonyo kalau nio manateh an itiak urang malatak-an di sarang pangaram-an ayam.

Tapi apo nan tajadi sasudah talua itiak tu manateh? Nan namonyo itiak indak doh mungkin ka jadi ayam. Itiak akan tetap manjadi itiak dan mawarisi sipaik induak nyo, suko jo ayia. Nan ayam tetap saja manyangko dek talua tadi tu inyo nan manateh-kan, makonyo yakin baso iti anak e. Tapi… sasudah batamu jo ayia taganang atau bancah, sipaik itiak e datang. Nyo malompek ka aia jo bancah tu. Nyo tinggakan induak e nan alah manateh kan inyo, induak ayam lah bakotaik-kotaik maimbau anak nan jatuah ka ayia, tapi anak itiak tadi lengah sajo sambia sasakali babunyi cuek…cuek….cuek. indak mandanga kotaik induak e.

Makonyo Lan, den tagalak-galak tadi tu, mambaco barita di koran-koran kini bitu banyak urang nan lah sukses lupo wee baso sukses e tu ado andil urang banyak saketek e di situ. Salain tu, inyo juo lupo baso kok manjabat e kini paliang lamo sampai periode nyo salasai, tu ka manga e lai? Abih jabatannyo nyo ka manjadi rakyaik badarai baliak. Nan Mamak takuik an kutiko nyo pansiun jo indak manjabaik lai Lan. Dek sipaik e saroman anak itiak tadi. Lai kolah ka disapo juo wee dek uran-urang tu lai. Kok itu nan ka mambaok e manjadi struk jo lepai nyo Lan. Mako nyo Lan. Ciek pasan mamak ka waang, kok manjadi waang bisuak, nan dahan tampek batumpu, atau tabek tampek ang parnah mandi jan ang lupo. Walaupun tumpuan ang kini labiah ancak dari dahan tu, atau tampek mandi ang kini lah serba otomatis. Karano dengan salalu maingek jaso urang lah ang kan bisa manjadi urang gadang dan batambah gadang jo musahua.

Oooo, bitu yo Mak. Jadih mak. Tunjuak jo pangajaran Mamak kan awak ganggam taguah dipacik arek, Di jadikan suluah katiko malam, dijadikan patunjuak kutiko sasek. Ciek pintak awak ka Mamak nyo Mak, ijan Mamak panek untuak salalu maingek jo mangana-kan awak kutiko salah jo sasek dih Mak. Kok itu nan ang pintak, memang itulah tugaih jo pungsi Mamak di nagari awak ko. Untuk maingek jo mangana-kan kamanakannyo. Ndak bitu doh Mak, dek awak ka pai ma anta Supiak pai pareso ka doter, pulang lah awak lu Mak. Assalamulaikum.

         

*Dosen Jurusan Sastra Minangkabau FIB Unand

 

 


Wartawan : Bahren
Editor : Bahren

Tag :# Langkan # curito #minang