HOME CELOTEH PROVINSI SUMATERA BARAT


  • Selasa, 1 Januari 2019
2019 tibo. Mamiliah awak lai

PADANG (Minangsatu) - 2019 lah tibo. Iko tahun politik kecek Pak Gamawan Fauzi, mantan Mendagri jo mantan Gubernur Sumbar. Ado mantan liau ciek lai, yaitu Bupati Solok. Sagalo nan lah salasai dijabat tu disabuik mantan atau bakeh.

Kato liau, pemilu ko pesta rakyat, tapi pesta kok ndak gembira. Jaleh mukasuiknyo tu. Iko pesta demokrasi paliang raya di negara ko, nyatonyo alun bisa mambuek warga riang gembira. Memang bitu nan tajadi kini. Parang tulisan di medsos, basosoh, bakareh arang. Masih dalam suasana ogoh maogoh, cacek mancagek, hino mahino. Ndak nampak tim sukses nan sabana takah, memaparkan program untuak mencerdaskan rakyaik.

Sanak, 17 April 2019 bisuak ko, lah ditatapkan sabagai hari Pemilu serentak. Warga ka mamiliah urang nan ka duduak jadi anggota dewan ampek tingketnyo, sudah tu ado pulo mamiliah presiden. Pokoknyo dewan dipiliah sarentak, DPRD Kota/Kabupaten, Provinsi, DPR RI, DPD RI. Nan untuak dewan sajo lah 4 karateh, tambah ciek lai karateh nan ka dicoblos untuak mamiliah presiden jo wakianyo. Jadi cukuik jadi 5 karateh suaro nan ka dipagunoan dek satiok warga nan berhak mamiliah, tamasuak urang gilo, hahaha.... Kalau nan tarakhir ko, agak gali paruik wak.

Kecek ustad Abdul Somad, ado tigo kelompok manusia nan ndak diminta pertanggungjawabannyo dek Tuhan Allah. Patamo, anak ketek sampai akil baliq, kaduo urang lalok sampai nyo jago, katigo urang gilo sampai nyo cegak. Kok lai lo ka cegak. Tibo di negara awak, urang nan ndak dituntuik karano gilonyo, dapek hak suaro pulo katiko Pemilu sarentak tahun 2019 ko. KPU nan alun cegak atau urang boco ko nan lah sehat., hehehe....

Soal itu bialah dibahas dek urang KPU jo urang partai politik atau pamarentah jo anggota dewan.

Ado soal lain nan mambuek wak maleh mambaco medsos, facebook, twitter, whatsup. Iko lah dijadikan ajang parang basosoh dek duo kubu pandukuang capres jo wapres. Kubu Jokowi dan kubu Prabowo ko samo mancari kelemahan jo kekurangan lawan sae. Intinyo kubu awak ebat, kubu lawan ndak ebat, hehehe...

Kubu awak islami, kubu lawan diragukan imannyo. Kubu awak lah bakarajo, kubu lawan alun tantu bisa karajo. Kubu awak jujur, kubu lawan ingkar janji. Ituuuu se isinyo. Tapaso rajin-rajin mahapuih video jo foto-foto di dalam hape (ponsel) awak, sabalun nyo sasak angok dek panuah.

Kecek wartawan senior Khairul Jasmi (Kajie), nan acok disabuik presiden ko, pendukung capres tu adolah kelompok manusia nan ndak bisa ditagah. Kok ditagah nyo berang, dinasehati nyo malawan. Samo jo kelompok rombongan ambulan nan mamboa mayat, atau jenazah ka kuburan. Jan cubo-cubo ditagah, distop, bisa malangkang kayu bandera tauhid tu di kapalo, hahaha.

Untuak duo kelompok rombongan tu, ancak awak se nan mangalah. Tau diri. Dari pado malawan urang nekad, ancak awak diam, tagak di tangah. Urang diam, tapi lah punyo pilihan nan pasti wakatu pemilu tibo isuak 17 April 2019.  Mamiliah nan katuju di hati. Iko soal hati, soal subyektif, ndak bisa dibahas, ndak amuah diperdebatkan. Dibahas soal hati, ndak ka pernah tuntas. Minyak abih, samba tak lamak. Wakatu tabuang, jo kawan ndak bakalamak an.

Ancak cari damai, piliah sasuai salero.

(Batuah)


Wartawan : Batuah
Editor :

Tag :#PemiluSerentak2019#